Tağı Tağızadə

Tağı Ələkbər oğlu Tağızadə (4 sentyabr 1923, Bakı – 25 noyabr 1998, Bakı) — Azərbaycanlı epidemioloq, tibb elmləri doktoru, professor, Azərbaycan SSR əməkdar elm xadimi (1981).

Tağı Tağızadə
Tağızadə Tağı Ələkbər oğlu
Doğum tarixi	4 sentyabr 1923
Doğum yeri	Bakı, Azərbaycan SSR
Vəfat tarixi	25 noyabr 1998 (75 yaşında)
Vəfat yeri	Bakı, Azərbaycan
Vətəndaşlığı	SSRİ→ Azərbaycan
Həyat yoldaşı	Zərəngiz Tağızadə
Elm sahəsi	Epidemiologiya
Elmi dərəcəsi	tibb elmləri doktoru (1964)
Elmi adı	professor (1965)
İş yerləri	Elmi Tədqiqat Epidemiologiya, Gigiyena və Peşə Xəstəlikləri İnstitutunun direktoru
Alma-mater	Azərbaycan Dövlət Tibb İnstitutu
Təhsili	Ali
Mükafatları

Həyatı

T. Ə. Tağızadə 1942-ci ildə Azərbaycan Dövlət Tibb İnstitutunun müalicə-profilaktika fakültəsini bitirmişdir. O, əmək fəaliyyətinə 1942-ci ildə Kəlbəcər rayonunda əvvəl epidemioloq və parazitoloq, sonra isə rayon səhiyyə şöbəsinin müdiri, 1943–1944-cü illərdə Yevlax rayonunda sanitar-epidemioloji stansiyanın və eyni zamanda tropik stansiyanın rəisi, 1944–1945-ci illərdə Quba rayon dövlət sanitariya müfəttişi vəzifələrində çalışmışdır.

1945-ci ildə N. Nərimanov adına ADTİ epidemiologiya kafedrasına assistant vəzifəsinə seçilmişdir. 1956–1962-ci illərdə müalicə-profilaktika fakültəsinin dekan müavini, 1966–1968-ci illərdə sanitariya-gigiyena fakültəsinin dekanı olmuşdur. 1962–1966, 1981–1988-ci illərdə Elmi-Tədqiqat Tibbi Parazitologiya və Tropik Təbabət İnstitutunun, 1988–1992-ci illərdə isə Elmi tədqiqat Epidemiologiya, gigiyena və peşə xəstəlikləri institutunun direktoru vəzifəsində işləmişdir.

1964-cü ildən 1992-ci ilə qədər ATU-nun epidemiologiya kafedrasının müdiri, 1992–1998-ci illərdə kafedranın professoru olmuşdur.

1968–1975-ci illərdə Səhiyyə Nazirliyinin baş epidemioloqu, 1984–1992-ci illərdə isə baş parazitoloqu olmuşdur.

1974-cü ildən 1992-ci illər ərzində Azərbaycan epidemioloqları, mikrobioloqları və parazitoloqlarının elmi cəmiyyətinin, Səhiyyə Nazirliyinin problem komissiyasının, ATU-nun nəzdindəki İxtisaslaşdırılmış şuranın, profil həkimlərinin attestasiya Komissiyasının sədri, "Azərbaycan Tibb", "Tibbi parazitologiya və parazitar xəstəliklər" (Moskva) jurnallarının redaksiya heyətinin, keçmiş SSRİ-də bir çox cəmiyyət və elmi şuraların üzvü olmuşdur.

Geniş erudisiyalı və hərtərəfli biliyə malik olan professor T. Ə. Tağızadə öz elmi-pedaqoji fəaliyyətinin 55 ili ərzində infeksion və parazitar xəstəliklərin öyrənilməsi və onlarla mübarizənin təşkili sahəsində elm və praktikanı qiymətli məlumatlarla zənginləşdirən çoxsaylı tədqiqat işləri aparmışdır.

Tədqiqatları, əsasən, leptospiroz, malyariya, helmintozlar və salmonelyoz xəstəliklərinin epidemiologiyasına həsr olunmuşdur. 1 dərslik, 4 monoqrafiya, 7 dərs vəsaiti, 18 elmi-kütləvi kitabça, 300-ə qədər elmi məqalə nəşr etdirmişdir. Onun rəhbərliyi ilə 11 doktorluq və 26 namizədlik dissertasiyası müdafiə olunmuşdur.

Professor T. Ə. Tağızadənin xidmətləri hökumət tərəfindən yüksək qiymətləndirilmişdir. O, Səhiyyə əlaçısı (1954), Şərəf nişanı ordeni (1971), bir sıra medallar, SSSR-i və Azərbaycan SSR Səhiyyə nazirliklərinin, Azərbaycan Ali Soveti Rəyasət heyətinin fəxri fərmanları ilə təltif olunmuşdur. 1981-ci ildə ona Azərbaycanın əməkdar elm xadimi fəxri adı verilmişdir.

Xarici keçidlər

• "TİBB DÜNYASI" Epidemologiya, İ. Ağayev, X. Xələfli, F. Tağıyeva, 2012 Bakı. [1]
• "Modern.az" informasiya agentliyi [2]
• Azərbaycan Respublikası Təhsil Nazirliyi "Tağızadə Tağı Ələkbər oğlu" [3]
• "Yadigarlar" — Tağı Tağızadə — 12.06.2018 [4]
• Görkəmli alim Tağı Tağızadənin 90 illik yubileyi qeyd olunmuşdur.[5]
• Görkəmli alim Tağı Tağızadənin 100 illik yubileyi qeyd olunmuşdur.[6]