Anar Şuşalı (Hüseynli)

Hüseynli Anar Vaqif oğlu (Anar Şuşalı) — opera müğənnisi, Azərbaycan Respublikasının Əməkdar artisti (2008).

Anar Şuşalı
Anar Vaqif oğlu Hüseynli
Sənətçi məlumatları
Doğum tarixi 12 iyul 1978(1978-07-12) (42 yaş)
Doğum yeri Şuşa, Azərbaycan SSR, SSRİ
Vətəndaşlığı SSRİ SSRİ
Azərbaycan Azərbaycan
Təhsili Üzeyir Hacıbəyov adına Bakı Musiqi Akademiyası

HəyatıRedaktə

Anar Şuşalı 12 iyul 1978-ci ildə Şuşa şəhərində anadan olmuşdur. 1984-cü ildə Şuşa şəhər 1 saylı orta məktəbə, 1989-cu ildə isə Şuşa musiqi məktəbinin tar sinfinə daxil olmuşdur. 1992-ci ilin may ayında Şuşa şəhərinin ermənilər tərəfindən işğalı ilə əlaqədar məcburi köçkün kimi Bakı şəhərində məskunlaşmışdır. 1994-cü ildə Bakı şəhərindəki 36 saylı musiqi məktəbinin tar sinfini, 1995-ci ildə isə Bakı şəhərindəki 13 saylı Şuşa orta məktəbini bitirmişdir. Həmin ildə Üzeyir Hacıbəyov adına Bakı Musiqi Akademiyasının solo oxuma fakültəsinə daxil olmuşdur. 1999-cu ildə Bakı Musiqi Akademiyasını solo oxuma ixtisası üzrə bakalavr dərəcəsini, 2001-ci ildə vokal ixtisası üzrə magistr dərəcəsini, 2003-cü ildə isə həmin ixtisas üzrə aspirantura dərəcəsini bitirmişdir. Bu müddət ərzində bir çox incəsənət xadimlərinin yubiley konsertlərində, Azərbaycan Respublikası Mədəniyyət Nazirliyi tərəfindən təşkil olunmuş dövlət konsertlərində və müxtəlif tədbirlərdə dəfələrlə çıxışlar etmişdir. Bir sıra xarici ölkədə - Yaponiya, Fransa, Türkiyə, Rusiya, İran, Ukrayna, Pakistan, Misir, Türkmənistan, Tacikistan, Qırğızıstan və Küveytdə Azərbaycan mədəniyyətini uğurla təmsil etmişdir. 2008-ci ilin sentyabr ayında vokal səhnəsində yaradıcılığını yüksək qiymətləndirən Azərbaycan prezidenti İlham Əliyevin sərəncamı ilə Azərbaycan Respublikasının əməkdar artisti fəxri adına layiq görülmüşdür. 2009-cu ildə Azərbaycan bəstəkarı, Azərbaycan peşəkar musiqisinin banisi Üzeyir bəy Hacıbəyovun yeni quruluşda səhnələşdirilmiş "Arşın mal alan" operettasında baş rol olan Əsgər rolunu ilk dəfə rus və Azərbaycan dillərində böyük uğurla ifa etmişdir. Tamaşanın rus dilində ilk premyerası 11 oktyabr 2009-cu ildə olmuşdur. 2010-cu ilin may ayında isə Prezident mükafatçısı adına layiq görülmüşdür.

Hərbi xidmətdə olub, ailəlidir, 3 övladı var.