Şahbala Məmmədov
Məmmədov Şahbala Ağqırax oğlu (1 iyun 1936, Qazax) — Azərbaycanın əməkdar iqtisadçısı (1978), Dövlət Statistika Komitəsi sədrinin müavini, Baş Hesablama Mərkəzinin direktoru, "Şərəf nişanı" ordeni (1981).
| Şahbala Məmmədov | |
|---|---|
 | |
| Doğum tarixi | 1 iyun 1936 (88 yaş) |
| Doğum yeri | |
| Elm sahəsi | iqtisadiyyat |
| Mükafatları |
  |
Həyatı
redaktəQazax rayonunun Yuxarı Salahlı kəndində 1936-cı il iyunun 1-də doğulmuş, onillik məktəbi Aşağı Salahlı orta məktəbində başa vurmuşdur. Karl Marks adına Xalq Təsərrüfatı İnstitutunun ticarət-iqtisad fakültəsinə daxil olmuş, bu ali məktəbi statistika ixtisası üzrə bitirmişdir (1958). Moskvada SSRİ Nazirlər Soveti yanında Xalq Təsərrüfatı Akademiyası İxtisasartırma İnstitutunda tam kurslar dinləmişdir (1986).
Fəaliyyəti
redaktəƏmək fəaliyyətinə təyinatla Şəmkir rayonunda başlamış, orada 1959-cu ilin yanvarında əhalinin siyahıyaalınmasını respublika rayonları arasında birinci olaraq, dəqiq və keyfiyyətlə yerinə yetirdiyinə görə respublika Ali Sovetinin fəxri fərmanına layiq görülmüşdür. Dərhal mərkəzi idarəyə işə dəvət edilən Ş. A. Məmmədov həyatının 50 ildən çoxunu Dövlət Statistika Komitəsində çalışmış, burada əsaslı tikinti və mənzil-kommunal təsərrüfatı şöbəsinin iqtisadçısı, baş iqtisadçısı və həmin şöbənin rəisi işləmişdir. 1968-ci ilin aprelində İdarənin maşın-hesablama stansiyasının rəis müavini təyin edilmiş, sonra hesablama mərkəzi direktorunun müavini olmuşdur. Ş. A. Məmmədov 1976-cı ilin martından Respublika Hesablama Mərkəzinin direktoru olmaqla, Dövlət Statistika Komitəsi sədrinin müavinidir. Azərbaycanın statistika orqanlarının son 50 ildəki inkişaf yolu, kiçik bir idarədən geniş şəbəkəsi olan dövlət strukturuna çevrilməsi, idarənin elm və texnikanın son nailiyyətləri ilə təchiz olunması bilavasitə Ş. A. Məmmədovun adı, fəliyyəti və şəxsi təşəbbüsləri ilə bağlıdır. Milli statistikamızın dünya standartlarına cavab verən bir struktur olaraq, formalaşmasında bu müstəsna xidmətlərinə görə onu öz xidməti sferasında "statistikamızın patriarxı" da adlandırırlar.
Ş. A. Məmmədov respublikada statistika kadrlarının hazırlanmasına öz töhfəsini vermiş, istehsalatdan ayrılmamaqla 8 il Xalq Təsərrüfatı İnstitutunda ixtisas fənnindən dərs demiş, 20 il statistika və iqtisadi kibernetika bölmələrində dövlət imtahan komissiyasının sədri olmuşdur. Paralel olaraq, Maliyyə-Kredit Texnikumunda da dövlət imtahan komissiyasının sədri idi. Ş. A. Məmmədovun fəaliyyəti dövlət tərəfindən yüksək qiymətləndirilmiş, "Şərəf nişanı" ordeni (1981), fəxri fərmanlar və bir sıra dövlət mükafatları ilə təltif edilmişdir.
2012-ci ilin əvvəlindən təqaüdə çıxmış, dövlət qulluğu təqaüdünü alır.
Ailəsi
redaktəÖmür-gün yoldaşı Fəridə Vəli qızı Ayvazova fizika-riyaziyyat elmləri namizədi, Neft Akademiyasının pedaqoqudur. İki oğlu, dörd nəvəsi vardır.
Fəaliyyəti boyu neçə-neçə gənclərə hami qayğısı göstərmiş, onlara peşə inkişafından tutmuş, həyati-məişət məsələrinin həllinə qədər bacardığı köməkliyi göstərmişdir. Düşüncəli, mühakiməli, təmkinli şəxsiyyət olduğundan ömrü boyu ətrafında olan insanlara və işdə təmasda olduğu əməkdaşlara qardaş və ata qayğısı ilə yanaşmış, məhz, bu xüsusiyyətlərinə görə, hazırda Salahlı elinin ağsaqqalı sayılır.
Əsərləri
redaktəAzərbaycan Respublikasının mərkəzi mətbuatında statistika mövzusunda dərc olunmuş onlarla məqalənin müəllifidir.
Mənbə
redaktə- İsmayıl Umudlu. Salahlı eli. Tarix-etnoqrafiya-insanlar-yurd bilgisi. Bakı, Apostroff nəşriyyatı, 2011, səh 832 və 812.
Həmçinin bax
redaktə- Mehdixan Vəkilov
- Səməd Vurğun
- Yusif Səmədoğlu
- Vaqif Səmədoğlu
- Cavanşir Vəkilov
- İsmayıl Umudlu