Elçin Cəfərov (idman xadimi)

Elçin Cəfərov (azərb. Elçin Lənkəran oğlu Cəfərov‎) — Milli Olimpiya Komitəsinin üzvü, 2010-cu ildən Azərbaycan Güləş Federasiyasının Yunan-Roma güləşi üzrə vitse-prezidenti

Elçin Cəfərov
Şəxsi məlumatlar
Tam adı	Elçin Lənkəran oğlu Cəfərov
Vətəndaşlığı	Azərbaycan
Doğum tarixi	7 fevral 1959-cu il
Doğum yeri	Ağdam, Azərbaycan
İdman növü	Güləş
Medallar Qızıl Gümüş Bürünc

Həyatı

Elçin Cəfərov 1959-cu il fevralın 7-də Ağdam rayonunda anadan olub. 10 yaşından güləşlə məşğul olmağa başlayan Cəfərov ümumittifaq yarışlarında mükafatlar qazanıb. İdmançı karyerasına 26 yaşında erkən vida deyib.

Karyerası

Daha sonra məşqçilik fəaliyyətinə başlayan E. Cəfərov 1981-ci ildə Yunan-Roma güləşi üzrə idman ustası adına layiq görülüb.

1987-ci ildə Azərbaycan Dövlət Bədən Tərbiyəsi və İdman İnstitutunu bitirib.

1992-ci ildə “Əməkdar məşqçi” adına layiq görülüb.

Elçin Cəfərov 1992-ci ildən 1994-cü ilə kimi Azərbaycan Respublikası Bədən Tərbiyəsi və İdman Komitəsi sədrinin birinci müavini və bir müddət sədr vəzifələrində çalışıb.

1996-cı ildə Gənclər və İdman Nazirliyinin İdman və Baş İdman İdarələrinin rəisi olub.

2002-2010-cu illərdə 10 il yunan-Roma güləşi üzrə yığma komandanın baş məşqçisi işləyib.

İşlədiyi müddətdə beş dəfə Avropa çempionu (2005-2007-2008-2010), bir dəfə Avropa Çempionatının gümüş mükafatçısı (2010), üç dəfə Avropa çempionatının bürünc mükafatçısı (2006-2009), ikiqat dünya çempionu (2007-2009), iki Dünya çempionatının gümüş mükafatçısı (2002-2006), iki Dünya çempionatının bürünc mükafatçısı (2009), Azərbaycan Yay Olimpiya oyunları tarixində ilk dəfə olaraq yunan-Roma güləşi üzrə Olimpiya çempionu (2004, Afina), Yay Olimpiya oyunlarının iki gümüş mükafatçısı (2008, Pekin) kimi nailiyyətləri əldə edib.

2006-cı ildə İspaniyada Beynəlxalq Güləş Federasiyasının ali məşqçilik kursunu bitirib.

2004-2006-2007-ci illərdə Azərbaycan Respublikasında ilin “Ən yaxşı məşqçisi” seçilib.

2004-cü ildə Azərbaycan Respublikası Prezidentinin Sərəncamı ilə “Şöhrət” ordeni ilə təltif olunan Cəfərov 2 il sonra Azərbaycan Respublikası Prezidentinin fərdi təqaüdünə layiq görülüb.

2008-ci ildə “Əməkdar Bədən Tərbiyəsi və İdman Xadimi” fəxri adına və “Tərəqqi” medalı ilə təltif olunub.

2010-cu ildə Milli Olimpiya Komitəsinin Prezidenti İlham Əliyevin sərəncamı ilə Elçin Cəfərov “Olimpiya Ordeni” ilə təltif edilib.

Ömrünün 50 ilini idmana, güləşə həsr edən E. Cəfərov Milli yığma komandanın baş məşqçisi kimi Yunan-Roma güləşi üzrə ən yüksək nəticələr əldə edib.

Milli Olimpiya Komitəsinin üzvü, 2010-cu ildən isə Azərbaycan Güləş Federasiyasının Yunan-Roma güləşi üzrə vitse-prezidentidir. Ailəlidir, 2 övladı var.