Məhəbbət Mirzəliyeva

Məhəbbət Mirzəliyeva
Doğum tarixi	17 oktyabr 1949(1949-10-17)
Doğum yeri	Bakı, Azərbaycan SSR, SSRİ
Vəfat tarixi	2016
Elm sahəsi	filologiya
İş yerləri	AMEA Dilçilik İnstitutu, Azərbaycan Memarlıq və İnşaat Universiteti
Təhsili	BDU Filologiya fakültəsi

Həyatı

1966-cı ildə Bakı şəhərindəki 74 saylı orta məktəbi gümüş medalla bitirərək Bakı Dövlət Universitetinin (keçmiş S.M.Kirov adına Azərbaycan Dövlət Universiteti) filologiya fakültəsinə daxil olmuşdur. 1971-ci ildə Bakı Dövlət Universitetinin filologiya fakültəsini bitirmişdir. 1971-1972-ci tədris ilində Ali təhsili başa vurduqdan sonra təyinatla Quba şəhər internat məktəbində tərbiyəçi-müəllim işləmişdir. 1972-ci ildə AMEA Nəsimi adına Dilçilik İnstitutunun əyani aspiranturasına daxil olmuşdur.

Elmi yaradıcılığı

1975-1981-ci illərdə institutun türk dilləri şöbəsində kiçik elmi işçi, 1981-1993-cü illərdə böyük elmi işçi vəzifəsində çalışmışdır. 2002-ci ilin yanvarında AMEA Nəsimi adına Dilçilik İnstitutu türk dilləri şöbəsinin müdiri vəzifəsinə seçilmişdir. Hal-hazırda AMEA Dilçilik İnstitutunun direktor meavini vəzifəsində çalışır.

Elmi rəhbərliyi ilə 9 nəfər fəlsəfə doktoru alimlik dərəcəsinə layiq görülmüşdür. Hal-hazırda 4 elmlər doktoru, 6 fəlsəfə doktoru proqramı üzrə doktorant və dissertantın elmi rəhbəridir. 10-larla elmi monoqrafiyanın redaktoru və rəyçisi, eləcə də 1998-2010-cu illərdə “Tədqiqlər” toplusunun baş redaktoru olmuşdur. 2012-ci ildən yenidən nəşrə başlamış “Tədqiqlər”in baş redaktorudur. 2002-ci ildən İnstitutda fəaliyyət göstərən Bakı Dilçilik Məktəbinin rəhbəridir. 2002-2012-ci illərdə Bakı Slavyan Universiteti nəzdində fəaliyyət göstərən müdafiə şurasının üzvü olmuşdur. 2012-ci ildən isə AMEA Dilçilik İnstitutu nəzdindəki müdafiə şurasının üzvüdür. 2010-cu ildən Respublika Elmi Tədqiqatların Təşkili və Əlaqələndirilmə Şurası Dilçilik üzrə Problem Şurasınuın elmi katibidir.

Pedaqoji fəaliyyətinə gəlincə, elmi fəaliyyətlə paralel surətdə 1991-1993-cü illərdə Azərbaycan İnşaat Mühəndisləri İnstitutunda, 1996-2000-ci illərdə isə Azərbaycan Xarici Dillər Universitetində pedaqoji fəaliyyət göstərmişdir. 1993-1996-cı illərdə Azərbaycan Respublikası Prezidentinin İcra Aparatının humanitar siyasət şöbəsində məsləhətçi işləmişdir. 1996-2001-ci illərdə Azərbaycan Respublikası Prezidentinin yanında Ali Attestasiya Komissiyasının humanitar və ictimai elmlər şöbəsinin rəisi vəzifəsində fəaliyyət göstərmişdir. İctimai fəaliyyəti haqqında şağıdakıları qeyd etmək olar: 1972-1990-cı illərdə Nəsimi adına Dilçilik İnstitutunun komsomol və partiya təşkilatlarına rəhbərlik etmiş, 1985-1990-cı llərdə Azərbaycan Elmlər Akademiyası partiya komitəsinin və rayon partiya komitəsinin üzvü olmuşdur. 1985-1993-cü illərdə Azərbaycan Respublikası Ali Məhkəməsinin xalq iclasçısı seçilmişdir. 2005-ci ildə Akademiyanın 60 illik yubileyi, 2009-cu ildə isə anadan olmasının 60 illiyi münasibətilə AMEA-nın Fəxri Fərmanına layiq görülmüşdür.

Ankara (2008), Pekin (2008), İzmir (2010 mart və dekabr), Tekirdağ (2010), Ədirnə(2011) və İstanbulda(2012) keçirilən beynəlxalq simpozium və konfranslarda məruzələrlə çıxış etmişdir. 2 elmi monoqrafiya, 1 şer kitabı, 80 elmi məqalə və tezisin müəllifi, 4 kollektiv monoqrafiyanın həmmüəllifidir.

Əsərləri

• 1. “Oğuz qrupu türk dillərinin müqayisəli qrammatikası”. II hissə. Morfologiya. Bakı, 1986 - Kollektiv monoqrafiya («Oğuz qrupu türk dillərində felin idarə və məna növləri», «Oğuz qrupu türk dillərində əvəzlik», «Oğuz qrupu türk dillərində modal sözlər» bəhslərinin müəllifi).
• 2. Türk dilləri frazeologiyasının nəzəri problemləri. Bakı,1995
• 3. “Oğuz qrupu türk dillərinin qrammatikası”.III hissə, Sintaksis. Bakı, 2002 - kollektiv monoqrafiya («Sintaktik əlaqələr» bəhsinin müəllifi)
• 4. “Türk dillərinin tarixi-müqayisəli leksikologiyası məsələləri”, I cild, Bakı,2004 - Kollektiv monoqrafiya («Məna növ şəkilçili bəzi fellərin etimoloji təhlili», «Dilin lüğət tərkibi. Təşəkkül, inkişaf və təkmilləşmə (mülahizə ıə düşüncələr») bəhslərinin müəllifi)
• 5. “Türk dillərinin tarixi-müqayisəli leksikologiyası məsələləri”, II cild, Bakı, 2008 - Kollektiv monoqrafiya («Dilin leksikasının tədqiqi dilin təşəkkül və inkişaf tarixinə yol açmaqdır» ön sözünün müəllifi).
• 6. “Türk dillərinin frazeologiyası”. 3 cilddə. I cild. Bakı, 2009 - («Türk dilləri frazeologiyasının nəzəri problemləri», «Karluk qrupu türk dillərinin frazeologiyasına dair»).