Sirus Rövşəni

Sirus Rövşəni (fars. سیروس روشنی‎‎; 1928, Təbriz – 1981) — iranlı həkim, anestezioloq. 1979-cu ildə İranda baş vermiş İran İslam İnqilabından əvvəl dəfələrlə mənsubu olduğu dini inanca görə təqiblərə məruz qalmışdır. Şiraz xəstəxanasında anestezioloq kimi çalışan Rövşəni dövlətin bütün təziqlərinə baxmayaraq vəzifəsini icra etməyə davam etmişdir.

Sirus Rövşəni
fars. سیروس روشنی‎‎
Doğum tarixi	1928
Doğum yeri	Təbriz, İran
Vəfat tarixi	1982
Vəfat yeri	Şiraz, İran
Vətəndaşlığı	İran
Həyat yoldaşı	Pərvin Şeyx əl-İslami
Milliyyəti	Fars
Dini	Bəhai dini
İxtisası	Həkim, anestezioloq

1982-ci ildə İran İslam Respublikasının rəsmiləri tərəfindən iki dəfə təhdid edilmiş və nəticədə həmin ilin qışında güllələnərək edam edilmişdir. Sirus Rövşəninin ölümündən sonra İranda yaşayan bəhai icmasına qarşı sistematik təqiblərə start verilmişdir və həmin təqiblər ən müxtəlif səviyyələrdə bu gün də davam etdirilməkdədir.

Həyatı

Sirus Rövşəni 1928-ci ildə İranın Şərqi Azərbaycan ostanının paytaxtı olan Təbriz şəhərində, bəhai ailəsində anadan olmuşdur. Yeniyetməlik dövründə ailəsində yaşanan maddi çətinliklər səbəbindən məktəbə getməyi dayandırmış və bazar ticarəti ilə məşğul olmuşdur. 17 yaşı olarkən, tibb təhsili üçün nəzərdə tutulmuş üç illik dərs proqramını bir il ərzində tamamlayaraq tibb məktəbinə daxil olmuşdur.

Tibb təhsilini bitirdikdən sonra Sirus ümumi anesteziya üzrə ixtisaslaşmış və Səhiyyə və Tibbi Təhsil Nazirliyində işə qəbul edilmişdir. 1957-ci ildə Pərvin Şeyx əl-İslami adlı qadınla evlənmişdir və bu nigahdan üç övladları dünyaya gəlmişdir. 1970-ci illərdən etibarən Sirus Rövşəni mənsubu olduğu Bəhai dininə görə təziqlərə məruz qalmağa başlayır. 1974-cü ildə Səhiyyə Nazirliyi tərəfindən yaşadığı şəhərdən uzaqlaşdırılmaq məqsədi ilə Tehrana göndərilir və dəfələrlə xəbərdarlıq edilərək həkimlik fəaliyyətinə son verilir. Bütün baş verənlərə baxmayaraq savadlı həkim olduğundan eyni xəstəxanaların rəhbərləri tərəfindən təkrar işə götürülümüşdür.