Pirtəpəsi yaşayış yeri

Pirtəpəsi yaşayış yeri — Kəngərli rayonunun Sust kəndinin şimalında hündür təpənin ətrafını əhatə edən yaşayış yeri.

Sahəsi 900 m²-dır. Yaşayış yerinin bəzi qismlərində dördkünc formalı binaların qalıqları mövcuddur. Tikinti qalıqlarına əsasən evlərin başlıca olaraq çiy kərpicdən tikildiyini demək olar. Lakin bəzi evlərin tikintisində daşdan da istifadə olunmuşdur. Yaşayış yerinin yerləşdiyi təpənin üzərində Orta əsr qəbiristanlığına və bünövrəsi daşdan tikilmiş türbənin qalıqlarına rastlanmışdır. Aşkar olunmuş arxeoloji materiallar başlıca olaraq çəhrayı rəngdə bişirilmiş şirli və şirsiz saxsı məmulatından ibarətdir. Keramika məmulatı başlıca olaraq Son Orta əsrlər üçün xarakterikdir. Onlar nimçə, kasa və küpə tipli qabların parçalarından ibarətdir. Aşkar edilmiş arxeoloji materiallara əsasən yaşayış yerini XIV–XVIII əsrlərə aid etmək olar.