Misir Əhmədov

Misir Əlibaba oğlu Əhmədov — azərbaycanlı alim, kimya üzrə elmlər doktoru.

Misir Əhmədov
Misir Əlibaba oğlu Əhmədov
Vətəndaşlığı	SSRİ Azərbaycan
Elm sahəsi	kimya
Elmi dərəcəsi	kimya üzrə fəlsəfə doktoru
İş yeri	AMEA-nın Polimer Materialları İnstitutu

Həyatı

Misir Əlibaba oğlu Əhmədov 1936-cı il iyulun 24-də Qərbi Azərbaycanın Qaraqoyunlu dərəsinin Çaykənd kəndində anadan olmuşdur. 1952-ci ildə Aykənd yeddiillik məktəbini qurtardıqdan sonra Qazax rayonunun Zoobaytarlıq Texnikumuna daxil olub, 1957-ci ildə oranı zootexnik ixtisası üzrə bitirmişdir. 1957-1960-cı illərdə ordu sıralarında xidmət etmişdir. 1961-1967-ci illərdə Azərbaycan Dövlət Universitetinin kimya fakültəsinin axşam şöbəsində ali təhsil almışdır. 1961-1967-ci illərdə Azərbaycan Elmlər Akademiyasının Neft-Kimya Prosesləri İnstitutunda baş texnik, sonra isə kiçik elmi vəzifələrində işləmişdir. 1967-1975-ci illərdə həmin institutun Sumqayıt Filialında, 1975-1978-ci illərdə isə Azərbaycan EA Xlor-üzvü Sintez İnstitutunda kiçik elmi işçi, 1978-1991-ci illərdə böyük elmi işçi işləmiş, 1991-1992-i illərdə isə laboratoriya müdiri vəzifəsini icra etmişdir.

Elmi fəaliyyəti

1974-cü ildə “Epixlorhidrinin alkenil törəmələrinin sintezi və bəzi çevrilmələri” mövzusunda namizədlik, 1992-i ildə isə “Homoallil xlorhidrinlərin və allillə əvəz olunmuş oksiranların sintezi və çevrilmələri” mövzusunda doktorluq dissertasiyalarını müdafiə etmişdir.

M.A.Əhmədovun tədqiqat obyekti yeni xlorkarbinol enofillərinin olefinlərlə xiral və axiral tipli Lyuis turşuları katalizatorları iştirakı ilə kondensləşməsindən, homoallilxlorhidrinlərin və uyğun oksiranların fərdi regio- və stereoizomer, həmçinin enantiomerlər şəklində alınması üçün aparılan “en” sintezinin yeni variantlarının işlənib hazırlanması və sistemli öyrənilməsindən ibarətdir. O, alifatik və tsiklik olefinlərin, metallilxloridin, izoprenin xiral və axiral Lyuis turşuları iştirakı ilə “en” sintezini aparmışdır. Apardığı tədqiqatlar nəticəsində homoallilxlorhidrinlərin və oksiranların alınma üsullarını işləyib hazırlamışdır.

Müəyyən etmişdir ki, reaksiyada alınan adduktların quruluşları tətbiq edilən karbohidrogenlərin quruluşundan və katalizatorun təbiətindən asılıdır. 2,3-Dixloraldehid və dixlor-asetonla alifatik olefinlərin kondensləşməsi reaksiyası regioselektiv gedir və nəticədə “en” maddəsi alınır. 2,3-Dixlorpropanalın dien karbohidrogenlərilə kondensasiyasından isə həm “en”, həm də dien adduktları əmələ gəlir. O, ilk dəfə “en” sintezi sahəsində katalitik asimmetrik sintez üsulunu tətbiq etməklə optiki bioliji aktiv homoallil xlorhidrinlərin bütöv bir sırasını almışdır. Həmin maddələrin bəzilərindən alınan oliqomerlər lak, yapışqan və stabilizator xassəsinə malikdir.

Onun apardığı tədqiqatların nəticələri 70 elmi əsərdə, o cümlədən 15 müəlliflik şəhadətnaməsində öz ifadəsini tapmışdır. Əsərləri İngiltərə, İtaliya, Türkiyə və Rusiyada çap edilmişdir. Rəhbərliyi ilə 3 elmlər namizədi hazırlanmışdır. Rusiyada, İngiltərədə və Türkiyədə üzvi kimya üzrə keçirilən Beynəlxalq simpozium və konfranslarda iştirak etmiş və məruzələrlə çıxış etmişdir.

1992-ci ildən Türkiyənin Elazı şəhərindəki Fırat Universitetində çalışır.