Siklop (Marvel Comics)

Skott Sammers (ing. Scott Summers) və ya Siklop (ing. Cyclops) — Marvel Comics tərəfindən yaradılmış və əsasən İks-adamlarla bağlı olan uydurma super qəhrəman. Yazıçı Sten Li və rəssam Ceyk Kyörbi tərəfindən yaradılan personaj ilk dəfə 1963-cü ildə nəşr olunmuş "İks-adamlar" komiksinin 1-ci buraxılışında peyda olmuşdur.

Siklop
ing. Cyclops
Nəşriyyat	Marvel Comics
Yayım tarixi	"İks-adamlar" #1 (sentyabr, 1963)
Yaradıcı(lar)	Sten Li Ceyk Kyörbi
Xüsusiyyətlər
Əsl adı	Skott Sammers
Doğum yeri	Ankoric
Cinsiyyəti	kişi
Boyu	1,91 m
Çəkisi	88 kq
Göz rəngi	qəhvəyi[d]
Saç rəngi	qəhvəyi saç[d]
Növü	mutant
Vətəndaşlıq	ABŞ
Komiks bioqrafiyası
Kainat	616
Üzvlükləri	İks-adamlar İks-Güc İks-Faktor İks-Korporasiya Çempionlar Zümrüd Beşliyi
Partnyorları	Emma Frost
Ləqəbləri	Cyclops
Gücləri	Güclü, yandırıcı optik enerji şüaları yaymaq Məkan barədə dəqiq məlumat Taktika ustası

Siklop qeyri-insani güclərlə dünyaya gələn xəyali mutantlardan biridir. O, gözlərindən güclü, yandırıcı enerji şüaları yayır. Xüsusi qoruyucu eynəkləri olmadan Siklop həmin şüaları idarə edə bilmir. O, mutantlar və insanların sülh və bərabərlik şəklində yaşaması üçün vuruşan İks-adamlar komandasının ilkin üzvlərindən biridir.

2006-cı ildə IGN veb-saytının hazırladığı "Top 25 İks-adamlar" siyahısında Marvelin ən məşhur personajlarından biri olan Siklop birinci yerə layiq görülmüşdür. 2011-ci ildə isə eyni veb-saytda Siklop 100 komiks superqəhrəmanları siyahısında 39-cu göstərilmişdir.

Siklop rolunu İks-adamlar, İks-adamlar 2 və İks-adamlar: Son müqavimət filmlərində aktyor Ceyms Marsden, İks-adamlar: Başlanğıc. Şimal porsuğu filmində aktyor Tom Pokok yeniyetmə Siklop rolunu, İks-adamlar: Apokalipsis və İks-adamlar: Qara zümrüd quşu filmlərində isə gənc Siklop rolunu aktyor Tay Şeridan canlandırmışdır.

Xəyali bioqrafiya

Erkən illəri

Skott uşaq yaşlarında ailəsi ilə birlikdə Alyaska ştatının Ankoric şəhərində yaşamışdır. Onun atası ABŞ Hərbi Hava Qüvvələri mayoru Kristofer Sammers ailəsini De Havilland DH-98 təyyarəsinə mindirir və təyyarə Şi'ar kosmik gəmisinin hücumuna məruz qalır. Təyyarə alovlar içində yerə düşərkən Skotun valideynləri onu və qardaşı Aleksi paraşüt ilə aşağı endirir və onların yaşayacaqlarına ümid edirlər.

Siklop "İks-adamlar" komiksinin ilk sayısında professor Çarlz Xavierin qəyyumluğu altında komandanın lideri olaraq göstərilir. Komikslərin müxtəlif sayılarında Skotun keçmişi barədə xatirələr ilə məlumat verilir. Onun gücünü idarə edə bilməməsinə əsas səbəb kimi uşaqlıq dönəmində yaşadığı hadisələr göstərilir. "Əsrarəngiz İks-adamlar" komiksinin 156-cı sayında Skotun paraşütdən düşərkən paraşütün alovlandığı və Skott yerə düşərkən başından zərbə aldığı bildirilir. İks-adamların üzvü olan telepat Emma Frost Siklopun optik enerji şüaları üzərində idarəetməni itirməsinə səbəbin Skotun uşaqlıq dövründə yaşadığı travmatik hadisələrə qarşı özündə yaratdığı mental qalxandır. Emmanın köməyi Skott qısa müddətliyinə mental qalxanı yararaq, güclərini idarə etməyə nail olmuşdur.

İks-adamlar

Siklop optik enerji şüası saçarkən

16 yaşında ikən Skott kimsəsizlər evindən qaçır və küçələrdə dolaşarkən Professor İks onu tapır. Kimsəsizlər evi nəzarətçisi ilə Nyu-Yorka səfər zamanı Skott bir tikinti sahəsinə yaxınlaşır və bir anda onun optik enerji şüaları aktivləşir. Nəticədə tikinti sahəsindəki kran zədələnərək, ətrafdakı kütləyə doğru düşməyə başlayır. Bunun qarşısını almaq üçün Skott ikinci bir enerji şüası ilə kranı darmadağın edir. Baş verənləri görən kütlə isə Skotu ələ keçirməyə çalışırlar. Skott qatara minərək, ərazidən qaçır. O, cinayətkar Cek O'Daymonds ilə qarşılaşır və onunla döyüşür. Professor İks Skotu xilas edərək, ətrafdakı əhalinin yaddaşını pozur. Daha sonra o, Skota İks-adamlara qoşulmağı təklif edir və Skot təklifi qəbul edərək, ilk rəsmi İks-adam olur.

İks-adamlar komandasının üzvü kimi ilk missiyasında o Maqneto ilə döyüşür. Daha sonra isə komanda ilə birlikdə Köpük ilə döyüşür. Skot komandanın üzvlərindən olan Cin Qreyə aşiq olur. O, daha sonra İks-adamlar ilə birlikdə ilk dəfə Mutant qardaşlığı ilə vuruşur. Tezliklə Xavier Skotu komandanın lider müavini olaraq seçir.

Siklop Cin Qrey ilə eşq münasibəti yaşayır. Nə vaxtsa optik şüaları ilə Cini incitməkdən və özünün incilməyindən qorxduğu üçün Skot Cinə qarşı olan hisslərini aylarla özünə belə etiraf etməkdən çəkinir. Skotu narahat edən digər bir mövzu isə özünün Cinə aşiq olan komanda yoldaşı Mələyə qarşı heç bir şansının olmadığını düşünməsi idi. Lakin Skot Cinin də ona aşiq olduğunu və addım atmağa çəkindiyindən xəbərsiz olur. Nəticədə onlar Buz adamın ad günündə bir-birlərinə qarşı olan hisslərini etiraf edərək, sevgili olurlar.

İks-adamlar Krakoa tərəfindən məğlub edildiyi zaman Siklop qaçmağa nail olan yeganə mutant olur. O, komanda yoldaşlarını xilas etmək üçün Professor İks ilə birlikdə Şimal porsuğu, Fırtına, Koloss, Gecə ilanı, Banşi, İldırım quşu və Günəş atəşinin yer aldığı yeni komanda yaradır. Yeni İks-adamların gəlişi ilə orijinal İks-adamlar (Mələk, Buz adam, Cin Qrey, Skotun qardaşı Havok və Polyaris) komandanı tərk edir və yalnız Siklop qalır.

Valideynlərinin təyyarə qəzasında həlak olduğunu düşünən Skot əslində onların Şi'ar imperiyası tərəfindən ələ keçirilərək, qul edildiyindən xəbərsiz olur. Siklop Şi'ar imperiyasında hökm sürən tiranlığa qarşı mübarizə aparan Ulduz söndürücülər komandasının lideri Korsar ilə görüşür. Korsarın əslində Skotun atası olduğunu anlayan Cin ona heçnə demir. İllər sonra o, atasının kimliyini öyrənir.

Siklop günəş şüaları üzərindən kosmik gəmini idarə etməyə çalışarkən həlak olan Cinin Zümrüd quşu kimi yenidən dünyaya gəlməsinin ardınca onun artıq əvvəlki kimi olmadığını anlayır və ona qarşı olan hislərini yenidən sorğulmağa başlayır. Cinin artıq onu sevmədiyinə inanan Skott bir müddət Kollin Vinq ilə görüşür. Daha sonra Muir adasında Proteusla döyüşərkən Skott və Cin yenidən bir araya gəlirlər. Cinin ölümündən bir neçə gün öncə Skott ona evlənmək təklif edir və Cin razılaşır. Cinin ölümündən sonra Siklop İks-adamları tərk edir. O, Li Forresterin kapitanlıq etdiyi balıqçı gəmisinə qoşulur. Gəmi səyahəti zamanı Linin atası şeytani məxluq olan D'Spayrın təsiri altına düşür. Siklop ilə D'Spayr arasındakı döyüş nəticəsində gəmi parçalanır. Skott ilə Li gözlərini Maqnetonun Bermud üçbucağında qurduğu bazasında açırlar.

Siklop tezliklə İks-adamlara geri dönür. Daha sonra isə o, Cinə çox bənzəyən Madelin Prayor ilə evlənir və İks-adamları yenidən tərk edir. Həyat yoldaşı ilə çətin günlər yaşayan Skott həm də İks-adamlardan kənar keçirdiyi həyata adaptasiya olmaqda çətinlik çəkir. O, İks-adamların liderliyini geri qazanmaq üçün Təhlükə otağında Fırtına ilə vuruşur. Mutant güclərinə sahib olmamasına baxmayaraq, Fırtına Siklopu məğlub edir. Madelin və Skotun Neytan adlı övladı dünyaya gəlir. Bunun ardınca Siklop ailəsinə geri dönür.

İks-Faktor və İnferno

Neytanın doğumundan qısa zaman sonra Cin Qreyin yaşadığı və əslində heç vaxt Zümrüd quşu olmadığı üzə çıxır. Zümrüd quşunun yaralanmış Cini Yamayka körfəzində buraxaraq, onun görüntüsünü və yaddaşını alan kosmik bir varlıq olduğu məlum olur. Zümrüd quşunun ölümündən illər sonra gerçək Cin Qreyi Qisasçılar və Fantastik dördlük aşkar edir. Cinin yaşadığını öyrənən Siklop ailəsini tərk edərək, "mutant ovçuları" kimi özlərini qələmə verən İks-Faktor komandasına qoşulur. Skotu itirməsinin ardınca ümidsizliyə qapılmasına baxmayaraq Madelin Payor yardım üçün İks-adamlara qoşulur və nəticədə komanda yoldaşları ilə birlikdə onun da Mutant soyqırımında həlak olduğu düşünülür.

Şeytani varlıqlar Madelinin ümidsizliyindən istifadə edərək onu Yaşıl Qoblinə dönməyə razı salırlar. Madelin onu tərk etdiyi üçün Skotdan qisas almaq istəyir. Onun əslində Skotun əleyhinə istifadə etmək üçün Mister Zalım tərəfindən yaradılan bir Cin Qrey klonu olduğu üzə çıxdıqdan sonra Madelin buna dözə bilmir və intihar edir. Skott Mister Zalımı optik enerji şüası ilə vuraraq onu öldürdüyünü düşünür. Skott Cin ilə sevgi macərasına yenidən başlayır və oğlu Neytanı da öz qəyyumluğuna götürür.

Qədim mutant Apokalipsis Neytanı texno-üzvi virusa yoluxdurur. Skott komanda yoldaşları ilə birlikdə Apokalipsisi məğlub edir, lakin virusun yayılmasının qarşısını almaq olmur. Çarəsiz qalan Skott oğlunu sağalması üçün gələcəyə göndərir.

Daha sonra İks-adamlar və İks-Faktor Professor İksin növbəti düşməni olan Kölgə kralı ilə mübarizə aparırlar. Kölgə kralını məğlub etdikdən sonra Siklop və digər İks-Faktor üzvləri yenidən İks-adamlara qoşulurlar. Skott yeni yaradılmış "Mavi komanda"nın lideri seçilir.

İks-adamlara geri dönüş

Siklop İks-adamlar Mavi komandanın lideri kimi

Siklopun komandaya geri dönüşünün ardınca Mavi komanda Qırmızı Omeqa və Əl komandasının ninjaları tərəfindən qaçırılır. Girov götürülmüş komanda üzvlərinin xilasından sonra Mister Zalım keçmiş İks-Faktor nümayəndəsi Kalibandan istifadə edərək, Strayf üçün Skott və Cin Qreyi ələ keçirir. Neytanın klonu olan Strayf Skott və Cinə Neytan olduğunu söyləyir. Kabel ləqəbi götürmüş Skotun gələcəyə göndərdiyi oğlu Neytan Strayf ilə döyüşür və hər ikisinin döyüşdə həlak olduğu düşünülür. Bunun ardınca İks-adamlar yenidən Omeqa Red ilə döyüşür. Skotun komanda yoldaşı Psaylok onu Cindən ayıraraq, ələ keçirməyə çalışır. Lakin Skott Cin ilə birlikdə qalır. Kabel gələcəkdən geri dönür və Skota gerçək Neytan olduğunu söyləyir.

İkinci evlilik

Skott Sammers və Cin Qrey nəhayət ki, evlənirlər. Onlar bal ayı üçün gələcəyə Neytanın yanına gedirlər. Neytana Apokalipsisi məğlub etməyə kömək etdikdən sonra onlar keçmişə geri dönürlər. Apokalipsis və Strayfın fırıldaqlarına alət olan Mister Zalım Skota daha bir Sammers qardaşının olduğunu söyləyir.

Professor İks Maqnetonun yaddaşını pozmağa çalışarkən Maqnetonun qaranlıq niyyətləri Xavierin şüuraltı qaranlıq zəkasını oyadır və nəticədə Professor İks Qırğın adlı qorxunc məxluqa dönüşür. İks-adamlar məxluqu məğlub edib, Xavieri azad etməyə nail olsalar da, baş verən döyüş nəticəsində Yer kürəsinin bir çox superqəhrəmanları yox olur. Qırğının yox olması gücsüz qalan Xavier həbs olunur, Skott və Cini isə komanda və məktəbə rəhəbr təyin edir. Lakin Bastionun təşkil etdiyi Sıfır Dözüm əməliyyatı çərçivəsində sinəsinə partlayıdıcı maddə quraşdırılan Skott nəticədə ağır yaralanır və mübarizənin ardınca Cin və Skott komandanı tərk etməyi qərara alırlar.

Şər ilə birləşmə

Professor İksin ruhi vəziyyətindən narahat olan Fırtına Skott və Cindən komandaya geri dönmələrini xahiş edir. Onların komandaya dönüşünün ardınca Apokalipsis tamamilə məğlubedilməz olmaq üçün xüsusi mexanizmdən istifadə edərək, seçilmiş 12 mutantın gücünü və Neyt Qreyin vücudunu ələ keçirməyi planlaşdırır. Neyti xilas etmək üçün Siklop Apokalipsis ilə birləşmək məcburiyyətində qalır. İlk öncə öldüyü düşünülən Skott daha sonra Cin və Kabel tərəfindən Misirdə tapılır. Onlar Apokalipsisin ruhunu məhv edərək, Skotu ondan ayırırlar.

Yeni İks-adamlar

İks-adamlara geri dönən Siklop Apokalipsisin təsiri altından çıxmasının ardınca xarakterində dəyişikliklər yaranır. Bu dəyişiklər Cin ilə onun arasında uçurum yaradır. Siklop Apokalipsisin təkcə Cinə qarşı olan münasibətini deyil, bütün həyatını sual altına qoyduğunu söyləyir. Siklop Ksorn adlı güclü bir mutantı intihar fikrindən daşındırmaqda əsas rol oynayır və daha sonra Ksorn İks-adamlara qoşulur. Onlar arasında böyük dostluq yaranır.

Zümrüd quşu gücü yenidən Cin üzərində öz təsirini göstərməyə başladıqdan sonra Skott və Cin arasındakı uçurum biraz da böyüyür. Cin bir neçə dəfə Skota yaxınlıq göstərməyə çalışsa da, Skott çox dəyişdiyini söyləyərək onu özündən uzaqlaşdırır. Münasibətlərinin vəziyyətindən çaşqın qalan Cin təsəllini Loqanda tapır. Onlar meşədə öpüşürlər, lakin Loqan Cinin yerinin Skotun yanı olduğunu söyləyir və onu orada tərk edir. Kassandra Novanın Professor İksi təsiri altına salmasının ardınca Xavier Yer kürəsini tərk edir və Cin məktəbin direktoru olaraq qalır. Cin bütün diqqətini direktor kimi yeni məsuliyyətlərinə və eyni zamanda böyüməkdə olan Zümrüd quşu gücünə verməli olur. Skott isə Cinin artıq ona məhəl qoymadığını düşünür. O, Cin ilə barışmağa çalışmaqdansa problemlərini Emma Frost ilə bölüşməyi seçir. Onların münasibəti psixoterapiya seansları ilə başlayır və qısa zaman sonra Emma fürsətdən istifadə edərək, Skota yaxınlaşmağa çalışır. Emma məsləhətləşmə adı ilə onunla telepatik əlaqəyə girməyə başlayır.

Cin onlar arasındakı münasibətin fərqinə varır, lakin Skott hər şeyi inkar edir. Emmanın alçaldıcı və istehzalı davranışları Cini daha da qəzəbləndirir və o, Zümrüd quşunun tam gücünü istifadə edərək Emmadan hər şeyi etiraf etməsini tələb edir. Emma Skota qarşı hiss etdiklərini Cinə etiraf etməyə məcbur qalır. Cin hər ikisinə qəzəblənir və onu sakitləşdirmək üçün Skott Cinə yaddaşını oxumağı təklif edir. Beləliklə Cin Emmanın Skota təklif etməsinə baxmayaraq, onlar arasında fiziki əlaqənin olmadığını öyrənir. Bunun ardınca Skott məktəbi tərk edir və Emma isə kristalik vəziyyətində parçalanmış olaraq tapılır. Onun Cin tərəfindən öldürüldüyü düşünülür.

Skott İks-adamların onun çiyinlərinə qoyduğu yükdən uzaqlaşmaq üçün Cəhənnəm Atəşi klubuna gedir. Daha sonra o Şimal porsuğu və Fantomeksi Asteroid M-ə yolculuqda müşayiət edir. Şimal porsuğu ilə keçirdiyi zaman ərzində onlar Cin barədə danışırlar. Skott İks-adamlara geri döndüyündə yeni komanda yoldaşı Ksornun İks-adamlara hücum etdiyinə şahid olur. Ksornun əslində Maqneto olduğu üzə çıxır. Cin Zümrüd quşunun tam gücü ilə Maqnetoya qarşı mübarizə apararkən nəticədə təzyiqə dözə bilmir və həlak olur. Son olaraq Skott onu incitdiyi üçün Cindən üzr istəyir.

Gücləri

Siklop gözlərindən qırmızı rəngdə olan yandırıcı və böyük gücə sahib olan enerji şüaları yayır. Onun hüceyrələri davamlı olaraq günəş enerjisi udur və həmin enerji sayəsində o gözlərinin önündə başqa kainatlara keçidlər açır. Optik enerji şüaları məhz həmin keçidlərdən saçılır. Yüksək qızmarlığa sahib olan şüalar polad və nəhəng dağda dəlik aça biləcək dərəcədə güclüdür. Optik şüalar Siklopun istəməsindən asılı olmayaraq yayılır və yalnız göz qapaqları vasitəsi ilə qarşısı alına bilir. O, yalnız xüsusi qoruyucu eynəkləri vasitəsi ilə ətrafına zərər vurmadan görə bilir. Skotun mutant gücünü idarə edə bilməməsinə əsas səbəb kimi isə uşaqlıq dönəmində yaşadığı travmatik hadisələr göstərilir.

Siklop eyni zamanda peşəkar pilot, əlbəyaxa döyüşçü və taktika ustasıdır.

Digər mediada

Filmlər

Siklop rolunu İks-adamlar, İks-adamlar 2 və İks-adamlar: Son müqavimət filmlərində aktyor Ceyms Marsden, İks-adamlar: Başlanğıc. Şimal porsuğu filmində aktyor Tom Pokok yeniyetmə Siklop rolunu, İks-adamlar: Apokalipsis və İks-adamlar: Qara zümrüd quşu filmlərində isə gənc Siklop rolunu aktyor Tay Şeridan canlandırmışdır.

İks-adamlar

İlk İks-adamlar filmində Siklop komikslərdə olduğu kimi komandanın lideri, məktəb müəllimi və Cin Qreyin sevgilisi kimi göstərilir. Siklop Fırtına ilə birlikdə Qılıncdişi məğlub edir, Şimal porsuğu və Roqu xilas edərək, İks-İqamətgaha gətirir. O, ilk öncə Şimal porsuğuna dostluq əlini uzatsa da, daha sonra Cinə qarşı olan fərqli münasibətinə görə ondan nifrət etməyə başlayır. Roqun iqamətgahdan qaçmasının ardınca o Fırtına Roqu tapmaq üçün qatar stansiyasına yollanırlar və orada onlar Qılıncdiş və Qurbağanın tələsinə düşürlər. Fırtınaya Qılıncdiş ilə döyüşdə yardım etmək istəyərkən Qurbağa Siklopun qoruyucu eynəyini çıxarır və nəticədə o optik şüaların tam gücü ilə stansiyanın tavanını dağıdır. Roq Maqneto tərəfindən girov götürülür. Professor İks Roqun qurtarılması üçün Siklop, Fırtına, Cin və Şimal porsuğunu xilasetmə missiyasına göndərir. Xavier Serebro vasitəsi ilə Roqun yerini təyin etməyə çalışarkən zəhərlənir və Siklop ona tələbələrin və komandanın qayğısına qalacağına söz verir. Azadlıq adasına gəldikləri zaman Şimal porsuğu Mistikin hücumuna məruz qalır. Qurbağa isə Siklopu qəfəsə salır, Cinin üzünə atdığı yapışqan tüpürcəyi ilə boğmağa çalışır və eyni zamanda Fırtına ilə döyüşür. Siklop optik şüaları ilə qəfəsi yarıb keçir və Cini boğulmaqdan qurtarır. Maqneto komanda üzvlərini ələ keçirir. Onlar Azadlıq heykəlində girov saxlanılarkən Cinin köməyi ilə Siklop Qılıncdişi heykəldən aşağı atmağa nail olur və nəticədə onlar azad olurlar. Filmin sonunda o Maqnetonu məğlub edir və Şimal porsuğu isə Roqu xilas edir.

İks-adamlar 2

Filmin başlığında Cin Skota çox dəhşətli bir hadisənin baş verəcəyindən narahat olduğunu söyləyir, lakin Skott ona heçnə olmayacağına inandırır. Şimal porsuğu iqamətgaha geri dönür və təbii ki, Siklop bu vəziyyətdən heç məmnun deyil. Siklop plastik kamerada həbs saxlanılan Maqnetonu ziyarət etmək üçün Professor İksə əməkdaşlıq edir. Lakin o professoru gözləyərkən Yuriko Oyama və kamera gözətçilərinin hücumuna məruz qalır. Xavieri xilas etməyə can atan Siklop ani bir həmlə ilə Oyama tərəfindən vurularaq, huşsuz vəziyyətdə yerə yıxılır. O Professor İks ilə birlikdə Uilyam Strayker tərəfindən girov götürülür. Strayker Siklopun beynini yuyur və İks-adamları ələ keçirmək üçün onu iqamətgaha geri qaytarır. İqamətgahda Cinin yaralanması ilə nəticələnən döyüş baş verir. Straykerin təsiri altından çıxdıqdan sonra Siklop yaralı Cini Straykerin bazasından qaçırır. Komanda təyyarəyə minib ərazini tərk etməyə hazırlaşarkən Cin İks-adamları sudan xilas etmək üçün qalmağı seçir. Cin alovabənzər Zümrüd quşuna dönüşür. Siklop komanda yoldaşlarından geri dönməyi tələb etsə də, artıq gec olur. O, Cinin özünü qurban verməsinə görə qəzəblənir.

İks-adamlar: Son müqavimət

Cinin ölümü ilə hələ də barışa bilməyən Siklop onu son dəfə gördüyü Alkali gölünə geri dönür. O Cinin səsini eşidir və bunun gerçək olduğuna inanmadığından səsin kəsilməsi üçün yalvarır. Bundan qəzəblənən Siklop eynəyini çıxararaq optik şüalarını bütün gücü ilə gölün üzərinə saçır və bunun ardınca Cin gölün içindən çıxır. O Siklopa gücünü idarə edə biləcəyini söyləyərək, ondan eynəyini çıxarmasını istəyir. Skott eynəyini çıxardıqdan sonra Cin onun şüalarını neytrallaşdırır və Skotun gözləri normala dönür. Lakin Zümrüd quşunun gücünü tam idarə edə bilməyən Cin öpüşərkən Skotu öldürür. Onun ölüm səhnəsi filmdə göstərilməsə də, eynəyini havada uçarkən görən komanda yoldaşları onun artıq yaşamadığını güman edirlər. Filmin sonunda onun məzarı Çarlz Xavierin məzarının yanında göstərilir.

İks-adamlar: Başlanğıc. Şimal porsuğu

Filmdə Skotun gəncliyi göstərilir. İlk öncə o məktəbdə qoruyucu eynəklərini taxdığı üçün müəlliməsi tərəfindən danlanılır. Daha sonra isə Qılıncdiş Uilyam Straykerin mutant analizlərində istifadə etməsi Skotu ələ keçirməyə çalışır. Ondan qaçmağa çalışarkən Skotun eynəyi yerə düşür və optik enerji şüasının yayılması nəticəsində məktəb binası parçalanır. O nəticədə girov götürülür və gözləri bağlı saxlanılır. Daha sonra Şimal porsuğunun Straykerin bazasına hücumunun ardınca Skott qaçmağa nail olur. O, eyni zamanda digər mutantlara da qaçışda yardım edir. Ardınca o Professor İksin telepatik səsini dinləyərək digər mutantlar ilə birlikdə Professor İksin gözlədiyi helikopterə minirlər.

İks-adamlar: Apokalipsis

Filmdə baş verən hadisələr keçmişdə orijinal İks-adamların yeniyetmə olduqları zamanda cərəyan edir. Cin ilə ilk görüşdə mübahisə yaşadıqdan sonra Skott ondan üzr istəyir. Qoruyucu eynəyini aldıqdan sonra onlar Kurt Vaqner ilə birlikdə maşın ilə gəzməyə gedirlər. İqamətgaha geri döndüklərində onlar Apokalipsis və süvarilərinin Xavieri qaçırmağa çalışarkən onları dayandırmağa çalışan Havokun qəza ilə Qaraquşu partlatdığını və qəzada həlak olduğunu öyrənirlər. Qardaşının öldüyünə inanmaq istəyən Skott onu iqamətgahda axtarmağa başlayır və bu anda telepatik gücün mənbəyini araşdırmaq üçün Straykerin ordusu iqamətgaha daxil olur. Skott, Cin və Kurt qaçmağa nail olan yeganə iqamətgah sakinləri olur və onlar Straykeri izləyirlər. Digər İks-adamları xilas etdikdən sonra Skott Apokalipsis ilə son döyüşdə iştirak edir və nəticədə Apokalipsis məğlub edilir.

Video oyunlar

• "The Uncanny X-Men" (1989)
• "X-Men: Madness in Murderworld" (1989)
• "X-Men II: The Fall of the Mutants" (1990)
• "X-Men" (1992)
• "Spider-Man and the X-Men in Arcade's Revenge" (1992)
• "X-Men" (1993)
• "X-Men" (1994)
• "X-Men: Mutant Apocalypse" (1994)
• "X-Men: Children of the Atom" (1994)
• "X-Men: Gamesmaster's Legacy" (1995)
• "X-Men 2: Clone Wars" (1995)
• "X-Men vs. Street Fighter" (1996)
• "X-Men: Mojo World" (1996)
• "X-Men: The Ravages of Apocalypse" (1997)
• "Marvel vs. Capcom: Clash of Super Heroes" (1998)
• "Marvel vs. Capcom 2: New Age of Heroes" (2000)
• "X-Men: Mutant Academy" (2000)
• "X-Men: Mutant Wars" (2000)
• "X-Men: Mutant Academy 2" (2001)
• "X-Men: Reign of Apocalypse" (2001)
• "X-Men: Next Dimension" (2002)
• "X-Men Legends" (2004)
• "X-Men Legends II: Rise of Apocalypse" (2005)
• "Marvel: Super Hero Squad Online" (2009)
• "Marvel: Ultimate Alliance" (2009)
• "Marvel: Ultimate Alliance 2" (2011)
• "Marvel: Avengers Alliance" (2011)
• "Ultimate Marvel vs Capcom 3" (2011)
• "Lego Marvel Super Heroes" (2013)
• "Marvel Heroes" (2013)
• "Marvel Contest of Champions" (2014)
• "Marvel: Future Fight" (2015)
• "Uncanny X-Men: The Days of Future Past" (2014)
• "X-Men: Destiny" (2014)

Xarici keçidlər

• Siklop Marvel Dünyası Vikisində