Ağa Nemətulla: Redaktələr arasındakı fərq

Gələcəyi görmək bacarığı onda mövcud daxili qüvvənin, qırılmaz iradənin, işgüzarlığın nəticəsi idi. Çox əziyyətlərə sinə gərən Ağanın həddi-hüdudu olmayan sənət eşqi, təntənəyə, qələbəyə böyük inamı onun adını neftçi mütəxəssislər arasında yüksəltmiş, çox-çox fərqləndirmişdir. Onun iş və əməyinə fikir verəndə şübhə etmirsən ki, bu böyük insan hünər, fədakarlıq, qəhrəmanlıq, şücaət göstərmək üçün dünyaya gəlmişdir.

Yaradıcılıq eşqi, qurub-tikmək arzusu ta qədimdən bu günə qədər insanın ölməzlik axtarışlarının təzahürüdür. «Özümün deyil, izimin qalması üçün çalışmaq» - insan duyğularının gözəlliyi, böyüklüyü, dahiliyidir! İnsanın dünyada qoyduğu iz, cığır - onu əbədiyyətə aparacaq yeganə yoldur.

Cəsarətli yenilikçilik, yeni texnikadan və sənayenin başqa ehtiyatlarından bacarıqla istifadə etmək, əmək məhsuldarlığını yüksəltmək, maya dəyərini ucuzlaşdırmaq, vəsait və materiala qənaət etmək A.Nemətullanın güddüyü nəcib məqsəd olmuşdur. O, həmişə deyərdi ki, yaxşı nəticə əldə etmək üçün texniki silahlanma, əməyin təşkili, kadrların düzgün yerləşdirilməsi, nizam-intizam və insanlar arasında münasibət ən vacib işdir.

Alimlər, mühəndislər, geoloqlar və digər mütəxəssislər açıq dənizdə neft çıxarmaq imkanı olduğunu sübut etdikdə, Ağa Nemətulla bu cəsarətli fikrə tərəfdar olmuşdur. Xəzər dənizinin dibində tükənməz neft ehtiyatının olduğunu aşkar etmiş, 1269 və 1270 nömrəli buruqlar, heç bir çətinlikdən qorxmayan Ağanın nələrə qadir olduğunu göstərdi. O, həmin buruqları dənizdə qazıb, vaxtından qabaq istismara verdi.

Neft Daşları yatağının açılması və işlənməyə daxil olmasında, ümumiyyətlə, dəniz neftinin inkişafına və ilk dəfə olaraq dünya təcrübəsində açıq dənizdə Ağa Nemətullanın maili qazma metodunun təcrübəsindən və konkret şəraitdə kust meydançasından bir neçə quyunun qazma təcrübəsindən geniş istifadə olunmuşdur.

Onun təzadlı ömründə əqidə saflığı, ədalət, xeyirxahlıq, səxavət, xalq və torpaq sevgisi, kişi sözü həmişə bayraq kimi olmuşdur. Zəhmət və zəka yolunun əzablı, keşməkeşli labirintləri ilə zirvəyə yüksəlmiş Ağa Nemətullanın keçdiyi zamanca kiçik, mahiyyəti, məzmunu və məna yükünə görə böyük ömür marafonuna nəzər salanda, adam böyük iftixar hissi keçirir. Məhz zəhmətinin, fitri istedadının gücünə o, hələ sağ ikən neftçıxarma tarixinə düşmüşdür.

== Mükafatları ==

O, iki Lenin ordeni və başqa orden, medallarla təltif edilib. Bakı küçələrindən və Xəzər Gəmiçiliyi İdarəsinin gəmilərindən birinə Ağa Nemətulla adı verilmişdir.

== İstinadlar ==