Fərid Qayıbov

Azərbaycan Respublikasının gənclər və idman naziri

Fərid Fazil oğlu Qayıbov (24 aprel 1979, Bakı) — Azərbaycanın gənclər və idman naziri (2021–indi).[1] Azərbaycan Milli Olimpiya Komitəsinin Vitse-prezidenti (2021). Avropa Gimnastika İttifaqının (ing. UEG) prezidenti (2018). UNESCO-nun Bədən Tərbiyəsi və İdman üzrə Hökumətlərarası Komitəsinin sədri (2022).

Fərid Qayıbov
Farid Gayibov 3.jpg
bayraqAzərbaycanın gənclər və idman naziribayraq
Vəzifədədir
7 sentyabr 2021-ci ildən
Sələfi Azad Rəhimov
bayraqAvropa Gimnastika İttifaqının (UEG) prezidentibayraq
2 dekabr 2017 — indi
Şəxsi məlumatlar
Doğum tarixi 24 aprel 1979(1979-04-24) (43 yaş)
Doğum yeri
Təhsili

Təltifləri Azərbaycan Respublikası Prezidentinin fəxri diplomu
Vikianbarın loqosu Vikianbarda əlaqəli mediafayllar

HəyatıRedaktə

Fərid Qayıbov 24 aprel 1979-cu ildə Bakı şəhərində anadan olmuşdur.

AiləsiRedaktə

Evlidir, iki oğlu, bir qızı var.

TəhsiliRedaktə

Fərid Qayıbov 1995-сi ildə Bakı şəhəri 1 saylı orta ümumtəhsil məktəbini bitirmişdir. Həmin il Azərbaycan Respublikası Nazirlər Kabineti nəzdində Azərbaycan Xalq Təsərrüfatını İdarəetmə İnstitutunun Biznesin təşkili və idarə edilməsi fakültəsinə qəbul olmuşdur. 1999-cu ildə Biznesin idarə edilməsi üzrə bakalavr, 2001-ci ildə isə magistr dərəcəsini əldə etmişdir.

Elmi fəaliyyətiRedaktə

2014-cü ildə P.F.Lesqaft adına Milli Dövlət Bədən Tərbiyəsi, İdman və Sağlamlıq Universitetində (Sankt-Peterburq, Rusiya) pedaqoji elmlər namizədi dərəcəsini əldə etmişdir.

Neft sahəsində fəaliyyətiRedaktə

2000-ci ildən 2001-ci ilə kimi Azərbaycan Respublikası Dövlət Neft Şirkətinin (ARDNŞ) "Balaxanıneft" Neft-qaz Hasilatı İdarəsinin anbarında işləmişdir.

2001–2003-cü illərdə ARDNŞ-nin "Balaxanıneft" Neft-qaz Hasilatı İdarəsinin Planlaşdırma şöbəsində iqtisadçı vəzifəsində çalışmışdır.

İdman sahəsində fəaliyyətiRedaktə

2003–2005-ci illərdə Azərbaycan Gimnastika Federasiyasının (AGF) İdman və logistika üzrə meneceri kimi fəaliyyət göstərmişdir.

Bu illər ərzində Bakıda bədii gimnastika üzrə keçirilən 3 Dünya Kuboku (2003/04/05-ci illərdə) və 27-ci Dünya Çempionatının (2005) Yerli Təşkilat Komitələrinin işində, o cümlədən Bakıda idman gimnastikası üzrə Beynəlxalq Hakimlik kursunun (2007-ci il) təşkilində fəal iştirak etmişdir.

2005-сi ildən 2006-cı ilə kimi AGF-nin Baş meneceri vəzifəsində çalışmışdır.

2006-cı ildə AGF-nin növbəti hesabat-seçki konfransında federasiyanın Baş katibi seçilmişdir.[2]

2006–2007, 2008–2009 və 2013–2014-cü illərdə bədii gimnastika üzrə Bakıda keçirilən 3 Avropa Çempionatı (2007, 2009, 2014) üzrə Yerli Təşkilat Komitələrinin icraçı direktoru vəzifəsini daşımışdır.

2008-ci ildə Beynəlxalq Gimnastika Federasiyasının (FIG) 77-ci Konqresində (17–19 oktyabr, Helsinki, Finlandiya) həmin qurumun Şura üzvü seçilmişdir (2008–2012-ci Olimpiya dövrü üzrə).[3]

2010-cu il 25 dekabr tarixində AGF-nin İcra Komitəsinin iclasında Baş katib vəzifəsinə yenidən seçilmişdir.

2012-ci ildə FIG-nin 79-cu Konqresində (25–27 oktyabr, Kankun, Meksika) yenidən həmin qurumun Şura üzvü seçilmişdir.[4]

2013-cü ildə Portoroj şəhərində (6–7 dekabr, Sloveniya) keçirilən Avropa Gimnastika İttifaqının 25-ci Konqresində həmin təşkilatın Vitse-prezidenti vəzifəsinə seçilmişdir. Bununla əlaqədar olaraq FIG-nin Şura üzvlüyündən imtina etmişdir.[5]

2013-2021-ci illərdə Milli Olimpiya Komitəsinin (MOK) üzvü olmuşdur.

2013 və 2014-cü illərdə FIG Akademiyasının 1 (2013) və 2-ci (2014) dərəcələrinə aid bədii gimnastika üzrə məşqçilik kurslarının təşkilatçısı olmuşdur.

2014–2015-ci illərdə İlk Avropa Oyunlarına (Bakı-2015) test turniri xarakteri daşıyan 6 gimnastika növü üzrə Birgə Açıq Azərbaycan Çempionatının (2015) Yerli Təşkilat Komitəsində İcraçı Direktor vəzifəsini daşımışdır.[6]

2014–2015-ci illərdə I Avropa Oyunları (Bakı-2015) çərçivəsində gimnastika növləri üzrə təşkil olunan yarışlarda məsləhətçi kimi fəaliyyət göstərmişdir.

2015-ci il 24 dekabr tarixində AGF-nin İcra Komitəsinin iclasında Baş katib vəzifəsinə yenidən seçilmişdir.

2015–2016-cı illərdə Bakıda 2016 və 2017-ci illərdə təşkil olunmuş İdman Gimnastikası üzrə FIG Dünya Kuboku (AGF Trophy, 2016-cı ildə "Challenge" seriyasına aid), Bədii Gimnastika üzrə FIG Dünya Kuboku (AGF Trophy) və Batut Gimnastikası üzrə FIG Dünya Kubokunun (AGF Trophy) Yerli Təşkilat Komitələrində icraçı direktor vəzifəsini daşımışdır.

2016–2017-ci illərdə Bakıda FIG-nin Bədii Gimnastika üzrə Qitələrarası Hakimlik və Beynəlxalq Hakimlik Kursları, Kişi İdman Gimnastikası üzrə Beynəlxalq Hakimlik Kursları (2017), FIG Şurası (2017), 4-cü İslam Həmrəyliyi Oyunları (2017) çərçivəsində gimnastika yarışlarının yerli Təşkilat Komitələrində icraçı direktor vəzifəsini daşımışdır.

2003-cü ildən etibarən bədii gimnastika, kişi idman gimnastikası, tamblinq və akrobatika gimnastikası üzrə, 2013-cü ildən isə qadın idman gimnastikası, batut gimnastikası və aerobika gimnastikası üzrə idman yarışlarının həm yerli, həm də beynəlxalq səviyyədə keçirilməsində böyük təcrübəyə malikdir.

Avropa Gimnastika İttifaqı və FIG Konqreslərinin iştirakçısı; Olimpiya Oyunlarının (Pekin-2008, London-2012 və Rio-2016) nümayəndə heyətinin üzvü, müxtəlif gimnastika növləri üzrə Avropa və Dünya Çempionatlarının nümayəndə heyətlərinin başçısı, 2014-cü ildən, 2017-ci ilə qədər gimnastika növləri üzrə Avropa Çempionatlarında Apelyasiya Hakimlər Briqadasının Prezidenti olmuşdur (təyinata əsasən).

2017-ci il 1–2 dekabr tarixlərində Xorvatiyanın Split şəhərində Avropa Gimnastika İttifaqının (UEG) 27-ci hesabat-seçki xarakterli Konqresində bu qurumun prezidenti seçilmiş və prezident seçilməsi ilə əlaqədar, federasiyanın Baş katibi vəzifəsindən istefa vermişdir.

2018-ci ildən UEG-də (2020-ci ilin 1 aprel tarixindən Avropa Gimnastikası adlanır) prezident səlahiyyətlərini icra edir və avtomatik olaraq Beynəlxalq Gimnastika Federasiyasının İcra Komitəsinin üzvüdür.

Avropa Gimnastikasının Prezidenti kimi həmin qurumun Prezident Şurası, İcra Komitəsi və Ümumi Yığıncağına sədrlik edir, Avropa Gimnastikasını Beynəlxalq Gimnastika Federasiyasının İcra Komitəsində təmsil edir.

Beynəlxalq Gimnastikas Federasiyası İcra Komitəsinin üzvü kimi Tokio-2020 Olimpiya Oyunları çərçivəsində gimnastika növləri üzrə yarışlarda Apellyasiya Hakimlər Briqadasının üzvü olmuşdur.

2021-ci ilin sentyabr ayında ölkə prezidenti İlham Əliyevin imzaladığı sərəncama əsasən Azərbaycan Respublikasının gənclər və idman naziri təyin olunmuşdur.

2021-ci ildə Azərbaycan Respublikası Milli Olimpiya Komitəsinin VIII hesabat-seçki Baş Məclisində həmin quruma Vitse-prezident seçilmişdir.

2022-ci ildə UNESCO-nun baş qərargahında Bədən Tərbiyəsi və İdman üzrə Hökumətlərarası Komitəsinin fövqəladə iclasında həmin qurumun sədri seçilmişdir.

Qayıbov Dünya Etnoidman Konfederasiyası və Azərbaycan Respublikası Gənclər və İdman Nazirliyinin birgə təşkilatçılığı ilə Bakıda (5 və 6 mart 2022-ci il) “Ənənəvi idman növlərinin dirçəlişi” şüarı altında keçirilən 5-ci Etnoidman Forumunda iştirak edib.

O, Bakıda keçirilən İslam Əməkdaşlıq Təşkilatı Gənclər və İdman Nazirlərinin Daimi Şurasının 3-cü sessiyasına sədrlik edib (23 iyun 2022-ci il).

Qayıbov Azərbaycan Respublikası Gənclər və İdman Nazirliyinin dəstəyi ilə Bakıda keçirilən (25-29 iyul 2022-ci il) Qoşulmama Hərəkatının Gənclər Sammitində iştirak edib.

Mühazirəçi fəaliyyətiRedaktə

  • 2019-cu ilin mart – may aylarında Azərbaycan Dövlət Bədən Tərbiyəsi və İdman Akademiyasında "İdmanın Beynəlxalq İdarəetmə Sistemi və Olimpiya Hərəkatı" fənni üzrə mühazirə deyib.
  • 2020-ci ilin sentyabr – oktyabr aylarında Azərbaycan Dövlət Bədən Tərbiyəsi və İdman Akademiyasında İdman Menecmenti fakültəsinin magistr dərəcəsi üzrə tələbələrinə tədqiqat, kommunikasiya və innovasiya üzrə təcrübə modulunu tədris edib.

Təltif və mükafatlarıRedaktə

2016-cı ildə FIG-nin 81-ci Konqressində (Tokio, Yaponiya) həmin qurumun şurasına iki dəfə (2008 və 2012) üzv seçildiyi üçün FIG-nin bürünc medalına layiq görülmüşdür.

2017-ci ildə Bakıda keçirilmiş FIG-nin 17-ci Şura iclasında həmin qurum tərəfindən "Fəaliyyətin qiymətləndirilməsi" medalı ilə təltif olunmuşdur.

2017-ci ilin dekabrın 18-də Azərbaycan Respublikasının Prezidenti İlham Əliyevin sərəncamına əsasən ölkəmizdə idmanın inkişafında göstərdiyi xidmətlərə görə "Azərbaycan Respublikası Prezidentinin fəxri diplomu" ilə təltif olunub.[7]

İstinadlarRedaktə

  1. "Fərid Qayıbov gənclər və idman naziri təyin edilib". Report İnformasiya Agentliyi (az.). İstifadə tarixi: 7 sentyabr 2021.
  2. "Azərbaycan Gimnastika Federasiyasının baş katibi Avropa Gimnastika İttifaqının prezidenti seçilib" (az.). AzərTAc. 2017-12-02. 2018-07-04 tarixində arxivləşdirilib. İstifadə tarixi: 2018-07-04.
  3. "AZƏRBAYCAN GİMNASTİKA FEDERASİYASININ BAŞ KATİBİ BEYNƏLXALQ FEDERASİYA ŞURASININ ÜZVÜ SEÇİLMİŞDİR" (az.). AzərTAc. 2008-10-20. 2018-09-20 tarixində arxivləşdirilib. İstifadə tarixi: 2018-09-20.
  4. "Azərbaycan Gimnastika Federasiyasının baş katibi Beynəlxalq Gimnastika Federasiyasının Şurasına yenidən üzv seçilmişdir" (az.). AzərTAc. 2012-10-29. 2018-09-25 tarixində orijinalından arxivləşdirilib. İstifadə tarixi: 2018-09-21.
  5. "Azərbaycan Gimnastika Federasiyasının baş katibi Avropa Gimnastika İttifaqının vitse-prezidenti seçilib" (az.). Trend İnformasiya Agentliyi. 2013-12-07. 2018-09-25 tarixində orijinalından arxivləşdirilib. İstifadə tarixi: 2018-09-21.
  6. Rövşən Əhlimanoğlu. "Fərid Qayıbov: "I Avropa Oyunlarını ölkəmizin idman tarixi üçün böyük nailiyyət və uğur hesab etmək olar"" (az.). Report İnformasiya Agentliyi. 2015-04-06. 2018-09-25 tarixində orijinalından arxivləşdirilib. İstifadə tarixi: 2018-09-21.
  7. "Azərbaycan Prezidenti: Fərid Qayıbovun Avropa Gimnastika İttifaqının prezidenti seçilməsi tarixi nəticədir" (az.). Trend İnformasiya Agentliyi. 2017-12-18. 2018-09-25 tarixində arxivləşdirilib. İstifadə tarixi: 2018-09-25.

Xarici keçidlərRedaktə