Fariz Əmirov

Əmirov Fariz Əli oğlu (d. 6 yanvar 1971, Biləv, Ordubad rayonu, Azərbaycan SSR) — Azərbaycan alimi, texnika elmləri doktoru, professor, əməkdar müəllim.

Fariz Əmirov (Fariz Əmirli)
Fariz Əli oğlu Əmirov
Doğum tarixi	6 yanvar 1971
Doğum yeri	Biləv, Ordubad rayonu Azərbaycan
Vətəndaşlığı	Azərbaycan
Atası	Əli
Milliyyəti	azərbaycanlı
Təhsili	Azərbaycan Dövlət Neft və Sənaye Universiteti

Həyatı

Fariz Əli oğlu Əmirov 6 yanvar 1971-ci ildə Naxçıvan MR, Ordubad rayonunun Biləv kəndində anadan olmuşdur. 1978-1988-ci illərdə Ordubad rayonu, Biləv kənd orta məktəbini fərqlənmə ilə bitirmiş və həmin ildə Azərbaycan Neft və Kimya İnstitutuna daxil olmuşdur. 1994-cü ildə ADNA-nı (Azərbaycan Dövlət Neft Akademiyası) bitirmişdir. 1994–1999-cu illər arası müxtəlif sahələrdə çalışmış və ölkəmizin inşaat sektorunda fəaliyyət göstərən bir neçə inşaat şirkətlərinin yaranması və uğurlu fəaliyyət göstərməsində öz köməyini əsirgəməmişdir.

1999-cu ildə ADNA-nın aspiranturasına qəbul olmuş, 2007-ci ildə texnika elmləri namizədi alimlik dərəcəsi adını almışdır. 2014-cü ildə doktorluq dissertasiyasını müdafiə edərək, texnika üzrə elmlər doktoru elmi dərəcəsi adı almışdır. Bu illər ərzində o, Moskva, Sankt-Peterburq, Kazan, Ankara, İstanbul, Alma-Ata, Riqa və Ərzurum universitetlərində elmi konfranslarda iştirak və çıxış etmişdir. Bir neçə qrant və elmi layihələrin qalibi olmuşdur. 2006-2016-cı illər arası ADNA-da fəaliyyət göstərən, Rusiyanın " LUKOİL " Neft şirkəti tərəfindən yaradılmış " Fiziki-kimyəvi analiz metodları " - mərkəzləşdirilmiş laboratoriyasının müdiri vəzifəsində çalışmışdır. 2016-cı il fevral ayının 3-dən ADNSU-nun "Üzvi maddələr və yüksəkmolekullu birləşmələrin texnologiyası" - kafedrasının müdiri vəzifəsində çalışır. Eyni zamanda Sabah qruplarında tədris aparır.

2010-cu ildə ADNA-nın 90 illik yubileyi ilə əlaqədar ölkə prezidenti cənab İlham Əliyevin sərəncamı ilə "Tərəqqi" - medalı ilə mükafatlandırılmışdır. 205-dən çox elmi əsər, məqalə, kitab və patentlərin müəllifidir.

31.12.2020 ci il tarixdə Azərbaycan Respublikasının Prezidenti Cənab İlham Əliyevin sərəncamına əsasən Azərbaycan Dövlət Neft və Sənaye Universitetinin 100 illiyi münasibətilə "Əməkdar Müəllim" fəxri adına layiq görülmüşdür. 08.05.2021 ci ildə "Azərbaycan Dövlət Neft və Sənaye Universitetinin 100 illiyi münasibətilə Azərbaycan Respublikasının Yubiley medalı" ilə təltif edilmişdir.

Ailəlidir, 2 övladı var.