Qəribə soğan

Allium paradoxum (Bieb.) G. Don fil. Hündürlüyü (5) 10-25 (30) sm olan bitkidir. Soğanağı yumurtaşəkilli və ya şarşəkilli olub, qalınlığı 1 sm-ə qədərdir və boz qınlıdır. Gövdəsi zəifdir, bir ədəd kökətrafı yarpağı vardır, onunla birgə rəngsiz dəriciyə oxşar qın geyinmişdir. Yarpaq: Yarpaq demək olar ki, gövdəyə bərabərdir və ya ondan uzundur, xətvarineştərşəkillidir, eni 5-15 mm-dir, ortdan və ya aşağıdan qaidəsinə doğru daralmış və kütdür. Qını ağ rəngli, pərdəşəkillidir, qaidəsinə qədər iki uzunsov-neştərvari qanadlara bölünmüşdür, çətirdən qısadır. Çiçək: Çətirinin 1-5 (8) ədəd əyilən çiçək saplağı vardır, çox vaxt soğanaqla olur; çiçək saplağı çiçəklərə bərabər və yaxud ondan 1,5 dəfə uzun olur, çiçək altlığı yoxdur. Çiçək yanlığı enlizınqırova oxşar, tutqun-ağ rəngli olub,üzərində limon sarısı rəngdə çalarları vardır. Çiçəkləməsi: Aprel Meyvə verməsi: Aprel-May Azərbaycanda yayılması: BQ (Quba), BQ şərq, KQ şimal, KQ mərkəzi, KQ cənub, Lənk. dağ. Aşağı dağ qurşağından, orta dağ qurşağına kimi. Yaşayış mühiti: Meşələrdə, kolluqlarda və meşənin kənarlarında rast gəlinir. Təsərrüfat əhəmiyyəti: Yarpaqları qida kimi istifadə olunur.