Anar Xəlilov

Anar Xəlilov — Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının üzvü, Sağlam İnkişaf və Maarifləndirmə İctimai Birliyinin sədri.

Anar Xəlilov
Anar Əhməd oğlu Xəlilov
Doğum tarixi	17 iyun 1977
Doğum yeri	Şuşa, Azərbaycan SSR, SSRİ
Vətəndaşlığı	SSRİ→ Azərbaycan
Milliyyəti	azərbaycanlı
İxtisası	İstehsalın iqtisadiyyatı və idarə edilməsi
Təhsili	Azərbaycan Dövlət İqtisad Universiteti Bruno Texniki Universiteti (magistratura) Azərbaycan Respublikasının Prezidenti yanında Dövlət İdarəçilik Akademiyası Azərbaycan Dövlət İqtisad Universiteti(magistratura)

Həyat və yaradıcılığı

Anar Xəlilov 17 iyun 1977-ci ildə Şuşa şəhərində anadan olub. 1982–1993-cü illərdə 1 saylı Şuşa şəhər məktəbində oxumuşdur. 1993–1998-ci illərdə Azərbaycan Dövlət İqtisad Universitetini İstehsalın iqtisadiyyatı və idarə edilməsi ixtisası üzrə bitirmişdir. 1994–1998-ci illərdə Bakı Şəhər Təmir Tikinti Quraşdırma idarəsində müxtəlif vəzifələrdə çalışmışdır. 1998–1999-cu illərdə Moskva şəhərində kiçik biznes fəaliyyəti ilə məşğul olmuşdur.

2000–2001-ci illərdə Çexiya Respublikasının Bruno Texniki Universitetində MBA Proqramı üzrə magistratura təhsili almışdır. 2001-ci ildə Kiçik Həcmli Gəmilərin Dövlət Müfəttişliyində müfəttiş vəzifəsində çalışmışdır. 2002–2004-cü illərdə Azərbaycan Respublikası Dövlət Statistika Komitəsinin Şuşa Rayon Statistika İdarəsində aparıcı iqtisadçı və rəis müavini işləmişdir. 2008-ci ildən həmin müəssisənin rəisidir. 2005-ci ildə Azərbaycan Respublikasının Prezidenti yanında Dövlət İdarəçilik Akademiyasında dövlət gənclər siyasəti üzrə ixtisasartırma kurslarını bitirmişdir.

2008-ci ildə Azərbaycan Dövlət İqtisad Universitetinin MBA Proqramı üzrə magistraturasına daxil olmuş, 2010-cu ildə magistraturanı menecment ixtisası üzrə fərqlənmə diplomu ilə bitirmişdir. 2005-cı ildən Yeni Azərbaycan Partiyasının üzvüdür. 2006–2010-cu illərdə Yeni Azərbaycan Partiyası Şuşa rayon təşkilatı gənclər birliyinin sədri olmuşdur. 2005-ci ildə Şuşa rayonunda ictimai əsaslarla yaradılmış Sağlam İnkişaf və Maarifləndirmə İctimai Birliyinin sədridir. 40-a yaxın layihənin rəhbəri olmuşdur.

16 mart 2016-ci ildə Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurası üzvlüyünə "Səhiyyə, sağlamlıq və ekologiya" qrupu üzrə seçkidə birinci yerə çıxmışdır. Azərbaycan Respublikası Prezidentinin 2016-cı il 20 aprel tarixli Sərəncamı ilə Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının üzvü təyin edilmişdir.

Müxtəlif xarici ölkələrdə 15-ə yaxın Beynəlxalq tədbirlərdə iştirak etmişdir. www.yknews.az saytının yaradıcısıdır. Sayt məcburi köçkün gənclərin Qarabağ müharibəsinə dair maarifləndirilməsinə xidmət edir.

Ailəsi

Ailəlidir, 2 övladı var.

Əsərləri

• "Qarabağ abidələri" (ingilis-rus dilində),
• "Qarbağ yaddaş",
• "Qarabağın xristian abidələri" (ingilis dilində) kitablarının müəllifi.

Sənədli filmləri

Sənədli filmlərin ssenari müəlifi və yaradıcısı olmuşdur.

• "Qafqazın konservatoriyası",
• "Qarabağ mədəniyyəti" (ingilis dilində),
• "İşğal olunmuş istedadlar məskəni" (ingilis-rus dilində) "Qarabağ təbiəti" (rus dilində),
• "Qarabağ müharibəsi-xronika" (rus dilində),
• "Qarabağ tarixi" (rus dilində).

Təltifləri

Azərbaycan Respublikasının Prezidentinin 2019-cu il 27 may tarixli 1205 nömrəli Sərəncamı ilə "Azərbaycan Xalq Cümhuriyyətinin 100 illiyi (1918–2018) yubiley medalı ilə təltif edilmişdir. Fəaliyyəti ilə bağlı 30-a yaxın dövlət, özəl, ictimai qurumlar tərəfindən diplomlara layiq görülmüşdür.