Səməd Abdullayev (leytenant)

Səməd Kamil oğlu Abdullayev (11 oktyabr 1961, Yuxarı Veysəlli, Füzuli rayonu – 12 avqust 1993, Füzuli rayonu) — Qarabağ müharibəsi şəhidi.

Səməd Abdullayev
Səməd Abdullayevin 55 illiyinə həsr olunmuş şəkil
Şəxsi məlumatlar
Doğum tarixi	11 oktyabr 1961
Doğum yeri	Yuxarı Veysəlli, Füzuli rayonu, Azərbaycan SSR, SSRİ
Vəfat tarixi	12 avqust 1993 (31 yaşında)
Vəfat yeri	Füzuli rayonu, Azərbaycan
Vəfat səbəbi	Şəhid olmuşdur.
Dəfn yeri	Şəhidlər Xiyabanı
Vətəndaşlığı	Azərbaycan
Milliyyəti	azərbaycanlı
Uşaqları	Emil, Aynur
Atası	Kamil Abdullayev
Hərbi fəaliyyəti
Mənsubiyyəti	Daxili İşlər Nazirliyi
Qoşun növü	Daxili Qoşunlar
Xidmət illəri	1983 – 1993
Rütbəsi	Leytenant
Vəzifəsi	Sahə İnspektoru
Döyüşlər	Qarabağ müharibəsi

Həyatı

Səməd Abdullayev 1961-ci ildə Füzuli rayonunun Yuxarı Veysəlli kəndində anadan olub. 1978-ci ildə Füzuli rayonu Yuxarı Veysəlli kənd orta məktəbini bitirmişdir. 1979-cu ildə Azərbaycan Dövlət Universiteti nəzdində hazırlıq fakültəsinə daxil olmuşdur. 1981-1983-cü illərdə Tallin Baltik dəniz donanmasında hərbi xidmət keçmişdir. 1983-cü ildən Daxili İşlər Nazirliyinin Suraxanı Rayon Polis İdarəsinin post–patrul xidməti rotasında əmək fəaliyyətinə başlamışdır. 1990-cı ildə N.Rzayev adına Xüsusi Milis məktəbinə daxil olmuş, 1992-ci ildə həmin məktəbi bitirmişdir. Vətənə olan məhəbbəti onu Füzuli rayonuna döyüş bölgəsinə aparmışdır. 16 sərhəd kəndinin (Qaradağlı, Xatınbulaq, Körazallı, Pirəhmədli, Qarakollu və s.) müdafiəsində iştirak etmişdir. 1993-cü ilin 12 avqustu Füzuli Rayon Polis şöbəsinin sahə inspektoru polis leytenantı Səməd Kamal oğlu Abdullayevin son döyüş tarixi olmuşdu. Səməd Abdullayev Şəhidlər Xiyabanında dəfn edilmişdir.

İrsi və xatirəsi

Azərbaycan Respublikasının Nazirlər Kabinetinin 17 sentyabr 1996-cı il tarixli 124 №-li qərarı ilə Suraxanı rayonu Yeni Günəşli "D" yaşayış sahəsində yerləşən 290 №-li orta məktəbə şəhid Səməd Kamal oğlu Abdullayevin adı verilmişdir. Məktəbin həyətində onun büstü ucadılmışdır.