Nəriman Tahirov
Tahirov Nəriman Cəfər oğlu (Cəfəroviç) (1928, Aşqabad – 1992, Bakı) — azərbaycanlı alim, texnika üzrə elmlər doktoru (1973), AMEA-nın müxbir üzvü (1983)[1]
| Tahirov Nəriman Cəfər oğlu | |
|---|---|
 | |
| Doğum tarixi | 1928 |
| Doğum yeri | Türkmənistan, Aşqabad |
| Vəfat tarixi | 1992 |
| Vəfat yeri | Bakı, Azərbaycan |
| Elmi dərəcəsi | texnika üzrə elmlər doktoru (1973) |
| Elmi adı | professor |
| Təhsili | Azərbaycan Dövlət Neft və Sənaye Universiteti |
| Üzvlüyü | AMEA (1983) |
| Mükafatları |
 |
Həyatı
redaktəNəriman Tahirov 1928-ci ildə Türkmənistanın Aşqabad şəhərində anadan olmuşdur. 1952-ci ildə Azərbaycan Dövlət Neft və Sənaye Universiteti Neft və Qaz quyularının istismarı ixtisası üzrə Neft — mədən fakültəsini bitirmişdir. [1]
Elmi fəaliyyətləri
redaktəNəriman Tahirov 1957-ci ildə texnika üzrə fəlsəfə doktoru, 1973-cü ildə texnika üzrə elmlər doktoru elmi dərəcəsini və professor elmi adını almışdır. Nəriman Tahirov 1983-cü ildə Azərbaycan Milli Elmlər Akademiyasının (AMEA) müxbir üzvü seçilmişdir.[1]
Nəriman Tahirov institutu bitirdikdən sonra Azərbaycan Milli Elmlər Akademiyasının Neft ekspedisiyasında, Azərbaycan Elmi Tədqiqat Neftçıxarma İnstitutunda (AzETNÇİ) və Dərin Neft-Qaz Yataqları Problemi İnstitutunda işləmişdir. O, Azərbaycan Dövlət Neft və Sənaye Universiteti Neft və qaz yataqlarının işlənilməsi və istismarı kafedrasında professor vəzifəsində çalışmışdır.[1]
Elmi nailiyyətləri
redaktəNəriman Tahirov neft və qaz yataqlarının işlənilməsi və layların neftveriminin artırılması sahəsində araşdırmalar aparmışdır. Onun elmi tədqiqat istiqamətlərinə layın fiziki-kimyası, neft-qaz veriminin artırılmasının yeni üsulları, neft hasilatının intensivləşdirilməsi sahəsində tədqiqatlar, dərində yerləşən layların neft-qaz verimi mexanizminin öyrənilməsi, səthi-molekulyar və kapilyar hadisələr sahəsində tədqiqatlar, lay sularının selektiv təcridi üçün hidrotəciredici material qismində istifadə edilən yüksək səmərəli və münasib qiymətli reagentlərin tapılması, həmçinin neft və qaz quyularının quyudibi zonalarının fiziki-kimyəvi üsullarla öyrənilməsi mexanizmi daxildir.[1]
Professor Nəriman Tahirov keçmiş SSRİ məkanında neft-qaz layının fizika və kimyası sahəsində Elmlər Akademiyasının yeganə müxbir üzvü olmuşdur. Azərbaycan Elmlər Akademiyasının Yer Elmləri Bölməsi tərəfindən buraxılan "Xəbərlər" jurnalının redaktor müavini işləmişdir. Keçmiş SSRİ Elmlər Akademiyasının Neft və qaz yataqlarının işlənilməsi problemləri üzrə elmi şurasının və Ali Attestasiya Komissiyasının ekspert şurasının, həmçinin Respublikada neft elmi sahəsində dərəcələr verən bir neçə ixtisaslaşdırılmış elmi şuraların, o cümlədən Azərbaycan Elmlər Akademiyasının Elmi Şurasının üzvü olmuşdur. N. Tahirov 300-dən artıq elmi məqalənin, o cümlədən 5 monoqrafiyanın, ixtira və patentlərə görə 25 müəlliflik şəhadətnaməsinin müəllifi olmuşdur. Nəriman Tahirovun rəhbərliyi altında 3 elmlər doktoru və 25 fəlsəfə doktoru hazırlanmışdır.[1]
Vəfatı
redaktəNəriman Tahirov 1992-ci ildə Bakıda vəfat etmişdir.[1]
Mükafatları
redaktəNəriman Tahirov elmi fəaliyyətinə görə Azərbaycan Respublikası Ali Sovetinin Fəxri Fərmanı, "Şərəf nişanı" ordeni və bir sıra medallarla təltif olunmuşdur.[1]
İstinadlar
redaktə- ↑ 1 2 3 4 5 6 7 8 "Tahirov Nəriman Cəfəroviç". science.gov.az. 2023-05-15 tarixində arxivləşdirilib. İstifadə tarixi: 2024-01-30.