Vikipediya:Vikipediyanı kimlər yazır?
Siz yazırsınız Bəli, istənilən şəxs |cəsur ola və yeni məqalə yaza və ya mövcud məqaləyə düzəlişlər edə bilər. Bunu etmək üçün sizdən hər hansı təlimdə iştirak etmək tələb olunmur. Vikipediyada yazan və redaktələr edən istifadəçilər müxtəlif ölkələrdəndir və texniki bacarığı olan, yaxşı araşdırma qabiliyyəti olan, daha yaxşı məzmun hazırlaya bilən və ya təşkilati bacarığı olan fərqli insanların hesabına ensiklopediya inkişaf edir. İstənilən töhfə verən şəxslər qeydiyyatdan keçib-keçməməsindən asılı olmayaraq vikipediyaçı və ya formal olaraq redaktəçi adlanır. Vikipediyanın böyüməsi və kütləviləşməsi ilə Vikipediyada digər istifadəçi qrupları da yaranmışdır.
Kim Vikipediyaya töhfə verir? redaktə
Azərbaycanca Vikipediyada hal-hazırda 289.582 qeydiyyatdan keçmiş istifadəçi var. Həmçinin sayları dəqiq bilinməsə də böyük sayda istifadəçi də qeydiyyatdan keçmədən fəaliyyət göstərir. Hər ay təxminən 700 yeni istifadəçi qeydiyyatdan keçir. İndiyə qədər minlərlə istifadəçi vikipediyada məqalə yazıb, redaktə edib. Son 30 gündə 627 istifadəçi fəaliyyət göstərib.
Redaktəçilər Vikipediyaya necə töhfə verirlər? redaktə
İstənilən məqalənin məzmunu istifadəçilər arasında müzakirə oluna bilər və sonda konsensus yolu ilə yekun nəticə əldə olunur. Vikipediya kağız deyil, yəni biz burada istənilən mövzuda heç bir limit olmadan məzmun yaza bilərik. Bununla belə, bizim nə yazmağımızda və necə yazmağımızda müəyyən çərçivələr var. Əgər məqalə yarımçıq qalıbsa və ya səliqəsiz görünürsə, siz məqaləni daha yaxşı şəkilə salmaq üçün redaktə edə bilərsiniz. Məqalələrin yuxarısında problemləri göstərən bildirişlər əlavə edə bilərsiniz. Həmçinin hələ Vikipediyada yazılmamış bir mövzuda yeni məqalə də yazmaq mümkündür.
Qeyd olunmuş informasiyanın düzgün olmağımı yoxlamaq üçün həmin fikri təsdiq edən etibarlı mənbələr (kitab, qəzet, jurnal, televiziya xəbərləri və ya digər saytlar) tapmaq lazımdır. Vikipediyaya yalnız etibarlı mənbələrlə təsdiq oluna bilən fikirləri əlavə etmək mümkündür, burada orijinal araşdırmaya yer verilə bilməz. Detallı göstərilmiş mənbələr oxuculara məlumatın doğru-olub olmadığını yoxlamağa imkan verir.
Böyük istifadəçi qrupu hər hansı mövzu üzərində işləyəndə fikir ayrılıqları ola bilər. Belə halda Vikipediya məqalələrində hər hansı bölməyə və ya bütün məqaləyə məzmunun neytrallığının mübahisə doğurması ilə bağlı bildiriş qoyulur. Mübahisəli mövzularda, güncəllənən hadisələrlə bağlı məqalələrdə və ya ziddiyətli fikirlər olan mövzularda bu hal qaçılmaz olur. Yekun nəticə əldə etmək üçün müzakirədə iştirak etmək istəyən istifadəçi məqalənin müzakirə səhifəsində öz fikirlərini qeyd edə bilər. Bütün istifadəçilər konsensusa çatmaq üçün səy göstərirlər, istənilən etibarlı mülahizə ədalətli şəkildə məqalədə qeyd oluna bilər. Bu özünəməxsusluq Vikipediyanı yalnız məlumat bazası yox, həm də əməkdaşlıq yerinə çevirir. Vikipediyada çox istifadəçi məqalənin tarixçəsinə baxaraq məqalənin nə vaxt yaradılmasına, köhnə məzmununa və kimlərin məqalə üzərində işlədiklərinə baxırlar. Siz həmçinin istədiyiniz məqalənin müzakirə səhifəsinə keçərək məqalə ilə bağlı digər istifadəçilərin hansı fikirlər yazdıqlarını oxuya bilərsiniz.
Vikipediyanın ən keyfiyyətli məqalələri seçilmiş məqalələr siyahısında göstərilib. Bu məqalələr vikicəmiyyətin qərarı ilə "seçilmiş" status qazanıb.