Rza Baxşəliyev

Baxşəliyev Rza İbrahim oğlu (22 mart 1899 – 30 yanvar 1992, Bakı) — yunan-roma və sərbəst güləş üzrə azərbaycanlı idmançı. SSRİ əməkdar idman ustası (1943), Azərbaycan SSR əməkdar məşqçisi (1962), ümumittifaq dərəcəli hakim (1961), əməkdar bədən tərbiyəsi və idman xadimi (1969).

Rza Baxşəliyev
Şəxsi məlumatlar
Tam adı	Baxşəliyev Rza İbrahim oğlu
Vətəndaşlığı	SSRİ
Doğum tarixi	22 mart 1899
Doğum yeri	Bakı, Rusiya İmperiyası
Vəfat tarixi	30 yanvar 1992 (92 yaşında)
Vəfat yeri	Bakı, Azərbaycan
Təhsili	Azərbaycan Bədən Tərbiyəsi İnstitutu Azərbaycan Dövlət Universiteti
İdman növü	güləş
Komandası	Kusturud

Həyatı

Azərbaycanda güləş idman növünün inkişafında mühüm rol oynamış Rza Baxşəliyev 1925–1945-ci illəri əhatə edən karyerası ərzində klassik güləş üzrə 20, sərbəst güləş üzrə isə 7 dəfə ölkə çempionu olmuşdur. O həmçinin uzun müddət Azərbaycan Dövlət Universitetinin bədən tərbiyəsi kafedrasına rəhbərlik edib (1937–1965). 7 dil bilən Rza Baxşəliyev güləşlə yanaşı dama oyunu ilə maraqlanırdı və bu idman növü üzrə müxtəlif yarışlarda iştirak edirdi. Baxşəliyev həm də görkəmli idman müəllimi kimi tanınır. Onun tələbələri arasında SSRİ çempion və mükafatçıları İbrahimpaşa Dadaşov, Musa Babayev, Muxtar Dadaşov və ilk azərbaycanlı olimpiya mükafatçısı Rəşid Məmmədbəyov kimi güləşçilər olmuşdur.