Çoxçiçəkli evkalipt

Çoxçiçəkli evkalipt
Çoxçiçəkli evkalipt
Elmi təsnifat
	Domen: Eukariotlar Klad: Diaphoretickes Ranqsız: Arxeplastidlər Aləm: Bitkilər Klad: Streptofitlər Klad: Embryophytes Klad: Polysporangiophytes Klad: Tracheophytes Klad: Toxumlu bitkilər Klad: Çiçəkli bitkilər Klad: Eudicots Klad: Core eudicots Klad: Superrosids Klad: Rosids Klad: Malvids Dəstə: Mərsinçiçəklilər Fəsilə: Mərsinkimilər Yarımfəsilə: Myrtoideae Triba: Eucalypteae Cins: Evkalipt Növ: Çoxçiçəkli evkalipt
Beynəlxalq elmi adı
	Eucalyptus polyanthemos Schauer;
ITIS	27190
NCBI	183847
EOL	633030

Çoxçiçəkli evkalipt (lat. Eucalyptus polyanthemos) — bitkilər aləminin mərsinçiçəklilər dəstəsinin mərsinkimilər fəsiləsinin evkalipt cinsinə aid bitki növü.

Təbii yayılması

Təbii arealı cənub-şərqi Avstraliya, Aralıq dənizi sahilləri, Afrika, Mərakeşdir. Qara dəniz sahillərində geniş əkin sahələrinə malikdir.

Botaniki təsviri

Hündürlüyü 18 m, diametri 30 sm-ə qədər olan, ortaboylu, həmişəyaşıl ağacdır. Gövdəsinin qabığı tünd qırmızı rəngli, ağır, bərk, pulcuqlu-lifli, cavan zoğlarda isə hamardır. Cavan yarpaqları 3-5 ədəd olmaqla növbəli yerləşmiş, saplaqlı, forması dairəvi, uzunluğu 4-8 sm, eni 4 sm, mavi çalarlı və ya bozumtuldur. Yetkin yarpaqları saplaqlı, növbəli düzülmüş, dar və ya enli neştərə bənzəyir, uzunluğu 5-14 sm, eni 1,5-4,5 sm olmaqla, açıq kül rənglidir. Çiçək qrupu 3–6 çiçək çətirindən ibarət olub, üst tərəfdən çətir çiçək qrupu əmələ gətirir. Çətir saplağı silindrvari, uzunluğu 5-10 mm, qönçələrin saplağı boz rəngli, sancaqvari olub, uzunluğu 7 mm, diametri 4 mm, konusvari qapaqcıqlı, lakin çiçək yatağının saplağından qısadır; tozcuq qutusu bitişik yuvacıqlı, xəncərvari və ya dördbucaqlı, sonunda məsamələri vardır. Meyvəsi saplaqlı, yarımdairəvi, yumurta və ya armudvari, uzunluğu 5-6 mm, eni 4-5 mm, kiçik diskin yanları basılmış haldadır.

Ekologiyası

Rütubətsevən bitkidir, quru subtropik iqlim şəraitində becərilir.

Azərbaycanda yayılması

Abşeron, Lənkəran və Azərbaycanın bir çox bölgələrində mədəni şəraitdə becərilir.

İstifadəsi

Bitki Abşeronun iqlim şəraitinə davamlı olub, yaşıllaşdırmada istifadə üçün əlverişlidir.

Yarımnövləri

Eucalyptus polyanthemos subsp. polyanthemos
Eucalyptus polyanthemos subsp. vestita L.A.S.Johnson & K.D.Hill