IP-telefon

IP-telefon və ya VoIP telefon — uzaq məsafədə olan abunəçilərin səsli kommunikasiyası üçün telekommunikasiya cihazı. Səs ötürülməsi üçün bir vasitə olaraq, belə bir telefon IP-telefoniya provayderinin proksi serverinə, IP PBX və ya VoIP serverinə qoşulan IP şəbəkəsindən istifadə edir. Gedən zəng icra olunan zaman proksi server şəbəkədə yığılmış nömrəyə uyğun gələn digər oxşar serverləri tapır. Əgər zəng PSTN abunəçisinə ünvanlanıbsa, o zaman sorğu istənilən abunəçinin yerləşdiyi telefon şəbəkəsinin keçidi ilə inteqrasiya olunmuş proksi server tərəfindən qəbul edilir.

Ən sadə masaüstü IP-telefon "Avaya 4625SW IP"

IP-telefonların yaranması səsin IP şəbəkələri üzərindən ötürülməsi prosedurunu təsvir edən VoIP texnologiyasının yaranması və inkişafının nəticəsi idi.

İndiki dövrdə IP-telefoniya və IP-telefonlar tədricən ənənəvi telefoniyanı (PSTN) əvəz edir. Bu cür yerdəyişmə daha çox bazarın korporativ sektorunda, daha az dərəcədə isə istehlak bazarı sektorunda baş verir.

Qurğu

IP-telefon adi müasir telefona bənzəyir. Klassik IP-telefonda aşağıdakılar var:

• LCD-displey
• Telefon trubkası
• Tastatura, yəni yığma düymələri
• IP şəbəkəsinə qoşulmaq üçün konnektor
• Şəhər telefon şəbəkəsinə və ya PBX-nin FXS portuna qoşulmaq üçün ehtiyat FXO konnektoru (olmaya bilər)
• Qarnitura üçün mini-cek konnektoru

Seçimdən asılı olaraq, telefonlar simsiz qarnitura, həmçinin simsiz telefonları və digər oxşar xarici cihazları qoşmaq üçün "Bluetooth" funksiyasına malikdir.

Çox vaxt müasir VoIP telefonlarında RJ-45 konnektoru və inteqrasiya edilmiş şəbəkə sviçinə malik iki ethernet portu var.

Telefon elektrik enerjisi mənbəyi tələb edir. Bunun üçün cihazın imkanlarından və telefondan istifadə şərtlərindən asılı olaraq ayrıca enerji təchizatı və ya PoE funksiyası istifadə olunur.

Əlaqə

Əgər evdə IP-telefon istifadə olunursa, o, internetə qoşulur və bir və ya bir neçə IP-telefoniya provayderi ilə işləmək üçün konfiqurasiya edilir. Operatorlar öz saytlarında bütün lazımi parametrləri təmin edirlər.

IP-telefon şirkətin korporativ rabitə şəbəkəsində istifadə olunursa, o, lokal şəbəkəyə qoşulur və onun vasitəsilə IP PBX ilə qarşılıqlı əlaqə qurur.

Üstünlüklər

Korporativ sektorun ümumilikdə IP-texnologiyalara və xüsusilə IP-telefonlara keçidinin əsas səbəbləri bunlardır:

• Sadələşdirmə və xərclərin azaldılması. Bu zaman ofisin əlavə telefon şəbəkəsinin quraşdırılmasına və saxlanmasına ehtiyac yoxdur.
• Genişləndirilmiş kommunikasiya imkanları.