Asiya-Sakit Okean Texnologiya və İnnovasiya Universiteti

Asiya-Sakit Okean Texnologiya və İnnovasiya Universiteti — Malayziyada universitet; biznes işində, həm də cəmiyyətin qurulmasında effektiv rol oynayan yüksək ixtisaslı məzunların hazırlığında texnologiyalar, innovasiyalar və yaradıcılığın unikal uyğunluğunun birləşdirilməsini rəhbər tutan ali təhsil ocaqlarındandır.

Asiya-Sakit Okean Texnologiya və İnnovasiya Universiteti
3°02′53″ şm. e. 101°41′33″ ş. u.
Əsası qoyulub	1993
Tip	özəl universitet
Ölkə	Malayziya
Ünvan	Malayziya, Kuala-Lumpur şəhəri
Sayt	ucti.edu.my
Vikianbarda əlaqəli mediafayllar

Tarixi və fəaliyyəti

Ali məktəb 1993-cü ildə Asiya-Sakit Okean İnformasiya Texnologiyaları İnstitutu olaraq Malayziyada fəaliyyətə başlayıb, 2004-cü ildən universitet statusu əldə edərək Asiya-Sakit Okean Texnologiya və İnnovasiya Universiteti adlandırılıb. Universitetin əsas hədəfi – yeni və daha effektiv düşüncə tərzlərindən istifadə edərək tələbələri oxumağa, əhatə edən şəraitə uyğunlaşmağa və başqa cür düşünməyə hazırlamaq məqsədilə şəxsi təhsil proqramları vasitəsilə innovasiyaları öyrətməkdən ibarətdir.

Nailiyyətlər və müxtəlif milli və regional yarışlarda universitetin qələbələri ali təhsil, o cümlədən innovasiya tədqiqatları sahəsindəki mükəmməlliyi təsdiq edir. Bütün tədris proqramları Malayziyanın Təhsil Nazirliyi tərəfindən təsdiq edilib və Malayziya İxtisas Agentliyi tərəfindən təyin edilib.

Kampus sistemi

Asiya-Sakit Okean Texnologiya və İnnovasiya Universiteti Malayziyanın paytaxtı Kuala-Lumpur şəhərində, Texnologiya parkında yerləşdirilib. Şəhər Malakka yarımadasının cənub-qərbində, Klanq və Qombak çaylarının kəsişdiyi yerdə yerləşir. Ölkənin əhəmiyyətli ticarət-sənaye və maliyyə mərkəzidir. Belə ki, şəhərdə və onun ətrafında kauçuk emalı, palma yağının və digər qida məhsullarının istehsalı, avtomobillərin quraşdırılması, o cümlədən elektrotexnika və elektron məmulatların və s. istehsalı həyata keçirilir. Şəhərin xüsusilə tələbələr üçün çox əlverişli olan, ucuz və rahat hərəkət təklif edən effektiv ictimai nəqliyyat şəbəkəsi var. O, avtobuslardan, yerüstü metrodan və monorelsdən ibarətdir.

Ali məktəbin həmçinin Şri-Lankada, Hindistanda və Pakistanda kampusları inşa edilib.

Universitetin yataqxanası 3 tikilidən — Vista Komanwel, Fortune Park and Savanna Condominiums ibarətdir. Yataqxana tələbələrin rahatlığının təminatı baxımından bütün yaşayış vasitələri ilə tamamilə təchiz edilib. Yataqxanada hovuz, camaşırxana, kafelər, 24 saat fəaliyyət göstərən mağazalar və s. mövcuddur.

Tələbələr üçün icarə haqqı mənzilin və təklif edilən xidmətlərin həcmindən asılı olaraq 103 ABŞ dollarından 382 ABŞ dollarınadək dəyişir. Xarici ölkələrdən olan tələbələr tələbə yataqxanasında və ya universitet şəhərciyinin yanında özəl sektorda qala bilərlər.

Onu da qeyd etmək lazımdır ki, yataqxananın bütün ərazisi WiFi simsiz internet şəbəkəsi ilə əhatə olunub. Belə ki, tələbələr sutka ərzində yüksək sürətli internet xidmətindən fasiləsiz istifadə edə bilirlər.

Təhsil strukturu

Universitetə qəbul olunmaq üçün ingilis dili biliyi xüsusi rol oynayır. Ali məktəb ingilis dilinin intensiv öyrənilməsi (Intensive English Programme) proqramını təqdim edir. Proqram ingilis dilinin intensiv və ətraflı öyrənilməsi üçün nəzərdə tutulub. Proqramın mənimsənilməsi akademik proqramların öyrənilməsi üçün universitetə daxil olmağa imkan yaradır. Proqram 7 səviyyəni əhatə edir, hər səviyyə 4 həftə davam edir. Proqram tələbə tərəfindən IELTS 6.0 səviyyəsinin nailiyyətinə hesablanıb.

Universitet texnologiyalarla bağlı ixsisaslarının geniş spektrini təklif edir:

İnformasiya Texnologiyaları fakültəsində informasiya texnologiyaları, informasiya sistemləri, təhlükəsizlik üzrə informasiya texnologiyaları, şəbəkə hesablamaları, mobil texnologiyalar, analitik məlumatların işlənməsi, korporativ hesablamalar, biznes sahəsində informasiya texnologiyaları, məlumatların hesablama emalı, internet texnologiyalar, elektron ticarət texnologiyası, multimedia texnologiyası ixtisaslarının tədrisi həyata keçirilir.

Biznes fakültəsi biznesin idarə edilməsi, elektron biznes sahəsində idarəetmə, biznesin beynəlxalq idarəetməsi, turizm sahəsində idarəçilik, mühasibat və maliyyə, xidmət sahəsində idarə etmə, marketinq və media marketinq bölmələrini əhatə edir.

Media və veb texnologiyalar fakültəsinə kompüter oyunlarının hazırlanması, multimedia texnologiyaları, veb-media texnologiyaları, media informatika kafedraları daxildir.

Mühəndislik fakültəsində tələbələrin elektrotexnika və elektron mühəndislik, informasiya texnologiyaları üzrə elektron mühəndislik, telekommunikasiya texnologiyaları, mexatron mühəndislik ixtisasları tədris olunur.

Magistratura təhsil pilləsi üzrə texnologiyaların idarə edilməsi, proqram mühəndisliyi, mobil kompüter sistemləri, hesablama texnikası, MBA və İT ixtisasları təqdim edilir. Təhsil haqqı bakalavriatura pilləsi üzrə təqribən 6000 ABŞ dolları, magistratura üzrə isə 11000 dollar təşkil edir.

İllik təhsil haqqından əlavə, daxil olma haqqı, qeyd ödəməsi, kitabxana tərəfindən istifadə, icazə vərəqəsi üçün ödənişlər, tibbi sığorta, tələbə vizasının yenilənməsi, Staffordşir Universiteti imtahanları üçün ödəmələr mövcuddur.

Beynəlxalq əlaqələri

Universitet informasiya texnologiyaları sahəsində Microsoft, Rational Rose, Prometric, EC_Council, eAct Technologies və EPSON kimi İT üzrə aparıcı dünya şirkətləri ilə geniş əlaqələrə malikdir.

Ali təhsil ocağı bir sıra xarici universitetlərlə əməkdaşlıq edir, tələbələrə akademik proqramların və tədqiqatların seçiminin yüksək spektrini təmin edir və xarici universitetdə qalan modulları bitirməyə imkan verir. Sözügedən universitetin diplomları Böyük Britaniyanın və Avstraliyanın aparıcı universitetləri tərəfindən tanınır. Son statistik göstəricilərə əsasən, bu ali məktəbin məzunlarının əksəriyyəti 6 ay ərzində iş tapa bilirlər. Bu fakt universitetdə müasir təhsil texnologiyalarının inkişaf etdirildiyini, kadrların peşəkar səviyyədə hazırlanmasının tədris prosesində prioritet olduğunu bir daha sübut edir.

Ali məktəbin bütün proqramları Staffordşir Universitetinin keyfiyyət zəmanətinə malikdir. Universiteti bakalavriatura və magistratura təhsil pillələri üzrə bitirən bütün tələbələr korporativ sistemlər, informasiyanın idarə edilməsi, biznes prosesləri və informasiya sistemləri üzrə magistr ixtisas istiqamətləri istisna olmaqla Asiya-Sakit Okean Texnologiya və İnnovasiya Universiteti ilə yanaşı Staffordşir Universitetinin sertifikatlarını əldə edirlər. Staffordşir Universiteti ilə möhkəm münasibətlər Malayziyada ən güclü və müvəffəqiyyətli xarici əməkdaşlıqlardan biridir.

Hazırda universitetdə 80-dən artıq ölkədən (Çin, İndoneziya, Sinqapur, Tayvan, Vyetnam, Tayland, Hindistan, Pakistan, Keniya, Konqo, Yəmən, Səudiyyə Ərəbistanı, Qazaxıstan və s.) tələbələr təhsil alırlar. Ali məktəb texnologiyalar sahəsində 14000-dən çox yüksək ixtisaslaşdırılmış mütəxəssis hazırlaması ilə yüksək səviyyəli universitet reputasiyası qazanıb.

Mənbə

• Cahangir Atakişiyev. "Rabitə dünyası" qəzeti. (az.)