Sahaca Yoqa

Sahaca Yoqa — dini cərəyan.

Şri Mataci Nirmala Devi

Cərəyanın qurucusu Şri Mataci Nirmala Devi 1923-cü ildə Hindistanın Çindvare (indiki Madhya Pradeş ştatı) şəhərində vaxtilə brahmanlar kastasına aid protestant ailəsində dünyaya gəlmişdir. Atası Hindistanın azadlığı uğurunda mübarizə aparmış və Hindistan parlamentinin üzvü olmuşdur. Nirmala özü isə BMT-nin Beynəlxalq Dəniz Təşkilatının Baş katibi Çandrika Prasada Şrivasta ilə ailə qurmuşdur.

Nirmala böyük rəhbər hesab edilən Racnişin ilk tələbələrindən olmuşdur. Ehtimal olunur ki, məhz müəllimin təkidi sayəsində Nirmala özünü "quruiney" (Allahın təcəssüm etdiyi şəxs) elan etmişdir. O, insanları inandırmağa çalışır ki, 1970-ci ildə ona və bir neçə nəfərə "özlərini mənəvi cəhətdən kamilləşdirmək" qabiliyyəti verilmişdir. Nirmala məqsədini həyata keçirmək üçün istifadə etdiyi metodu "sahaca-yoqa" (yüngül yoqa) adlandırmışdır. Bu metodun əsas ideyasına görə, insanın Tanrı ilə asan əlaqə yaratması üçün bədənə Nirmala tərəfindən mənəvi qüvvə yerləşdirilmişdir. O, qurduğu cərəyanı yeganə "həqiqi din" adlandıraraq, ardıcıllarını özləri ilə fəxr etməyə çağırır. İndiyə kimi mövcud bütün dinləri yalan, onların rəhbərlərini isə "rakşasam" (şeytan) adlandırmışdır: hətta radikal çıxışlarının birində pravoslav serbləri bütünlüklə şeytan adlandıraraq onların məhv edilməsinin vacibliyini vurğulamışdır.

"Sahaca-yoqa" mənsubları insanın özünü kamilləşdirməsi üçün səhər və axşam 10–15 dəqiqə meditasiya ilə məşğul olmağı yetərli görürlər. Nirmala hesab edir ki, günün çox saatını meditasiyaya sərf etmək enerji balansının pozur, bu da yolverilməzdir. O, tənəffüs üzərində nəzarətin vacibliyini bildirsə də, cərəyan mənsubları tənəffüs çalışmalarından istifadə etmirlər.

Nirmala dünyanın özünün son dövrlərini yaşadığını bildirir: "Hər kəs Yer üzərində qurulacaq məhkəmədə mühakimə ediləcəkdir. Hazırda əhalinin sayı maksimum həddədir. Bu onunla əlaqədardır ki, İlahi Padşahlığa daxil olmaq üçün səbir nümayiş etdirənlər doğulur və doğulacaqlar. Qiyamət zamanı Yer kürəsi əhalisinin səksən faizi məhv ediləcək. "Sahaca-yoqa"nın üzvü olan yalnız on faiz əhali xilas olacaq. On faiz isə Cəhənnəmin qapısı arasında qalacaq. Qərbin vəziyyətinə uyğun olaraq, onlara hökm oxunacaq. Lakin "Sahaca-yoqa" üzvləri də xilasa tam əmin olmamalıdırlar. Bunun üçün onlardan hər şeylərini icmaya vermək tələb olunur. Mən sizin Qiyamət gününün ağır sınağından üzü ağ çıxmağınız üçün gücümü əsirgəmirəm. Lakin siz də öz növbənizdə, mənimlə sıx əməkdaşlıq etməli, mənə çox vaxt ayırmalısınız".

Nirmala insanı "ilahi kompüter" hesab edərək, onun yalnız "şəbəkə"yə qoşulmasının lazımlığını qeyd edir. "Qoşulduqdan" sonra o, ilahi mahiyyət qazanaraq, bəşəriyyətin xilaskarına çevrilir. "Qoşulma" sahaca-yoqa metodu vasitəsilə həyata keçirilir. Lakin metod ikinci dərəcəlidir. Başlıca rolu Nirmala özü oynayır. Sahaca-yoqa isə Nirmalanın təzahürlərindən biridir. Nirmala ardıcıllarına daim təlqin edir: " Siz Allah deyil, insansınız. Sizə günah etmək xüsusiyyəti xasdır. Keçmiş günahlarınıza görə xəcalət çəkməyin. Sadəcə, gələcəkdə səhvlərinizi təkrarlamayacağınız haqqında özünüzə söz verin".

O, tərəfdarlarına göbələk, bir neçə növ pendir, alkoqol və narkotik vasitələrdən istifadəyə qadağa qoymuşdur. Onların insanın yuxu arteriyasına mənfi təsir göstərdiyini iddia edir. Uşaqların isə çay, kofe və şokolad qəbul etməsini məsləhət görmür. Bu qidaları uşaq böyrəklərinin sağlamlığı üçün təhlükəli olduğunu bildirir. Ümumiyyətlə, Nirmala insanın yaşadığı coğrafi əraziyə uyğun qidalanmağı məsləhət görür. Məsələn, şimal xalqlarının ətdən (xüsusilə sincab), hindlilərin də daxil olduğu cənub xalqlarının isə meyvə-tərəvəzdən istifadə etməsini deyir.

Nirmalanın təlimində Oşo Racnişin "izlər"i hiss edilir. O, da Racniş kimi təliminin dərk olunması üçün xüsusi gücün tələb edilmədiyi qənaətindədir. Nirmala da səmavi dinlərin insanların qarşısına qoyduğu bütün şərtləri rədd edir. O, düşünür ki, bəşəriyyət inkişafın elə səviyyəsindədir ki, ibadət üçün məbəd və kilsələrə lüzum qalmamışdır.

Cərəyan üzvləri "müqəddəs ana" saydıqları Nirmalaya sadiqliklərini göstərmək üçün az yatır, az da qida qəbul edirlər.

Nirmalaya daha çox sədaqət göstərən mənsublar aşramlarda yaşayır, digərləri isə rəhbərin fəaliyyətini və səfərlərini maliyyələşdirməyə, ona digər ölkələrdə (İtaliya və İngiltərədə) daşınmaz əmlak almağa təşviq edilirlər. Cərəyanın büdcəsinə Nirmalanın şəxsən özü nəzarət edir.