Ənvər Həmidov (şair)

Ənvər Həmidoviç Həmidov(kumukca: Анвар Гамидович Гамидов; 21 yanvar 1924, Aşağı Kazaniş, Dağıstan MSSR – 9 noyabr 2000) — kumuk şairi, tərcüməçi və pedaqoqu

Ənvər Həmidoviç Həmidov
Təxəllüsləri	Ənvər Həmidov
Doğum tarixi	21 yanvar 1924
Doğum yeri	Teben Kazaniş kəndi, Buynaksk rayonu, Dağıstan ASSR
Vəfat tarixi	9 noyabr 2000 (76 yaşında)
Vətəndaşlığı	SSSR, Rusiya
Milliyyəti	kumuk türkü
Təhsili	Çeçen-İnquş Dövlət Universiteti
Fəaliyyəti	şair, publisist, tərcüməçi, pedaqoq
Fəaliyyət illəri	1944-2000
Əsərlərinin dili	kumukca
Janrlar	poeziya, tərcümə

Həyatı

Ənvər Həmidoviç Həmidov Dağıstan MSSR-in Buynaksk rayonunun Teben Kazaniş kəndində varlı mülkədar ailəsində anadan olmuşdur. Atası Həmid Həmidov xalq arasında Bəy Həmid adı ilə tanınmışdır. Anası Pasihat Yəhyayevanın onun kiçik yaşlarından xalq ədəbiyyatına bağlanmasında böyük rolu olmuşdur. Böyük qardaşı Hacı Həmidov İkinci Dünya müharibəsində Leninqradın mühasirəsi zamanı həlak olmuşdur.

Orta məktəbi doğulduğu kənddə oxumuş, daha sonra Çeçen-İnquş Dövlət Universitetinin tarix fakültəsini bitirmişdir. Universiteti bitirdikdən sonra müxtəlif dövrlərdə Teben Kazaniş kəndində direktor müavini, Buynaksk rayon maarif şöbəsinin müdiri, Apşin rayonu icra hakimiyyətinin müavini vəzifələrində işləmişdir. 1967–1971-ci illərdə Çeçen-İnquş MSSR-nin Malgobek rayonunun Psedax orta məktəbinin direktor müavini vəzifəsində çalışmışdır. Ömrünün son illərində rayon Ağsaqqallar Şurasının üzvü kimi fəaliyyət göstərmişdir. O, "Tenqlik" adlanan kumuk xalq hərəkatının təşkilatçılarından biri və rəhbəri olmuşdur. Şahidlərin bildirdiyinə görə, Ənvər Həmidovun xalq qarşısında alovlu çıxışları izdihamı coşdurmuş, "Ullubəy Buynakski dirildi" deyə ona yüksək dəyər vermişlər.

Yaradıcılığı

Ənvər Həmidov əsas etibarilə poeziya və tərcümə yaradıcılığı ilə məşğul olmuşdur. O, görkəmli rus şairi A. S. Puşkinin "Yevgeni Onegin" mənzum poemasını (İbrahim Bammatuli ilə) və yazıçı M. Qorkinin "Ana" romanını (M. Makaşaripovla) kumuk dilinə tərcümə etmişdir. Kumuk dilində yazdığı şeirlərindən ibarət müxtəlif kitabları nəşr olunmuşdur. Həmçinin şeirlərinin bir qismi antologiyalara daxil edilərək yayınlanmışdır. Yaradıcılıq uğurlarına görə onun bioqrafiyası Türkiyənin bəzi ensiklopediyalarına daxil edilmişdir.

Kitabları

• "Къарангылыкъ къачды бизден" (kumukca)
• "Яшлагъя" (kumukca)