Zəif dazıotu

Hypericum perforatum L. (H. komarovii Gorschk., H. nachitschevanicum Grossh.) Hündürlüyü 15-75 sm, gövdəsi tək və ya bir kökdən bir neçə gövdə çıxır, düz qalxan, adətən iki tərəflidir, orta hissədən yuxarısı budaqlanmış, sarımtıl və ya qəhvəyitəhər-yaşıl olan çoxillik

çılpaq ot bitkisidir. Yarpaq Yarpaqları enli-oval və ellipsvari formadan uzunsov-yumurtaşəkilli, uzunsov və uzunsov-xətvari formaya qədər şəklini dəyişir, adətən kütdür, uzunluğu 5-25 mm, eni 3-12 mm-dir, qaidə hissəsində demək olar ki, ürəkşəkillidir, yastıdır və çox vaxt kənarları qismən aşağı qatlanmışdır, parlaq, işığı keçirən və seyrək, qara nöqtə şəklində olan vəziciklərlə örtülüdür. Çiçək: Çiçəkləri gövdənin təpə hissəsində və yan budaqlarda yerləşib və çoxsaylıdır, süpürgəvari, demək olar ki, qalxanşəkilli çiçək qrupunda toplanmışdır. Meyvə: Qutucuğu uzunsov-yumurtaşəkillidir, uzunluğu 6-7 mm, eni 4-5 mm-dir, qəhvəyi rəngdədir, uzunsov və dəyirmi vəzili qovuqcuqları vardır. Toxumları silindrşəkillidir, qəhvəyi rəngdədir, uzununa xırda deşiklidir. Çiçəkləməsi: May-Avqust Meyvə verməsi: İyul-Sentyabr Azərbaycanda yayılması: Azərbaycanın bütün rayonlarında, nadir hallarda Kür- Araz oval. Ovalıqdan subalp qurşağına qədər, əsasən meşəli rayonlarda. Yaşayış mühiti: Kolluqlarda, meşənin kənarında, otlu yamaclarda, alaqlı yerlərdə, çay vadilərində rast gəlinir. Təsərrüfat əhəmiyyəti: Dərman, boyaq əhəmiyyətli və aşı maddəli bitkidir. Bitkidən hazırlanmış preparat tənəffüs yolları xəstəliklərində, həmçinin qarın işləməsində müalicə məqsədilə istifadə olunur.