Qasım Hacıyev

Qasım Əhəd oğlu Hacıyev (6 avqust 1950, Bərdə rayonu) — Azərbaycan MEA A. A. Bakıxanov adına Tarix İnstitutu Qarabağ tarixi şöbəsinin müdiri, tarix üzrə elmlər doktoru

Qasım Hacıyev
Doğum tarixi	6 avqust 1950
Doğum yeri	Bərdə rayonu, Hacallı
Elm sahəsi	Tarix
Elmi dərəcəsi	Tarix üzrə elmlər doktoru
Elmi adı	Şöbə müdiri

Həyatı

Qasım Əhəd oğlu Hacıyev 1950-ci ildə Bərdə rayonunun Hacallı kəndində anadan olmuşdur. O, 1970–1974-cü illərdə Azərbaycan Dövlət Pedaqoji İnstitutunun (indiki ADPU) Tarix fakültəsini bitirmişdir.

Q. Ə. Hacıyev 1974–1983-cü illərdə Bərdə rayonunun 1 saylı Hacallı kənd məktəbində müəllim, direktor müavini işləmişdir.

Qasım Hacıyev 1984–1987-ci illərdə Azərbaycan Elmlər Akademiyası Tarix İnstitutunun aspiranturasında təhsil almışdır.

O, 1990-cı ildə Kemerovo Dövlət Universitetinin İxtisaslaşdırılmış Müdafiə Şurasında "Şabran şəhərinin şüşə məmulatı (IX–XVII əsrlər)" mövzusunda namizədlik dissertasiyası müdafiə edərək tarix elmləri namizədi alimlik dərəcəsi almışdır.

Fəaliyyəti

Qasım Hacıyev 1990–1997-ci illərdə Tarix İnstitutunun Arxeologiya və Etnoqrafiya Sektorunda elmi işçi, baş elmi işçi və aparıcı elmi işçi vəzifələrində çalışmışdır.

O, 1997-ci ildən Tarix İnstitutunda aparıcı elmi işçi, 2003-cü ildən isə "Qarabağ tarixi" şöbəsinin müdiri şöbə müdiri vəzifələrində işləmişdir.

Qasım Hacıyev 2000-ci ildə "Bərdə şəhərinin tarixi (e.ə. III-b.e. XVIII əsri)" adlı monoqrafiyasını yazıb nəşr etdirmişdir.

Qasım Hacıyev 2006-cı ildə "Bərdə şəhərinin tarixi (e.ə. III əsr-b.e. XVIII əsri)" mövzusunda doktorluq dissertasiyası müdafiə etmişdir.

O, 5 monoqrafiya, 80-dən artıq elmi məqalənin müəllifidir.

Qasım Hacıyev 1992-ci ildən Azərbaycanın müxtəlif ali təhsil müəssisələrində Azərbaycan tarixi, arxeologiya, türk xalqlarının tarixi fənləri üzrə mühazirələr oxuyur.

Əsərləri

Monoqrafiyaları

1. Bərdə şəhərinin tarixi (b.e.ə. III əsr – b.e. XVIII əsri). Bakı, "T" Nəşriyyat-Poliqrafiya Mərkəzi, 2000. 320 s.
2. Qarabağ: suallar və faktlar. Bakı, Qismət, 2005. 146 s. (s.53–80). Həmmüəlliflər Y. M. Mahmudov, K. K. Şükürov, K. Səlimov, F. Həsənoğlu
3. "Bərdə şəhəri. Coğrafi, siyasi və mədəni tarixi", Bakı, "UniPrint", 2008. ISBN 978-9952-440-33-1
4. Qarabağın maddi və mənəvi mədəniyyəti (Azərbaycan, ingilis, fransız dillərində). Bakı. Təhsil, 2010. 152 s.
5. Vladimir Kazimirovun "Qarabağa sülh" arzusu və əsl niyyəti. Bakı. Təknur, 2011. 131 s. Həmmüəllif S. Ş. Nuriyev