Bayram Mustafayev

Bayram Bəxtiyar oğlu Mustafayev (23 may 1987; Bakı, Azərbaycan SSR) — Azərbaycanı təmsil edən cüdoçu. 2016-cı ildə XV Yay Paralimpiya Oyunlarında gümüş medala sahib olub.

Bayram Mustafayev
Bayram Mustafayev 2016-cı il Yay Paralimpiya Oyunlarında
Şəxsi məlumatlar
Tam adı	Bayram Bəxtiyar oğlu Mustafayev
Vətəndaşlığı	Azərbaycan
Doğum tarixi	23 may 1987
Doğum yeri	Bakı, Azərbaycan SSR
İdman növü	Cüdo
Məşqçisi	Bəxtiyar Mustafayev
Medallar Paralimpiya Oyunları Gümüş 2016 Rio-de-Janeyro -66 Kq. Dövlət təltifləri

Həyatı

Bayram Mustafayev 1987-ci il mayın 23-də Bakı şəhərində anadan olub. Şəxsi məşqçisi Bəxtiyar Mustafayevdir.

Karyerası

Bayram Mustafayev 2011-ci ildə Kroli şəhərində (Birləşmiş Krallıq), 2013-cü ildə isə Eger şəhərində (Macarıstan) baş tutan Avropa Çempionatlarının qalibi oldu.

Bayram Mustafayev 2012-ci ildə London şəhərində (Birləşmiş Krallıq) baş tutan XIV Yay Paralimpiya Oyunlarında mübarizə apardı. Paralimpiadanın birinci görüşündə Rusiya nümayəndəsi Vihtor Rudenhoya qalib gələn Bayram Mustafayev, 1/4 final mərhələsində Çin nümayəndəsi Xu Jaoya məğlub oldu və mübarizəni təsəlliverici qrupda davam elədi. Bu mərhələnin birinci görüşündə Bayram Mustafayev Əlcəzair nümayəndəsi Sid Ali Lamriya məğlub oldu və turniri yeddinci pillədə başa vurdu.

Bayram Mustafayev 2014-cü ildə Kolorado Sprinqs şəhərində (ABŞ) Dünya Çempionatının qızıl medalına sahib oldu.

2015-ci ildə Odivelaş şəhərində (Portuqaliya) baş tutan Avropa Çempionatında da qızıl medala sahib olan Bayram Mustafayev, üçüncü dəfə Avropa Çempionatının qalibi oldu.

Bayram Mustafayev 2016-cı ildə Rio-de-Janeyro şəhərində (Braziliya) baş tutan XV Yay Paralimpiya Oyunlarında mübarizə apardı. 1/4 final mərhələsində Braziliya nümayəndəsi Halison Oliveira Botoya qalib gələn Bayram Mustafayev, 1/2 final mərhələsində 1996-2004-cü illərdə ardıcıl üç dəfə Paralimpiya Oyunlarının qalibi olan Yaponiya nümayəndəsi Satoşi Fujimotonu ipponla məğlub elədi və Paralimpiadanın finalı görüşünə vəsiqə qazandı. Həlledici görüşdə onun rəqibi Özbəkistan nümayəndəsi Uthircon Niqmatov oldu. Həmin görüşdə rəqibinə məğlub olan Bayram Mustafayev, XV Yay Paralimpiya Oyunlarının gümüş medalına sahib oldu.

Azərbaycan Prezidenti İlham Əliyevin 21 sentyabr 2016-cı il tarixli Sərəncamına əsasən XV Yay Paralimpiya Oyunlarında qazandığı nailiyyətlərə və Azərbaycan idmanında xidmətlərinə görə Bayram Bəxtiyar oğlu Mustafayev 3-cü dərəcəli "Vətənə xidmətə görə" ordeni ilə təltif edildi.

Bayram Mustafayev 2017-ci ilin mayında IV İslam Həmrəyliyi Oyunlarında mübarizə apardı. Final görüşündə Elçin Talıbova məğlub olan Bayram Mustafayev, turniri gümüş medalla başa vurdu.

Bayram Mustafayev 2017-ci ildə Uolsoll şəhərində (Birləşmiş Krallıq), 2019-cu ildə isə Genuya şəhərində (İtaliya) baş tutan Avropa Çempionatlarının final görüşlərində məğlub oldu və gümüş medallara sahib oldu.

Bayram Mustafayev həmdə 2018-ci ildə Odivelaş şəhərində (Portuqaliya) Dünya Çempionatınında mübarizə apardı və turnirin qalibi oldu.