Mircəfər Seyidov

Seyidov Mircəfər Əyyub oğlu — azərbaycanlı yazıçı və jurnalist.

Mircəfər Seyidov
Doğum tarixi	22 fevral 1952
Doğum yeri	Salyan rayonu, Azərbaycan SSR, SSRİ
Uşağı	3 övladı var

Həyatı

Mircəfər Əyyub oğlu Seyidov 1952-ci il 22 fevral tarixində anadan olmuşdur. 1969-cu ildə Bərdə şəhər 5 nömrəli orta məktəbi, 1975-ci ildə Azərbaycan Dövlət Universitetinin (hazırkı BDU) Filologiya fakültəsini bitirmişdir.

1975-ci ildə ədəbiyyat müəllimi kimi əmək fəaliyyətinə başlamışdır. Daha sonra uzun müddət “Bərdə” (“Kommunizm yolu”) qəzetində ədəbi işçi, müxbir, şöbə müdiri və redaktor vəzifələrində çalışmışdır. 1995-1998-ci illərdə “Üzbəüz” qəzetinin təsisçisi və baş redaktoru olmuşdur. Sonrakı illərdə “Elm” qəzetinin və “Elm” nəşriyyatının redaktoru, Bakı Biznes Universitetində mətbəə direktoru vəzifələrində çalışmışdır. 2014-2023-cü illərdə AMEA-nın Məhəmməd Füzuli adına Əlyazmalar İnstitutunun elmi işçisi olmuşdur.

Müxtəlif illərdə "Azərbaycan gəncləri", "Ədəbiyyat və incəsənət" qəzetlərində və digər mətbu orqanlarda hekayə, şeir və esseləri dərc olunub. 1980-1985-ci illərdə iki ədəbi almanaxda hekayələri nəşr edilib. Müxtəlif janrlarda yazılmış 2000-dən çox məqalənin müəllifidir. 100-dən artıq kitabın redaktorudur.

XX əsrin 80-ci illərinin əvvəllərində ən yaxşı idman jurnalisti kimi Azərbaycan "Məhsul" Kənd Könüllü İdman Cəmiyyətinin Fəxri fərmanı ilə təltif olunmuş, respublika idman jurnalistlərinin Bakıda keçirilən konfransının iştirakçısı olmuşdur.

XX əsrin 80-ci illərində Şuşada keçirilən Vaqif Poeziya Günlərində və Xarıbülbül Musiqi Festivalında jurnalist kimi iştirak etmişdir.

2001-ci ildə yazdığı "Kərbəla" kitabına görə ilk dəfə Bakıda keçirilən İmam Hz. Əli (ə.s.) ilə bağlı Beynəlxalq konfransa dəvət almış, çıxışı konfransın toplusunda dərc edilmişdir.

2016-cı ildə Azərbaycan torpaqlarının erməni işğalından azad olunmasında fəal iştirakına və 1996-cı ildə yazdığı "Bərdə şəhidləri" kitabına görə “Azərbaycan Qarabağ Müharibəsi Əlilləri, Veteranları, Şəhid Ailələri” İctimai Birliyinin "Fədai" medalına layiq görülmüşdür.

Qarabağın ermənilər tərəfindən işğalı zamanı özünümüdafiə batalyonu yaratmış və həmin batalyonun komandiri olmuşdur. Batalyon Marquşavan və Marağa kəndlərini erməni işğalından azad etmişdir.

1982-ci ildə SSRİ Jurnalistlər İttifaqının üzv olmuşdur. Azərbaycan Jurnalistlər Birliyinin və Azərbaycan Yazıçılar Birliyinin üzvüdür.

3 övladı var.

Əsərləri

Kitabları

1. Göylərə çəkilmiş ümid (şer və hekayələr). Bakı: Sabah, 1993.
2. Bərdə şəhidləri (oçerk və esselər). Bakı: Sabah, 1996.
3. Ələviyyə ana (sənədli hekayə). Bakı: Elm, 1999.
4. Kişi var eldən gedər (publisistika). Bakı: Elm, 2000.
5. Kərbəla (roman). Bakı: Nurlan, 2001.
6. Cəbhə hekayələri. Bakı: Sabah, 2001.
7. Bərdə şəhidləri (təkrar nəşr əlavələrlə). Bakı: Sabah, 2005.
8. Kərbəla (roman, təkrar nəşr). Bakı: Sabah, 2005.
9. Peyğəmbər (roman). Bakı: Sabah, 2008.
10. Düşüncələr. Bakı: Sabah, 2008.
11. Qəfil oyanış. Bakı: Elm, 2011
12. Oqtay həkim (publisistika). Bakı: 2015.
13. Peygamber (türk dilində). İstanbul: 2023

Tərtib etdiyi kitablar

"Məktəbli kitabxanası" seriyasından tərtib etdiyi kitabçalar.

1. Vətən sevgisi. Bakı: Sabah, 2001.
2. Nəğmələr, düzmələr, sınamalar, oxşamalar. Bakı: Sabah, 2001.
3. Sehrli nağıllar. Bakı: Sabah, 2001.
4. Kitabi-Dədə Qorqud – Əkrək və Səkrək, Qanturalı və Selcan xanım, Basatın Təpəgözü öldürməsi (uşaqlar üçün işlənmiş variant). Bakı: Sabah, 2001.