Mən, Barat Əlizadəyəm!

1994-cü il Aprelin 12-sində Astara rayonunda anadan olmuşam. İlk təhsilimi Astara rayonu 2 saylı orta məktəbdə almışam.

2006-cı ildə “Lənkəran Özəl Türk Liseyinə” daxil olmuş, liseyi yüksək qiymətlərlə bitirib 2011-ci ildə “Xəzər Universitetinin” Filologiya (Azərbaycan dili və Ədəbiyyatı) fakültəsinə daxil olmuşam.

Universitet vaxtlarından özümdə biznesə olan marağı kəşf etmiş, ürəyimin istədiyi yönə getməyə hər zaman can atmışam.

2015-ci ildə, bir il ərzində oxuduğum 120-yə yaxın kitab dünya görüşümün formalaşmasına və həyatımın əsas məqsədini kəşf etməyimə yardımçı olmuşdur. Eyni zamanda, bir il ərzində sayısız təlimlərə qatılmağımla bir çox uğurlu iş adamları ilə tanış olmuşam.

Marketing, mühasibatlıq və ona bənzər kurslara da qatılaraq öz bacarıqlarımı inkişaf etdirmək üçün yollar axtarmışam.

2016-cı ilin sonlarına doğru, “Bam & Bella” adlı mağazanın əsasını qoyub, quru meyvə topdansatışı ilə məşğul olmuşam. Bu, eyni zamanda ilk biznes təcrübəm olmuşdur. 7 aylıq bu acı təcrübə iş həyatına atılan ilk böyük addımım sayılır.

Bu təcrübədən sonra, 2017-ci ildə fəaliyyət göstərən “On Trip Turizm Şirkətinə” rəhbərlik etməyə başlamışam. Rəhbər vəzifəsində ikən, turizm bacarıqlarımı inkişaf etdirməklə məşğul olmuş, öz şəxsi turizm şirkətimi açmaq planları qurmuşam.

Qismətdə varmış ki, 19 Sentyabr 2017-ci ildə “Interforce Tourism Company” adlı böyük və yeni bir turizm şirkəti təsis etmişəm. Şirkətim 1.5 il fəaliyyət göstərməklə ciddi işlərə imza atmış, daha sonra isə yetərsiz maliyyə səbəbindən bağlanmışdır.

Turizm biznesindən sonra, yenə başqa bir sahə olan tikinti materialları biznesində özümü yoxlamaq qərarına gəlmişəm. 2020-ci ildə özüm qurduğum “Parket Boutique” adlı mağazada tək menecer olaraq çalışmış, boyalı parketlərin satışı ilə məşğul olmuşam.

Hal-hazırda, ofis və dəftər ləvazimatlarının kralı sayılan “İnci Şirkətlər Qrupunda” Korporativ Satış Meneceri işləyirəm. İşim, böyük şirkətlərlə əlaqə yaratmaq və onlarla korporativ əməkdaşlıqlara başlamaqdır.

Bunlarla yanaşı, motivasiya dolu məqalələr yazmaqda, öz aktiv həyat tərzimi nümayiş etdirmək üçün videolar çəkməkdə, və istifadə etdiyim bütün yolları insanlara nümunə göstərməkdə davam edirəm.

Çox işləmək mənim üçün problem deyil. Böyük arzularım var, və o arzulara doğru gedən yolda bütün pozitiv enerjiləri qəbul edirəm. Bununla belə, qısa zamanda yüksək mövqelərə qalxmağı arzulayıram!

Son olaraq,

Qeyd edim ki, 16.11.2019 tarixindən bəri evliyəm. Bir qızım var. Və, öz həyatımdan ilhamlanıb yazmış olduğum “Xəyalpərəst” adlı gözəl bir romanım var. Bu roman, mənim iki yüz il sonraya hədiyyəmdir.

Eyni zamanda, son zamanlar qloballaşan dünyada sərmaye sahiblərinin dünyanı insanlara dar etmək məqsədilə qurduğu bütün planları ifşa etmək üçün araşdırmalarımı davam etdirməkdə və bunu ayrı-ayrı məqalələr şəklində paylaşmaqdayam.

“Covid-19” və insanların inanmağa başladığı digər ispatlanmamış mövzular ilə bağlı gerçəkləri söyləmək, insanları bu yuxudan oyatmaq üçün əlimdən gələni etməyə hər zaman davam edəcəm.

Yazdığım məqalələr insanları oyandırmaq üçün yetərli deyilsə, edə biləcəyim bir şey də yoxdur deməkdir.

Bütün dünyayı qurtara bilmərəm. Mən Peyğəmbər deyiləm.

Öz ailəmi qurtarım, yetər!