İlyas Həsənov (geoloq)

İlyas Saleh oğlu Həsənov(1927, Goranboy, Xan­qərvənd kəndi - 2002, Bakı) ― geologiya-minerologiya elmləri doktoru (1990), Əməkdar geoloq (1991), Azərbaycan Milli Elmlər Akademiyasının müxbir üzvü (2001), Ekoenergetika Akademiyasının həqiqi üzvü (1997).

İlyas Həsənov
İlyas Saleh oğlu Həsənov
Doğum tarixi	1927
Doğum yeri	Goranboy rayonu, Xan­qərvənd kəndi
Vəfat tarixi	2002
Vəfat yeri	Bakı
Vətəndaşlığı	SSRİ→ Azərbaycan
Milliyyəti	azərbaycanlı
Atası	Saleh Həsənov
Elmi dərəcəsi	geologiya-minerologiya elmləri doktoru (1990)
Təhsili	Azərbaycan Dövlət Neft və Sənaye Universiteti
Üzvlüyü	Azərbaycan Milli Elmlər Akademiyasının müxbir üzvü (2001) Ekoenergetika Akademiyasının həqiqi üzvü (1997)
Mükafatları	Əməkdar geoloq (1991)

Haqqında

İlyas Həsənov 1927-ci ildə Goranboy rayonunun Xanqərvənd kəndində anadan olub. O, 1952-ci ildə Azərbaycan Dövlət Neft və Sənaye Universitetinin Geoloji-kəşfiyyat fakültəsini Mühəndis-geoloq ixtisası üzrə bitirib.

Əmək fəaliyyəti

İlyas Həsənov əmək fəaliyyətinə Kompleks Elmi Tədqiqat Dəniz Geofi­ziki Eks­pe­di­siyasında geoloq olaraq başlayıb. Daha sonra neftçıxarma üzrə Azərbay­can Elmi Tədqiqat İnstitutunda geofiziki dəstə rəisi, şöbə müdirinin müavini olub. 1965-ci ildən Ümumittifaq Elmi Tədqiqat Geofizika İnstitutunun Azər­baycan fili­alında baş geoloq, laboratoriya müdiri vəzifələrini icra edib. 1988-ci ildən Azər­bay­can Elmi Tədqiqat Geofizika İnstitutunda Kompleks geofiziki-geoloji tədqiqat­lar laboratoriyasının müdiri olub.

Elmi fəaliyyəti

İlyas Həsənov 1966-cı ildə fəlsəfə doktoru, 1990-cı ildə geologiya-minerologiya üzrə elmlər doktoru elmi dərəcələrini alıb. O, 2001-ci ildə Azərbaycan Milli Elmlər Akademiyasının müxbir üzvü seçilib. Pedaqoji fəaliyyətlə məşğul olan İlyas Həsənov Bakı Dövlət Universitetinin Coğrafiya fakültəsinin Fiziki coğrafiya kafedrasında geofizika fənni üzrə 6 ildən artıq mühazirələr oxuyub.

İlyas Həsənov 200-dən artıq elmi əsərin, habelə 6 monoqrafiya, 6 bro­şür, 4 xəritə və 1 kəşfin müəllifidir. Alim "Azərbaycanın neftli-qazlı və pers­pektivli struk­turlarının atlası", "Xəzər dənizinin neftli-qazlı və perspektivli strukturlarının atlası", "Cənubi Xəzər neft-qazlı höv­zəsinin və perspektivli strukturlarının atla­sı"­nın müəllifi və həmmüəllifi olub. Azərbaycan Milli Elmlər Akademiya­sının Rəyasət Heyəti, Ali Attestasiya Komissiyası yanında geoloji məzmunda xəritə və atlaslar üzrə Ekspert qrupunun üzvü olub.

İlyas Həsənov geoloji-geofiziki ümumiləşdirmə və tektonika sahəsində Azərbay­canda aparıcı alimlərdən biri olub. Onun iştirakı və rəhbərliyi ilə Orta və Cənub Xəzər çökəkliklərinin çöküntü komplekslərinin geoloji və dərinlik geoloji qu­ru­luşu, dərinlik yarılmaları, geoloji inkişaf tarixi, tektonik rayonlaşdır­ma və ərazinin neftlilik-qazlılıq perspektivlərinə dair bir sıra əsərlər çap olunub. Onun rəhbərliyi və iştirakı ilə Azərbaycanın Xəzər dənizi­nin, Cənub Xəzər neft-qaz hövzəsinin, yeni məlumatlar əsasında bir daha Azər­baycanın neftli-qazlı pers­pek­tiv strukturları, Avropa və Asiyanın mezo-kaynozoy şelflərinin paleocoğrafi xəritələri və atlaslarının bütöv bir seriyası hazırlanıb.

Vəfatı

İlyas Həsənov 2002-ci ildə Bakıda vəfat edib.

Mükafatları

İlyas Həsənov 1967-ci ildə Azərbaycan SSR Ali Soveti Rəyasət Heyətinin Fəxri Fərmanı, 1970-ci ildə "Azərbaycanın milyardıncı ton nefti", 1977 və 1987-ci illərdə isə SSRİ Geologiya Nazirliyinin "Yer təki kəşfiyyatının əlaçısı" nişanları ilə təltif edilib. Alim 1991-ci ildə Azərbaycan Respub­likasının "Əməkdar geo­loqu" fəxri adına layiq görülüb. 1994-cü ildə SSRİ Elm­lər Akademiyasının insti­tutları ilə birlikdə "Me­zo­zoy və kaynozoyda Avrasiya şelfinin paleocoğrafi xəritələr atlası"nın tərtib edil­məsində iştira­kına görə H.Z.Tağıyev adına Milli Mükafata layiq görülüb.