Ülvü Qənizadə

Ülvü Qənizadə (1 yanvar 1999, Sumqayıt) — Azərbaycanı təmsil edən yunan-roma güləşçisi; 2023-cü il Avropa Çempionatının və 2024-cü il Dünya Çempionatının qalibi.

Ülvü Qənizadə
Ülvü Qənizadə 2021-ci il Dünya Çempionatında
Şəxsi məlumatlar
Tam adı	Ülvü Aslan oğlu Qənizadə
Vətəndaşlığı	Azərbaycan
Doğum tarixi	1 yanvar 1999(1999-01-01) (25 yaş)
Doğum yeri	Sumqayıt, Azərbaycan
Boyu	166 sm. (5 ft 1 in)
İdman növü	Güləş
Karyera illəri	2015—
Məşqçisi	Elnur Müzəffərov
Komandası	Neftçi İdman Klubu
Medallar Dünya Çempionatı Gümüş 2022 Belqrad 72 Kq. Qızıl 2024 Tirana 72 Kq. Avropa Çempionatı Bürünc 2020 Roma 72 Kq. Bürünc 2022 Budapeşt 72 Kq. Qızıl 2023 Zaqreb 72 Kq. Gümüş 2024 Buxarest 72 Kq.
Vikianbarda əlaqəli mediafayllar

Karyerası

Ülvü Qənizadə 2015-ci ilin avqustunda Bosniya və Herseqovinanın Sarayevo şəhərində baş tutan yeniyetmələr arasında Dünya Çempionatının bürünc medalına sahibi oldu.

Daha sonra Ülvü Qənizadə 2016-cı ilin martında İranın Tehran şəhərində baş tutan Yadigar İmamın xatirəsinə həsr olunan beynəlxalq turnirdə gümüş medalın sahibi oldu. Həmin ilin iyulunda İsveçdə baş tutan yeniyetmələr arasında Avropa Çempionatının bürünc medalına sahib olan Ülvü Qənizadə, sentyabrda Gürcüstanda baş tutan yeniyetmələr arasında Dünya Çempionatının final görüşündə Qırğızıstan nümayəndəsi Ağyol Mahmudova məğlub olaraq turnirin gümüş medalına sahib oldu.

2017-ci ilin iyununda Almaniyanın Dortmund şəhərində baş tutan gənclər arasında Avropa Çempionatında mübarizə aparmaqla gənclərin turnirlərində debüt edən Ülvü Qənizadə, ümumi nəticədə 12-ci pillədə qərarlaşdı.

2018-ci ilin mayında Qazaxıstanda baş tutan Jaqsiliq Üşqempirovun xatirəsinə həsr olunan beynəlxalq turnirin qalibi olan Ülvü Qənizadə, həmin ayda Rusiyada baş tutan hərbçilər arasında Dünya Çempionatının final görüşündə Rusiya nümayəndəsi Adam Quraqa məğlub olaraq turnirin gümüş medalına sahib oldu. Daha sonra o, iyunda İstanbul şəhərində baş tutan 23 yaşlılar arasında Avropa Çempionatında 11-ci pillədə qərarlaşdı. İyulda İtaliyanın Roma şəhərində gənclər arasında Avropa Çempionatının həlledici görüşündə Rusiya təmsilçisi Məhəmməd Yarbilov üzərində qələbə qazanaraq turnirin qalibi olan Ülvü Qənizadə, sentyabrda Trnava şəhərində gənclər arasında Dünya Çempionatında uğursuz nəticə göstərdi və 24-cü pillənin sahibi oldu.

2019-cu ilin aprelində Rumıniyanın Buxarest şəhərində Avropa Çempionatlarında debüt edən Ülvü Qənizadə, turniri 10-cu pillədə başa vurdu. Daha sonra o, iyunda İspaniyada gənclər arasında Avropa Çempinatında 8-ci pillənin sahibi olsa da, avqustda Estoniyanın Tallin şəhərində baş tutan gənclər arasında Dünya Çempionatının final görüşündə Rusiya nümayəndəsi Sergey Stepanova məğlub olaraq turnirin gümüş medalına layiq görüldü.

Ülvü Qənizadə 2020-ci ildə İtaliyanın Roma şəhərində baş tutan Avropa Çempionatının bürünc medalına sahib oldu.

2021-ci ildə isə Ülvü Qənizadə Norveç şəhərində (Norveç) baş tutan Dünya Çempionatını 8-ci pillədə başa vursa da, Belqrad şəhərində (Serbiya) şəhərində baş tutan U23 Dünya Çempionatının bürünc medalına sahib oldu.

Ülvü Qənizadə 2022-ci ildə əvvəlcə İstanbul şəhərində baş tutan Vəhbi Əmrənin xatirəsinə həsr olunan beynəlxalq turniri onuncu pillədə başa vursa da, daha sonra Budapeşt şəhərində Avropa Çempionatının bürünc, Roma şəhərində Matteo Pellicone Turnirinin və Konya şəhərində V İslam Həmrəyliyi Oyunlarının gümüş medallarına sahib oldu. Serbiyanın Belqrad şəhərində baş tutan və ilin əsas turniri hesab olunan Dünya Çempionatında isə Ülvü Qənizadə turniri gümüş medalla başa vurdu.

2023-cü ildə Ülvü Qənizadə əvvəlcə Xorvatiyanın Zaqreb şəhərində baş tutan Zagreb Open beynəlxalq turnirində mübarizə aparsa da, turniri 22 idmançı sırasında 20-ci pillədə başa vurdu. Apreldə isə Ülvü Qənizadə Avropa Çempionatında mübarizə apardı. 1/8 final mərhələsində Ukrayna nümayəndəsi Andrey Kuliyə 4:1, 1/4 final mərhələsində Bolqarıstan nümayəndəsi Devid Dimitrova 4:1, 1/2 final mərhələsində isə Türkiyə nümayəndəsi Səlcuq İnana 2:1 hesabları ilə qalib gələn Ülvü Qənizadə, turnirin final görüşündə Fransa nümayəndəsi İbrahim Qanema 8:8 hesabı ilə qalib gəldi və Avropa Çempionatının qalibi oldu. Həmin il Macarıstanda Varga Yanos beynəlxlq turnirinin gümüş medalına sahib olan Ülvü Qənizadə Serbiyada Dünya Çempionatında uğursuz çıxış elədi və turniri 12-ci pillədə başa vurdu.

Karyerasının ən uğurlu mövsümü 2024-cü ilə təsadüf edən Ülvü Qənizadə yanvarda Zaqreb şəhərində (Xorvatiya) Zagreb Open beynəlxalq turnirinin qalibi olsa da, fevralda Buxarest şəhərində (Rumıniya) Avropa Çempionatını gümüş medalla başa vurdu. İlin əsas turnirində — Tirana şəhərində (Albaniya) baş tutan Dünya Çempionatında isə Qənizadə bütün rəqibləri üzərində qələbə qazanaraq dünya çempionu oldu.

Nəticələri

Sıra	İl	Yarış	Ev sahibi	Nəticə
1	2015	Yeniyetmələrin Dünya Çempionatı	Bos. və Herseqovina	3.
2	2016	Yadigar İmam Turniri	İran	2.
3		Yeniyetmələrin Avropa Çempionatı	İsveç	3.
4		Yeniyetmələrin Dünya Çempionatı	Gürcüstan	2.
5	2017	Gənclərin Avropa Çempionatı	Almaniya	12.
6	2018	Jaqsiliq Üşqempirov Turniri	Qazaxıstan	1.
7		Hərbçilərin Dünya Çempionatı	Rusiya	2.
8		U-23 Avropa Çempionatı	Türkiyə	11.
9		Gənclərin Avropa Çempionatı	İtaliya	1.
10		Gənclərin Dünya Çempionatı	Slovakiya	24.
11	2019	Avropa Çempionatı	Rumıniya	10.
12		Gənclərin Avropa Çempionatı	İspaniya	8.
13		Gənclərin Dünya Çempionatı	Estoniya	2.
14	2020	Avropa Çempionatı	İtaliya	3.
15		Fərdi Dünya Çempionatı	Serbiya	12.
16	2021	Dünya Çempionatı	Norveç	8.
17		U-23 Dünya Çempionatı	Serbiya	3.
18	2022	Vəhbi Əmrə Turniri	Türkiyə	10.
19		Avropa Çempionatı	Macarıstan	3.
20		Matteo Pellicone Turniri	İtaliya	2.
21		İslam Həmrəyliyi Oyunları	Türkiyə	2.
22		Dünya Çempionatı	Serbiya	2.
23	2023	Zagreb Open	Xorvatiya	20.
24		Avropa Çempionatı	Xorvatiya	1.
25		Varga Yanos Turniri	Macarıstan	2.
26		Dünya Çempionatı	Serbiya	12.
27	2024	Zagreb Open	Xorvatiya	1.
28		Avropa Çempionatı	Rumıniya	2.
29		Varga Yanos Turniri	Macarıstan	8.
30		Dünya Çempionatı	Albaniya	1.