Mahirə Abdulla

Mahirə Abdulla — yazıçı, rəssam, publisist, Azərbaycan Yazıçılar Birliyinin, Azərbaycan Rəssamlar Birliyinin, Azərbaycan Jurnalistlər Birliyinin üzvü, psixologiya üzrə fəlsəfə doktoru.

Mahirə Abdulla
Doğum yeri	Əliyanlı, Qubadlı rayonu, Azərbaycan SSR, SSRİ
Vətəndaşlığı	SSRİ→ Azərbaycan
Milliyyəti	azərbaycanlı
Təhsili	Azərbaycan Dövlət Universitetinin Jurnalistika fakültəsi
Fəaliyyəti	yazıçı, rəssam, publisist

Həyatı

Mahirə Abdulla Qubadlı rayonunun Əliyanlı (indiki Başarat) kəndində anadan olmuşdur.

Mahirə Abdulla Bakı Dövlət Universitetinin jurnalistika fakültəsini fərqlənmə diplomu ilə bitirmişdir. On yeddi yaşında "Kimyaçı" qəzetində əmək fəaliyyətinə başlamışdır. "Kimyaçı" qəzetinin redaktoru, "Yazıçı" nəşriyyatının poeziya şöbəsinin böyük redaktoru, Respublika “Kitab evi”nin direktoru, "Azərkitab" Respublika Kitab Ticarəti Birliyi birləşmiş həmkarlar komitəsinin azad sədrı vəzifələrində çalışmışdır.

1980-1982-cı illərdə Sumqayıt şəhər Sovetinin deputatı olmuşdur. Dünya Azərbaycanlıları Konqresinin Təbliğat şöbəsinə rəhbərlik etmişdir. Azərbaycan Yazıçılar Birliyi Ədəbiyyat Fondu İdarə heyətinin üzvüdür. Hazırda Azərbaycan Yazıçılar Birliyində nəsr üzrə məsləhətçi işləyir. AYB üzvlüyünə qəbul üzrə ekspert qrupunun sədridir.

Yaradıcılığı

Müxtəlif janrlarda yazır. Vətən-millət məhəbbəti, bütöv Azərbaycan ideyası, təcavüzkar ermənilər tərəfindən işğal olunmuş torpaqlarımızın taleyi, yurd-ocaq niskilidir əsas mövzusu. “İlğım cənnətlər”, "Qarabağsız şeirlər", "7 ayın ovqatı" şeir kitabları, “Ürəkkeçmə”, "Qarabağsız namələr" silsiləsindən "Qeyb", "Ağıllı qadının intiharı" və "Erməni kölgəsi" nəsr əsərləri doğulduğu yurdu erməni əsarətində olan yazıçının qəlb ağrılarıdır.

2006-cı ildə azərbaycan, ingilis, rus dillərində çap olunan, 300 orijinal rəsmindən və fəlsəfi esselərindən ibarət "Qatmaqarışıq Nizam" albomunun bir fəsli "Qibləgahım Qarabağ" adlanır.

2007-ci ildə "Ürəkkeçmə", "Erməni kölgəsi" povestləri ingilis və rus dillərində nəşr olunmuşdur.

2008-ci ildə görkəmli Azərbaycan yazıçısı, alim, pedaqoq Mir Cəlal Paşayevin romanlarında milli şüur və həmrəylik problemi, erməni məsələsi, humanizm fəlsəfəsi mövzularını araşdıran "Əbədiyyət. An" kitabı çap olunmuşdur.

2004-cü ildə çapdan çıxan "Əvvəl. Axır" romanı Mahmud Kaşgari adına Beynəlxalq Fondun "Soyqırım və erməni təcavüzü" müsabiqəsinin Xüsusi mükafatı ilə təltif olunmuşdur.

Fəlsəfi-estetik əsərlərinə görə Uluslararsı Mahmud Kaşgari Fondunun və Türk Törə Ocağının birgə ödülü olan “San Yarlığı” laureatı adına layiq görülmüşdür.

Eyni zamanda bir sıra orijinal publisistik yazıların müəllifidir.

Əsərləri

• “Qoruyaq dünyamızı” – “Gənclik” nəşriyyatı. 1980.
• “Qırmızı təpələr” – “Yazıçı” nəşriyyatı. 1985
• “Tərk edilmiş yuvalar” – “Yazıçı” nəşriyyatı. 1989.
• “Türk oğlu, türk qızıyam” – “Gənclik” nəşriyyatı. 1995.
• “Həqiqət, azadlıq, məhəbbət haqqında” – “Adiloğlu” nəşriyyatı. 2004.
• “İlğım cənnətlər” – “Adiloğlu” nəşriyyatı”. 2004.
• “Ürəkkeçmə” – ”Adiloğlu” nəşriyyatı. 2004.
• “Əvvəl. Axır” – ”Qapp-poliqraf” nəşriyyatı. 2004.
• “7 ayın ovqatı” – ”Qapp-poliqraf” nəşriyyatı. 2005.
• “Qatmaqarışıq Nizam” – albom – ”Nurlan” nəşriyyatı. 2006.
• “Ürəkkeçmə” – rus dilində – ”Adiloğlu” nəşriyyatı.– 2007.
• “Ürəkkeçmə” –ingilis dilində – ”Adiloğlu” nəşriyyatı. 2007.
• “Əbədiyyət. An” – ”Adiloğlu” nəşriyyatı. 2008.
• “Qarabağsız şeirlər” – ”Nurlar” nəşriyyatı. 2009.
• “Qeyb” – ”Adiloğlu” nəşriyyatı. 2010.
• “Ağıllı qadının intiharı” – ”Adiloğlu” nəşriyyatı. 2011.
• “Erməni kölgəsi” – ”Adiloğlu” nəşriyyatı. 2011.

Məqalələri

• “Çərxi fələk və yaramazlığın “Qətl günü”
• “Ədəbi əxlaq”
• “Cismani eyforiyanın ədəbi və... ədəbsiz yaşantıları”
• “Ədəbiyyatda virtual gerçəklik”,
• “Ruhun repressiyası”
• “Ekzistensiya milli çarıq və qlobal erməni patava haqqında baş tutmayan doktorluq işim”
• “İxtiyar, ixtilaf və intihar”
• “Qədimliyin müasirliyi”
• “Kölgəsindən çıxan şair”
• ”Zəngəzurdan gələn həsrət”

Rəsmləri

400-dən çox qrafik rəsmin, yağlı boya və sulu boyayla çəkilmiş rəsm əsərlərinin müəllifidir. Kitablarındakı rəsmləri özü çəkib.