İndoneziya Həmkarlar İttifaqları Konfederasiyası
İndoneziya Həmkarlar İttifaqları Konfederasiyası (ind. Konfederasi Serikat Pekerja Indonesia) — İndoneziyanın milli həmkarlar ittifaqları təşkilatlarından biri; ölkə əməkçilərini cəmləşdirən ən irimiqyaslı və aparıcı təşkilatdır[1] Mərkəzi ofisi ölkənin paytaxtı olan Cakarta şəhərində yerləşir.
| İndoneziya Həmkarlar İttifaqları Konfederasiyası | |
|---|---|
| ind. Konfederasi Serikat Pekerja Indonesia | |
| Növü | Həmkarlar ittifaqı |
| Yaranma tarixi |
1992 2003 |
| Mərkəzi | Cakarta |
| Sədr | Rustam Aksan |
Tarixi
redaktəİndoneziya Həmkarlar İttifaqları Konfederasiyasının yaranmasının təsdiq edilməsi 1992-ci ildə bu məqsədlə keçirilmiş konfransda qərara alınmışdır. Həmin vaxt Cakartada 104 ictimai təşkilat və həmkarlar ittifaqı fəalları yığışmışdır.[1]
Fəaliyyətinin ilk illərində qurum İndoneziya Ticarət İşçilərinin Təşkilatı adını daşımışdır. Çünki o dövr ölkənin əsas işçi qüvvəsini ticarət sahəsində çalışanlar təşkil edirdi və həmin illər İndoneziyada ticarət sektorunun çiçəklənmə dövrü idi. Bu sahə sürətlə inkişaf edirək, dövlət büdcəsinə külli miqdarda gəlir gətirirdi.[1]
2003-cü ildə təşkilatın adı dəyişdirilərək İndoneziya Həmkarlar İttifaqları Konfederasiyası olur. Həmin illərdə Konfederasiyanın tərkibində 11 təşkilat və 300 min üzv birləşirdi.[1]
Təşkilatın yaranmasından sonra qarşıya bir sıra çətinliklər çıxmışdır. Belə ki, fəaliyyətinin ilk illərində nə hökumət, nə də sahibkarlar onun mövcudluğunu heç cür qəbul edə bilmirdi. 1993-cü ildə konfederasiya tarixinin ən faciəli qalmaqalını yaşamışdır. Belə ki, həmin il yüzlərlə polis əməkdaşı təşkilatın ilk konqresi zamanı toplaşan kütləyə güc tətbiq etməklə onları dağıtmağa başlamışdı. Tabe olmaq istəməyən konqres iştirakçıları 40 dəqiqə ərzində polis işçilərinə müqavimət göstərmişdi. Nəticədə təşkilatın fəallarından üç nəfər həlak olmuş, 250 nəfər həbs edilmiş, konqresə müxtəlif ictimai təşkilatlardan qatılan 2.500 nəfər isə polisə tabe olmadığına görə işdən azad olunmuşdu. Bu hadisədən kifayət qədər sarsılan qurum bir müddətdən sonra yenidən fəaliyyətə başlamağa çalışır. Sarsıdıcı günləri arxada qaldıqca, fəaliyyətini daha da gücləndirir. İşçilərin tam müdafiəsini təmin etmək, əhalinin sosial-iqtisadi bərabərliyinə nail olmaq üçün yeni proqramlar hazırlayır və həyata keçirir.[1]
Tərkibi
redaktəKonfederasiyanın 2.100.000 üzvü var. Qurum özündə həm leqal, həm də qeyri-leqal iqtisadiyyatda çalışan işçiləri cəmləşdirir.[1]
Rəhbəri
redaktəTəşkilatın hazırkı prezidenti Rustam Aksandır.
Xarici əlaqələri
redaktəKonfederasiya Beynəlxalq Əmək Təşkilatının üzvüdür və onun tərəfindən hazırlanan layihələrin fəal iştirakçısıdır. Bu layihələrdən biri ölkədə tikiləcək yeni metallurgiya müəssisələri ilə əlaqədardır. Konfederasiya Beynəlxalq Əmək Təşkilatının maliyyə və təşkilati dəstəyi ilə hələ 2012-ci ildə həmin müəssisələrdə çalışan sahə işçiləri üçün seminarlar təşkil etmişdir. Bu layihəyə əsasən, artıq işçilərin özləri sahibkar kimi fəaliyyət göstərəcəklər. Bu isə onların sosial-iqtisadi durumunun yaxşı tərəfə dəyişəcəyi deməkdir.[1]
Mənbə
redaktə- ICTUR et al.,, redaktorTrade Unions of the World (6th). London, UK: John Harper Publishing. 2005. ISBN 0-9543811-5-7.
İstinadlar
redaktə- ↑ 1 2 3 4 5 6 7 Afaq HÜSEYNOVA. İndoneziya Həmkarlar İttifaqları Konfederasiyası Arxivləşdirilib 2016-03-05 at the Wayback Machine. "Ülfət" qəzeti, 04.05.2013. (az.)