Anna Qurbanova
Anna Qurbanova (24 sentyabr 1986, Moskva) — Azərbaycanı təmsil edən bədii gimnast.[1]
| Anna Qurbanova | |
|---|---|
 Anna Qurbanova 2009-cu ildə | |
| Şəxsi məlumatlar | |
| Tam adı | Anna Rüstəmovna Qurbanova |
| Vətəndaşlığı |
 Rusiya →  Azərbaycan |
| Doğum tarixi | 24 sentyabr 1986 (37 yaş) |
| Doğum yeri | |
| Boyu | 166 sm. (5 ft 6 in) |
| İdman növü | Bədii gimnastika |
| Məşqçisi | Mariana Vasileva |
Karyerası redaktə
Anna Qurbanova Azərbaycanı 2004-cü ildə Yunanıstanın Afina şəhərində baş tutan XXVIII Yay Olimpiya Oyunlarında təmsil elədi.[2] 2003-cü ildə Budapeşt şəhərində (Macarıstan) baş tutan Dünya Çempionatının nəticələrinə əsasən əslində Dinarə Gimatova olimpiya lisenziyasına sahib olsa da, avqustda Patras şəhərində (Yunanıstan) təlim-məşq toplanışları zamanı Dinarə Gimatovanın ayağı burxuldu və yığmanın məşqçiləri onu 17 yaşlı Anna Qurbanova ilə əvəzlədi.[3]
Anna Qurbanova Afina Olimpiadasında avqustun 26-da mübarizə apardı.[2][4] Anna Qurbanova təsnifat mərhələsinin birinci günündə halqa ilə proqramda 22.775 bal, top ilə proqramda isə 23.525 bal topladı.[2][5] Təsnifat mərhələsinin birinci günündən sonra Anna Qurbanova 46.300 balla 14-cü pillədə qərarlaşdı.[2][5] Təsnifat mərhələsinin növbəti günündə Anna Qurbanova gürzlərlə proqramda 22.800 bal, iplə proqramda isə 23.200 bal topladı.[2] Ümumi nəticədə Anna Qurbanova turniri 92.300 balla 24 gimnast sırasında 14-cü pillədə başa vurdu.[2]
Karyerası ərzində Anna Qurbanova birinci uğurlarına isə 2007-ci ildə imza atdı. Həmin ilin iyununda Azərbaycanda baş tutan Avropa Çempionatında Aliyə Qarayeva, Anna Qurbanova və Dinarə Gimatovadan ibarət Azərbaycan yığması turnirinin nəticələrinə əsasən bürünc medalların sahibi oldu. Sentyabrda isə Aliyə Qarayeva, Anna Qurbanova və Dinarə Gimatovadan ibarət Azərbaycan yığması bu səfər Yunanıstanın Patras şəhərində baş tutan Dünya Çempionatının bürünc medallarına sahib oldu. Həmin Dünya Çempionatını Anna Qurbanova 15-ci pillədə başa vurdu. Bu nəticələrə əsasən Anna Qurbanova olimpiya lisenziyası üçün tələb olunan pillədə qərarlaşsa da, bir Milli Olimpiya Komitəsini olimpiada da ancaq 2 idmançı təmsil edə bilərdi. Belə olan halda 6-cı pillənin sahibi Aliyə Qarayeva və 14-cü pillənin sahibi Dinarə Gimatova olimpiya lisenziyasına sahib oldu.
2008-ci ildə olimpiadada çıxış eləməyən Anna Qurbanova 2009-cu ildə Avropa və Dünya Çempionatlarında növbəti uğurlarına imza atdı. Mayda Azərbaycanda baş tutan Avropa Çempionatında Aliyə Qarayeva, Anna Qurbanova və Zeynəb Cavadlıdan ibarət Azərbaycan yığması turnirin gümüş medallarına sahib oldu. Fərdi turnirlərdə isə Anna Qurbanova topla proqramda 27.850 bal topladı və Avropa Çempionatını bürünc medalla başa vurdu. Sentyabrda Yaponiyanın İse şəhərində baş tutan Dünya Çempionatında Aliyə Qarayeva, Anna Qurbanova və Zeynəb Cavadlıdan ibarət Azərbaycan yığması növbəti dəfə Dünya Çempionatını bürünc medalla başa vurdu.
Karyerası ərzində bir sıra beynəlxalq turnirlərdə də medallara sahib olan Anna Qurbanova 2010-cu ilin sentyabrında Rusiyada baş tutan Dünya Çempionatında Aliyə Qarayeva və Samirə Mustafayevanın da olduğu Azərbaycan yığması ilə birgə turniri bürünc medalla başa vurdu. Ardıcıl üç Dünya Çempionatında bürünc medala sahib olan Anna Qurbanova 2011-ci ildə 25 yaşında idmanla vidalaşdı.
İstinadlar redaktə
- ↑ Olympedia.org. "Anna QURBANOVA". www.olympedia.org (ingilis). 2022-08-30. 2022-08-30 tarixində arxivləşdirilib. İstifadə tarixi: 30.08.2022.
- ↑ 1 2 3 4 5 6 Olympedia.org. "2004 Summer Olympics / Rhythmic Gymnastics / Individual / Women". www.olympedia.org (ingilis). 2022-08-30. 2022-05-30 tarixində arxivləşdirilib. İstifadə tarixi: 30.08.2022.
- ↑ Azərbaycan Dövlət İnformasiya Agentliyi. "AZƏRBAYCANIN YIĞMA OLİMPİYA KOMANDASINDA DƏYİŞİKLİK EDİLMİŞDİR". www.azertag.az (az.). 2022-08-30. 2022-08-30 tarixində arxivləşdirilib. İstifadə tarixi: 30.08.2022.
- ↑ Azərbaycan Dövlət İnformasiya Agentliyi. "AVQUSTUN 26-DA ANNA QURBANOVA OLİMPİYA OYUNLARINDA İLK DƏFƏ ÇIXIŞ EDƏCƏK". www.azertag.az (az.). 2022-08-30. 2022-05-30 tarixində arxivləşdirilib. İstifadə tarixi: 30.08.2022.
- ↑ 1 2 Azərbaycan Dövlət İnformasiya Agentliyi. "GİMNASTIMIZ ANNA QURBANOVA OLİMPİADADA ÖZ ÇIXIŞLARINA BAŞLAMIŞDIR". www.azertag.az (az.). 2022-08-30. 2022-05-30 tarixində arxivləşdirilib. İstifadə tarixi: 30.08.2022.