Məmmədəli Əsgərov

Məmmədəli Əsgərov (tam adı: Əsgərov Məmmədəli Səlimxan oğlu — tanınmış alim, pedaqogiji elmlər namizədi, Azərbaycan Dövlət Mədəniyyət və İncəsənət Universitetinin Səhnə danışığı kafedrasının professoru (1969-1974), Azərbaycan Yazıçılar İttifaqının üzvü

Məmmədəli Əsgərov
Əsgərov Məmmədəli Səlimxan oğlu
Vəfat tarixi	1991-ci il
Vətəndaşlığı	SSRİ↔ Azərbaycan
Milliyyəti	azərbaycanlı
Elmi dərəcəsi	filologiya üzrə fəlsəfə doktoru
Elmi adı	professor
İş yerləri	Azərbaycan Dövlət Mədəniyyət və İncəsənət Universiteti
Təhsili	Bakı Slavyan Universiteti Azərbaycan Dövlət Universiteti
Tanınır	ədəbiyyatşünas-alim, tənqidçi
Üzvlüyü	Azərbaycan Yazıçılar İttifaqı

Həyatı və təhsili

Məmmədəli Əsgərov 1921-ci il dekabr ayının 18-də Bakının Suraxanı kəndində neftçi ailəsində anadan olub. 1940-1943-cü illərdə M.F.Axundov adına Müəllimlər İnstitutunun (indiki Bakı Slavyan Universiteti) Ədəbiyyat fakültəsində təhsil alıb. Eyni zamanda, 1945-ci ildə Azərbaycan Dövlət Universiteti (indiki Bakı Dövlət Universiteti) Filologiya fakültəsinin qiyabi şöbəsini bitirib. İkinci dünya müharibəsi dövründə üç ay ön cəbhədə sıravi əsgər alman-faşist işğalçılarına qarşı vuruşub, ağır yaralandığına görə 1942-ci ildə ildə təxris olunub.

Fəaliyyəti

Məmmədəli Əsgərov 1943–1964-cü illərdə Bakıda 101 saylı orta məktəbdə Azərbaycan dili və ədəbiyyatı müəllimi kimi fəaliyyət göstərib.

1944–1964-ci illərdə "Azərbaycan gəncləri" qəzeti redaksiyasında Ədəbiyyat və incəsənət şöbəsinin müdiri işləyib.

1964–1969-cu illərdə Azərbaycan Müəllimləri Təkmilləşdirmə İnstitutunda Azərbaycan dili və ədəbiyyatı kabinetində metodist vəzifəsində çalışıb.

1969-1974-cü illərdə ADMİU-nun Səhnə danışığı kafedrasında baş müəllim, dosent, professor və kafedra müdiri kimi incəsənət sahəsində yüksəkixtisaslı kadr hazırlığına mühüm töhfələr verib.

Mükafatları

Tanınmış əruzşünas Məmmədəli Əsgərov maarifçilik sahəsində göstərdiyi xidmətlərinə görə 1972-ci ildə "Azərbaycan" Bilik cəmiyyəti tərəfindən Abbasqulu Ağa Bakıxanov adına fəxri diplomla təltif olunub.

Elmi-nəzəri yaradıcılığı

Məmmədəli Əsgərovun 1965-ci ildə "Füzulini məktəbdə necə tədris etməli" adlı metodik vəsaiti nəşr olunub. Bu nəşr, ikinci dəfə 2024-cü ildə latın qrafikası ilə yenidən ADMİU-nun mətbəəsi tərəfindən çap olunub. Müəllif, bu dəyərli tədqiqat əsərində Məhəmməd Füzulinin yaradıcılığının orta məktəblərdə tədrisi ilə əlaqədar məsələlərin qoyuluşu və həllində füzulişünaslıq elmimizin nailiyyətlərinə və respublikamızın məktəblərinin təcrübəsinə əsaslanmışdır. M.Füzulinin tədrisi respublikamızın məktəblərində başlıca yerlərdən birini tutduğuna görə kitabda şairin həyat və yaradıcılığını tədris etmək üçün müəllimə daha çox faktiki material əldə etməkdə və effektli metodlar tapmaqda kömək etmək məqsədi əsas götürülmüşdür. Füzulişünaslıq elminin şair haqqında irəli sürdüyü bir sıra məsələlərin çap olunduğu mənbələri özündə əks etdirən nəşrin sonunda xüsusi kitabiyyət hissəsi verilmişdir. Onun 200-ə yaxın elmi məqaləsi respublikanın nüfuzlu jurnallarında çap edilib. Professor Məmmədəli Əsgərov bir neçə dərsliyin, metodiki vəsaitin və tədris proqramının müəllifidir. Tənqidçi-alim Məmmədəli Əsgərov Əməkdar elm xadimi, filologiya elmləri doktoru, professor Qəzənfər Paşayevin tərtibi etdiyi Nəsiminin "İraq divanı"nın redaktoru olub, qəzəllərdə çətin anlaşılan beytlərin şərhini və lüğətini yazıb.

Həmçinin bax

Azərbaycan Dövlət Mədəniyyət və İncəsənət Universiteti