Ryazan Dövlət Radiotexnika Universiteti

Ryazan Dövlət Radiotexnika Universiteti (rus. Ряза́нский госуда́рственный радиотехни́ческий университе́т (РГРТУ)) — Rusiyada universitet; Hal-hazırda universitet radioelektronika, informasiya-telekommunikasiya texnologiyaları (İKT), həmçinin informasiya təhlükəsizliyi sahəsində rəqabətədavamlı mütəxəssislərin hazırlığı sahəsində Rusiyanın aparıcı texniki ali məktəbləri arasında xüsusi yer tutur.

Ryazan Dövlət Radiotexnika Universiteti
54°36′49″ şm. e. 39°43′26″ ş. u.
Əsası qoyulub	1951
Tip	dövlət universiteti
Ölkə	Rusiya
Ünvan	Rusiya, Ryazan şəhəri
Sayt	rsreu.ru
Vikianbarda əlaqəli mediafayllar

Fəaliyyəti

Universitetin tərkibinə 39881 kvadrat metr ərazini əhatə edən 3 tədris korpusu, 2359 yerlik 5 yataqxana, tibb məntəqəsi, yeməkxana, stadion, “Yaşıl meşə” idman-sağlamlıq düşərgəsi, həmçinin sosial sfera üzrə digər obyektlər daxildir.

Ryazan Dövlət Radiotexnika Universitetinin 5 yataqxanasında 4-ü bilavasitə əsas tədris korpusunun yanında yerləşir. Bütün əcnəbi tələbələr universitetin yataqxanalarında yaşayış yeri ilə təmin edilir.

Tələbə şəhərciyi ərazisində basketbol, voleybol və tennislə məşğul olmaq üçün üçün idman meydançaları inşa edilib. Hər bir yataqxanada təchiz edilmiş idman otaqları var.

Ali təhsil müəssisəsində 7 fakültə, 3 institut və 1 kollec fəaliyyət göstərir.

Universitetin radiotexnika və telekommunikasiya fakültəsinə elektrotexnikanın nəzəri əsasları, telekommunikasiya və radiotexnikanın əsasları, radiotexnika sistemləri, radiotexniki qurğular, radioidarəetmə və rabitə, fiziki tərbiyə kafedraları daxildir.

Elektronika fakültəsi sənaye elektronikası, elektron texnika və texnologiya, elektron cihazlar, kimya texnologiyası, biotibb və yarımkeçirici elektronika, ümumi və eksperimental fizika, lazer texnologiyaları istiqamətləri üzrə mütəxəssislər hazırlayır.

İdarə etmədə avtomatika və informasiya texnologiyaları fakültəsində informasiya-ölçü və biotibb texnikası, avtomatlaşdırılmış idarə sistemləri, informasiyaların və texnoloji proseslər avtomatlaşdırılması, ali riyaziyyat, qrafikada və dizaynda informasiya texnologiyaları üzrə tədris həyata keçirilir.

Hesablama texnikası fakültəsində elektron hesablama maşınları, hesablama vasitələrinin avtomatlaşdırılmış planlaşdırması sistemləri, hesablama və tətbiqi riyaziyyat, nəzəri və tətbiqi mexanika, informasiya təhlükəsizliyi ixtisasları tədris olunur.

Mühəndis iqtisadiyyatı fakültəsində iqtisadiyyat, idarəetmə və istehsalın təşkili, ekonometrika və riyazi modelləşdirmə, dövlət və bələdiyyə idarə etməsi və iqtisadi nəzəriyyə, həyat fəaliyyətinin və ekologiyanın təhlükəsizliyi, keyfiyyəti idarəetmə və sertifikatlaşdırma, maliyyə idarəetməsi, iqtisadi analiz və hesab, xarici dillər, korporativ təhlükəsizlik kafedraları fəaliyyət göstərir.

Universitetin axşam fakültəsinin tərkibində distant təhsil texnologiyaları kafedrası yaradılıb.

Ali təhsil ocağında bu fakültələrlə yanaşı, mütəxəssislərin yenidən hazırlanması fakültəsi istifadəyə verilib.

Eyni zamanda, universitetdə humanitar, hərbi, əlavə peşə təhsili institutları fəaliyyət göstərir.

Ali təhsil müəssisəsində ixtisaslar, əyani, qiyabi təhsil formaları, eləcə də bakalavriatura və magistratura təhsil pillələrindən asılı olaraq bir semestrlik təhsil haqqı 12700-64260 rus rublu arasında dəyişir.

Elmi-tədqiqat fəaliyyəti

Ryazan Dövlət Radiotexnika Universitetində informasiya texnologiyalarının müxtəlif istiqamətləri üzrə elmi-tədqiqat işləri yerinə yetirilir.

Universitetin elmi-tədqiqat fəaliyyətinin əsasını perspektivli radiotexnika, informasiya və telekommunikasiya qurğularının və sistemlərin yaradılması, hesablama kompleksləri və siqnalların işlənməsi, təsviri və sahə sistemləri üçün riyazi, proqram və texniki təminatın hazırlanması, yeni informasiya texnologiyalarının və elmi-texniki və ictimai-iqtisadi sferalar üçün idarə etmə metodların araşdırılması, elektron və mikroelektron cihazların və qurğuların yaradılması texnologiyalarının hazırlanması təşkil edir.

Elmi işə müəllimlər, aspirantlar və tələbələr cəlb edilirlər. Universitetdə 1968-ci ildən başlayaraq ixtiralara 1675 müəllif şəhadətnaməsi və patent alınıb, 300-dən artıq monoqrafiya dərc edilib.

İKT infrastrukturu

Ryazan Dövlət Radiotexnika Universitetində informasiya-kommunikasiya texnologiyalarının tətbiqinə xüsusi diqqət yetirilir.

Universitetdə ali məktəbin bütün korpusları və yataqxanalarını əhatə edən Internet və Runnet qlobal şəbəkələrinə çıxışa malik olan ərazi cəhətdən paylanmış korporativ informasiya sistemi formalaşdırılıb.

İnformasiya sistemi universitetin təqribən 7 mindən artıq tələbə və müəllim heyətinin lokal və qlobal informasiya resurslarına, müasir sistem və tətbiqi proqram vasitələrinə və texnologiyalara, hesablama texnikası və telekommunikasiya vasitələrinə müntəzəm operativ çıxışını təmin edir.

Tədris prosesinə kafedralarda və informasiya-hesablama mərkəzindəki 49 kompüterləşmiş auditoriya cəlb edilib.

Universitetin korporativ informasiya sistemində 2,5 mindən artıq kompüter, 90-dan çox alt şəbəkə, mərkəzi server-kommutasiya qovşağı, 200-dən çox funksional server və kommutator mövcuddur.

Ali məktəbin fəaliyyətinin informasiyalaşdırılması Telekommunikasiya və İnformasiya Resursları İdarəsi, Yeni İnformasiya Texnologiyaları Mərkəzi, İnformasiya-hesablama Mərkəzi, həmçinin Təhsildə Multimedia Texniki Vasitələri Mərkəzi və İnformasiya Xidməti Mərkəzi tərəfindən dəstəklənir.

Avtomatlaşdırılmış kitabxana sistemi

Ryazan Dövlət Radiotexnika Universitetində müasir İKT-nin tətbiq olunduğu müasir kitabxana sistemi yaradılıb. Təsadüfi deyil ki, ali məktəbin elmi kitabxanası Ryazan vilayətinin ən böyük kitabxanası kimi tanınır.

Kitabxana-informasiya proseslərinin avtomatlaşdırılması üçün 1991-ci ildə iki EHM və MARC - avtomatlaşdırılmış kitabxana- informasiya sistemi alınıb.

Hal-hazırda kitabxanada yeni nəsil “MARC” SQL sistemi işləyir. Lokal kitabxana şəbəkəsi yaradılıb. Kitabxananın elektron kataloqu 1989-cu ildən daxil olan olan materialları əks etdirir və mütəmadi olaraq yenilənir. Sadalananlarla yanaşı, nəşrlərin komplektləşdirilməsi, onların sistemləşdirməsi və hesabı prosesləri avtomatlaşdırılıb.

Mənbə

• Cahangir Atakişiyev. "Rabitə dünyası" qəzeti.  (az.)