Kollegial Transfiqurasiya Kilsəsi (Qarvolin)

Kollegial Transfiqurasiya Kilsəsi (pol. Kolegiata Przemienienia Pańskiego) – Polşanın Qarvolin şəhərində yerləşən katolik kilsəsi. Neobarokko üslubunda tikilmişdir. 7 may 1962-ci ildə mədəni mülk statusu almışdır.

katolisizm
Kollegial Transfiqurasiya Kilsəsi
Kolegiata Przemienienia Pańskiego
Yerləşməsi
Ölkə	Polşa
Şəhər	Qarvolin
Memarlıq
İnşa tarixi	16 sentyabr 1890 – 1894
Üslubu	neobarokko
Materialı	kərpic
Vikianbarda əlaqəli mediafayllar

Tarixi

1825-ci ilə qədər kilsənin yerində taxtadan tikilmiş başqa bir kilsə fəaliyyət göstərmişdir. 12 mart 1825-ci ildə baş vermiş yanğın nəticəsində taxta kilsə məhv olmuş və yeni kilsənin tikintisinə başlanmışdır. Tikinti işləri 1839-cu ilə kimi davam etmiş və prixodun tarixində ilk kərpic kilsə tikilmişdir. 20 oktyabr 1839-cu ildə kilsə ilk Müqəddəs Messa tədbiri keçirilmişdir. 29 noyabr 1840-cı ildə kilsəyə indiki adı – Transfiqurasiya kilsəsi adı verilmişdir.

Tikinti işlərindəki nöqsanlara görə kilsə binası tez-tez təmir işlərinə məruz qalmışdır. 1841, 1844, 1846, 1849 və 1850-ci illərdə kilsənin damında, 1847-ci ildə kilsənin döşəməsində təmir işləri aparılmışdır. 17 iyun 1849-cu ildə baş vermiş fırtına kilsənin damına və tavanına ziyan vurmuş, hətta damın çökmə təhlükəsi yaranmışdır. 1852-ci ildə Andrey Klinovski kilsənin interyerini müxtəlif xristian müqəddəslərinin təsvirləri ilə bəzətmişdir.

Çökmə təhlükəsi olduğu üçün kilsə 1890-cı ilin iyununda sökülmüş və yeni kilsə binasının tikintisinə başlanmışdır. 16 sentyabr 1890-cı ildə yeni kilsənin təməli atılmışdır. 1890–1894-cü illərdə aparılmış tikinti işləri zamanı köhnə zəng qülləsi də sökülmüşdür. 5 iyul 1900-cü ildə yepiskop Fransişek Yaçevski yeni kilsəni təqdis etmişdir. Yeni kilsənin tikintisi 78.000 rubla başa gəlmişdir.

XX–XXI əsrlər

Kilsə Birinci və İkinci dünya müharibələri zamanı dağıntılara məruz qalmışdır. 2 aprel 1918-ci ildə alman əsgərlər kilsənin orqanındakı boruları sökmüşdürlər. 9 sentyabr 1939-cu ildə şəhərdə baş vermiş yanğın kilsənin orqanı, tavanı, 16 yağlı boya əsəri, üç qülləsi yanğında məhv olmuşdur. 1940–1942-ci illərdə kilsədə bərpa işləri aparılmış, qüllələr bərpa olunmuş, yeni orqan quraşdırılmışdır.

1983-cü ildə kilsədə yenidənqurma işləri aparılmışdır. 1988-ci ilin iyununda kilsə qaz sistemi ilə təchiz edilmişdir. 31 oktyabr 1990-cı ildə kilsənin divarında 1919–1920-ci illərdə ölmüş bir sıra polyak əsgərlərin adlarını əks etdirən lövhə quraşdırılmışdır. 1992-ci ildə kilsədə növbəti bərpa işləri aparılmışdır. 2011-ci ilin iyul-avqust aylarında kilsədə yeni qranit döşəmə salınmışdır.

Qalereya

• 
  İnteryeri.
• 
  Tavanı.
• 
  Uzaqdan görünüşü.
• 
  Portal.
• 
  Rəsm əsəri.

Xarici keçidlər

• parafiagarwolin.pl — Rəsmi saytı