Pərviz Əlikramoğlu

Quliyev Pərviz Əlikram oğlu (Pərviz Əlikramoğlu) — balaban, tütək, zurna, klarnet və saksofon ifaçısı.

Pərviz Əlikramoğlu
Pərviz Əlikram oğlu Quliyev
Ümumi məlumatlar
Doğum tarixi	8 yanvar 1990
Doğum yeri	Bakı, Azərbaycan SSR
Milliyyəti	Azərbaycanlı
Musiqiçi məlumatları
Fəaliyyəti	Nəfəs alətləri ifaçısı
Fəaliyyət illəri	2005-ci ildən
Janrlar	caz, muğam, estrada
Musiqi alətləri	Balaban, tütək, zurna, klarnet və saksofon

Həyatı

Pərviz Əlikramoğlu 8 yanvar 1990-cı ildə Bakıda musiqiçi ailəsində anadan olub. 1996-cı ildə Bakı şəhəri İlqar Məmmədov adına 3 saylı orta məktəbə gedib. Uşaq vaxtından musiqiyə xüsusi marağı olmuşdur. Valideynləri onun hüquqşünas kimi görmək istəsələr də, Pərviz musiqi sahəsini seçmişdir. Musiqi ilə çox erkən yaşlarından məşğul olmağa başlamışdır. Valideynləri də bu marağı hiss etmiş və beləliklə o, öz təhsilini Fikrət Əmirov adına 6 saylı incəsənət məktəbində almağa başlamışdır. Oxuduğu illər ərzində klassik, caz və milli musiqi üslubları ilə dərindən və ciddi məşğul olmuşdur. 2008-ci ildə həqiqi hərbi xidmətə çağırılmışdır. Xidmət etdiyi vaxtda hərbi hissədə keçirilən tədbirlərdə fəal iştirak etdiyinə görə Fəxri Fərmanla təltif olunmuşdur. 2010-cu ildə Azərbaycan Dövlət Milli Konservatoriyasına daxil olmuş və Fərqlənmə diplomu ilə oranı bitirmişdir. 2014-cü ildən etibarən Milli Konservatoriyada magistr dərəcəsində təhsilini davam etdirir. Peşəkar balaban, tütək, zurna, klarnet və saksofon ifaçısıdır. Bir çox Respublika və Beynəlxalq Müsabiqələrin qalibi və laureatı olmuşdur. Azərbaycanı təmsil edərək xarici səfərlərdə, turlarda, beynəlxalq festivallarda iştirak etmişdir. Ailəlidir.

Fəaliyyəti

Pərviz Əlikramoğlunun folklor muğamımızın və milli musiqilərimizin cazla sintez olan ifaları qısa vaxt ərzində onu tamaşaçıların sevimlisinə çevrib. Balaban və tütəkdə ifa etdiyi musiqilərin sintezi dinləyənləri valeh edir. İfalarında iki böyük mədəniyyəti Şərq və Qərb melodiyalarının birləşməsindən yaranan mükəmməl əsərləri dinləmək olar. Konsertlərlə çıxış etdiyi ölkələrin universitetlərində və musiqi ocağlarında milli nəfəs alətimiz haqqında məlumatlar verib. Pərviz dayanmadan öz üzərində işləyir və təkrarsız ifası hər kəsi cəlb edir.

Konsertləri

• 2004-cü ildə hələ yeniyetməikən Qara Qarayev adına Dövlət Kamera Orkestrinin müşayiəti ilə balaban və tütəkdə bir çox Azərbaycan bəstəkarlarının əsərlərini ifa etmişdir.
• 2005-ci ildə Mina Aslanlının rəhbərlik etdiyi Kamera Ansanblının müşayiəti ilə Türkiyə və Azərbaycanın “Kültürler birleşiyor” adlı birgə layihəsinin solisti olmuşdur.
• 2013-cü ildə Azərbaycan Dövlət Xalq Çalğı Alətləri Orkestrinin müşayiəti ilə milli musiqilər ifa etmişdir.
• 2014-cü ildən etibarən Rəşad H. “Rast” qrupu və Mircavad C. ”Cəngi jazz” qrupu estrada ansanbllarının tərkibində müşayiətçi və solist olmuşdur.
• 2015-ci ildə Milli Konservatoriyanın Rektoru Xalq artisti, professor Siyavuş Kəriminin təşkil etdiyi dahi Bülbülə həsr olunmuş “Bülbülsayağı” musiqi layihəsində (konsertində) çıxış etmişdir.
• 2015-ci ildə Milli Konservatoriyanın təşkil etdiyi “Gəncləşən muğam” musiqi layihəsində çıxış etmişdir.

Mükafatları

• 2005-ci ildə keçirilən Hacı Məmmədov adına VII Bakı uşaq musiqi müsabiqəsində I dərəcəli diplom və müsabiqənin laureatı adına layiq görülüb.
• 2011-ci ildə İtaliyada məşhur dirijor Pietro Argentonun xatirəsinə keçirilən II Beynəlxalq instrumental və vokal musiqi müsabiqəsinin diplomantı olmuşdur.
• 2013-cü ildə Azərbaycanda keçirilən III Beynəlxalq Muğam Müsabiqəsində II yerlə təltif olunmuşdur .
• 2013-cü ildə Azərbaycanda keçirilən III Respublika Muğam Müsabiqəsində II yerlə təltif olunmuşdur.
• 2014-cü ildə Almaniyada keçirilən festivalda iştirak etmişdir.