Qəhrəman Binnətli
Qəhrəman Binnətli — (d. 04.03.1942- ö. 01.01.2004) Azərbaycan fiziki, fizika-riyaziyyat elmləri doktoru, professor
| Qəhrəman Binnətli | |
|---|---|
| Binnətli Qəhrəman Hümmət oğlu | |
| Doğum tarixi | |
| Doğum yeri | Gürcüstan Respublikasının Marneuli rayonu |
| Vəfat tarixi | (61 yaşında) |
| Vəfat yeri | Bakı şəhəri |
| Vəfat səbəbi | Avtomobil qəzası |
| Vətəndaşlığı | Azərbaycan |
| Milliyyəti | Azərbaycanlı |
| Elm sahələri | Metallar fizikası, kalorimetriya, nüvə-qamma rezonansı spektroskopiyası |
| Elmi dərəcəsi | Elmlər doktoru |
| Elmi adı | Professor |
| İş yerləri | Azərbaycan Memarlıq və İnşaat Universiteti |
Həyatı redaktə
Binnətli Qəhrəman Hümmət oğlu Gürcüstan Respublikasının Marneuli rayonunun Kürüstü Kəpənəkçi kəndində dünyaya gəlmiş və Bakı şəhərində vəfat etmişdir.
Təhsil və elmi fəaliyyəti redaktə
- 1964 Azərbaycan Dövlət Pedaqoji Universitetini bitirmişdir.
- 1964–1992 Azərbaycan Politexnik İnstitutunda (indiki ATU) müəllim işləmişdir.
- 1990 Fizika-riyaziyyat elmləri doktoru adını almışdır.
- 1991 Fizika üzrə Professor olmuşdur.
- 1992–1997 Аzərbaycan Memarlıq və İnşaat Universitetində kafedra müdiri işləmişdir.
- 1995-1997-ci illərdə Türkiyənin Kütahya şəhərində yerləşən Dumlupınar Universitetində elmi ezamiyyətdə olmuşdur.
- 1997-2002 Аzərbaycan Memarlıq və İnşaat Universitetində kafedra müdiri və eyni vaxtda Qafqaz Universitetində tədris işləri üzrə prorektor vəzifələrində çalışmışdır.
- 2002–2004 Аzərbaycan Memarlıq və İnşaat Universitetində beynəlxalq əlaqələr üzrə prorektor və kafedra müdiri vəzifələrində fəaliyyət göstərmişdir.
Tədqiqatları daha çox metallar fizikası, kalorimetriya, nüvə-qamma rezonansı spektroskopiyası, radiyasiya sahələrinə aid olmuşdur. O 120 elmi məqalənin müəllifidir. Elmi kadrların hazırlanmasında xidməti olmuşdur.[1]
Haqqında redaktə
AMEA akad. Z.M.Bünyadov adına Şərqşünaslıq İnstitutunun əməkdaşı Dr.Məmmədəli Babaşlı onun haqqında belə qeyd edir:
Bu dünyadan bir Qəhrəman müəllim keçdi.
Dünyaya gəlişi və gedişi əsnasında kimsənin razı olub-olmadığı soruşulmur. Bütün bunlar insanın iradəsi xaricində, qədərin əzəli və dəyişməz hökmü əsasında baş verir. Qədər planında hər bir insana ayrılmış ömür payının başlanğıcını və sonunu dəyişdirmək imkanı olmadığı üçün insanın öhdəsinə ancaq mənalı, xeyirli və bərəkətli yaşamaq düşür. Başqa sözlə desək, müvəqqəti sakini olduğumuz gəlimli-gedimli, son ucu ölümlü dünyada nə qədər yaşamaqdan daha çox necə yaşamaq əhəmiyyət kəsb edir. Burada körpənin dünyaya gəlişi əsnasında ağladığını, yaxınlarının isə sevindiklərini, şadyanalıq etdikləri məqamı xatırlamamaq olmur. İnsan elə bir həyat yaşamalıdır ki, dünyadan köçərkən gülsün, arxada qalanlar isə belə böyük bir itkiyə görə kədərlənsinlər.Təbii ki, bu da müsbət insani keyfiyyətləri, xeyirxah əməlləri ilə yaddaşlarda silinməz iz buraxmış müstəsna kimsələrə nəsib olur. Əlindən və dilindən başqalarının zərər görmədikləri, yardımsevərliyi və səmimiyyəti ilə insanların könlünü fəth etmiş bəxtəvər kəslər buna nail olurlar. Həyatda tanıdığım, yoxluğunu daim hiss etdiyim, elminə və şəxsiyyətinə böyük hörmət bəslədiyim belə şəxslərdən biri də yaşından asılı olmayaraq hər kəsə özünəməxsus təkrarsız “qardaş” ifadəsi ilə müraciət edən Qəhrəman müəllim olmuşdur.
Ancaq mənim yaxından tanıdığım Qəhrəman müəllim Azərbaycan Milli Ensiklopediyasında verilmiş qısa tərcümeyi-hal sətirlərin arasına sığmayan üstün məziyyətləri ilə fərqlənən müstəsna bir insan, təhsilimizin gələcəyi üçün yorulmadan çalışan bir ziyalı idi. Elmi araşdırmaya qabiliyyəti olan hər bir gənci mənəvi sərvətimiz hesab edir və onların hamisi olmağı özünə borc bilirdi. Onlara mənəvi dayaq olmaqla dürüst və əxlaqlı insan kimi yetişmələri üçün zəmin hazırlamağa çalışırdı. Çünki əxlaqdan məhrum olan elmin sahibinin əlində pislik etmək üçün güclü bir silah olduğuna əmin idi. Qəhrəman müəllimi fərqləndirən əsas cəhətlərdən biri də onun yüksək əxlaqi və milli-mənəvi dəyərləri özündə cəmləşdirən qeyri-adi şəxsiyyət, sözün həqiqi mənasında öz orijinallığı ilə sayılıb-seçilən bir insan olması idi. Zəngin daxili mədəniyyəti, obyektivliyi, həmişə haqqın və haqlının tərəfində olması, xeyirxahlığı ilə fərqlənirdi. Bu səbəbə, onun ömrü yaşadığı illərlə deyil, yaddaqalan xeyirxah əməlləri ilə ölçülür.
16 il əvvəl 31 dekabr gecəsində Qəhrəman müəllimin avtomobil qəzasında dünyasını dəyişməsi yaxınlarını və onu sevənləri dərindən üzdü. Bu gün cismən aramızda olmasa da onu tanıyanların, həmkarlarının, tələbələrinin yaddaşında əbədi iz qoydu. Məhz buna görə də həqiqi elmin və insanlığın fərqinə varan qədirbilən insanların qəlblərində yaşayır, minnətdarlıqla və rəhmətlə yad edilir. Mərhəməti sonsuz Uca Allahdan Qəhrəman müəllimə rəhmət etməsi, ruhunun şad, məkanının cənnət olması diləyi ilə...[2]
Həmçinin bax redaktə
İstinadlar redaktə
- ↑ "BİNNƏTLİ Qəhrəman Hümmət oğlu". 2022-08-16 tarixində arxivləşdirilib. İstifadə tarixi: 2021-01-02.
- ↑ Bu dünyadan bir Qəhrəman müəllim keçdi