Embraer

Embraer
Embraer
	Embraer
Ümumi məlumatlar
Sənaye	silah sənayesi[d], aerokosmik istehsalçısı[d]
Məhsulları	Sərnişin təyyarəsi, Hərbi təyyarə, Kənd təsərrüfatı aviasiyası, təyyarə
Təsis tarixi	19 avqust 1969
Baş qərargahın yeri	San-Joze-dus-Kampus[d];
İqtisadi göstəriciləri
Ümumi kapital	3.039.300.000 $ (2023);
Ümumi aktivlər	10.761.000.000 $ (2023);
Ümumi gəliri	5.300.000.000 $ (2023);
Xalis mənfəəti	164.000.000 $ (2023);
Əməliyyat mənfəəti	314.500.000 $ (2023);
Struktur
İşçi sayı	19.179 nəf. (2023);
	embraer.com/global/en/
	Vikianbarda əlaqəli mediafayllar

Embraer (Empresa Brasileira de Aeronáutica S. A.) — Braziliyanın aparıcı aerokosmik şirkətidir və əsasən mülki, hərbi və biznes təyyarələrinin istehsalı ilə məşhurdur.^[6]^[7] Şirkət 1969-cu ildə yaradılıb və hazırda dünyanın ən böyük regional təyyarə istehsalçılarından biridir. Dünyanın ən çox satılan regional təyyarələri olan E-Jet seriyasına malikdir.^[8]

Əsas fəaliyyət sahələri

Embraer, xüsusilə regional sərnişin təyyarələrinin istehsalında ixtisaslaşıb. E-Jet seriyası (E170, E190, E195 və s.) qlobal aviaşirkətlər tərəfindən geniş istifadə olunur. Şirkət təyyarələrin saxlanılması, modernizasiyası və texniki dəstək xidmətləri də göstərir. Son illərdə təkmilləşdirilmiş E2 seriyası (məsələn, E190-E2) daha yüksək yanacaq effektivliyi ilə diqqət çəkir. Şirkət həmçinin hərbi təyyarələrin istehsalı ilə məşğuldur. Məsələn:^[9]

Embraer Super Tucano — yüngül hücum və təlim təyyarəsi.
C-390 Millennium — çoxfunksiyalı hərbi nəqliyyat təyyarəsi

Tarixi

Braziliyanın aerokosmik sahədə lider şirkətlərindən biridir və onun tarixi müasir Braziliyanın sənaye inkişafında mühüm rol oynayır. Şirkət 1969-cu ildə yaradılıb və bu gün regional təyyarə istehsalında dünyanın aparıcı şirkətlərindən biridir.^[10]

1969-cu il — Yaranması

Embraer Braziliya hökumətinin təşəbbüsü ilə yaradıldı. Şirkətin məqsədi ölkənin aerokosmik sənayesini inkişaf etdirmək və Braziliyanın öz təyyarələrini istehsal etməsinə nail olmaq idi. İlk günlərdən şirkət, əsasən, Braziliyanın Aeronavtika və Aerokosmik Texnologiyalar İnstitutunun (ITA) layihələrinə əsaslanırdı. Embraerin ilk istehsal etdiyi təyyarə EMB 110 Bandeirante oldu (1973). Bu, kiçik sərnişin və yük daşımaları üçün nəzərdə tutulan bir təyyarə idi.^[11]^[12] Bandeirante böyük uğur qazandı və həm yerli, həm də beynəlxalq bazarlarda satıldı.

1980-ci illər — Beynəlxalq bazara çıxış

Embraer, beynəlxalq bazarda rəqabət aparmaq üçün məhsullarını inkişaf etdirdi. Bu dövrdə şirkət EMB 120 Brasilia təyyarəsini təqdim etdi, hansı ki, regional hava yolları üçün ideal idi həmçinin ilk dəfə xarici müştərilər cəlb olundu.^[13]

Regional təyyarələr dövrü (1990–2000-ci illər)

1994-cü ildə Braziliya hökuməti Embraeri özəlləşdirdi. Bu, şirkətin daha çevik idarəetmə modelinə keçməsinə və qlobal bazarda daha rəqabətli olmasına imkan verdi.^[14] Embraer özünün məşhur E-Jet seriyasını buraxmağa başladı. Bu təyyarələr orta məsafəli uçuşlar üçün nəzərdə tutulmuşdu və qlobal aviasiya bazarında böyük uğur qazandı. E170, E175, E190, E195 modelləri xüsusilə məşhur oldu. Bu təyyarələr sərnişinlər və hava yolları tərəfindən yanacaq qənaəti və rahatlığına görə bəyənildi.^[15]

2010-cu illər

Embraer öz fəaliyyət sahələrini genişləndirərək biznes və hərbi təyyarələrin istehsalına daha çox diqqət ayırdı Phenom^[16] və Praetor seriyaları ilə biznes aviasiyasında yer qazandı. Embraer Super Tucano hərbi təyyarəsi beynəlxalq aləmdə tanındı və müxtəlif ölkələr tərəfindən alındı.^[17]

Müasir dövr

2018-ci ildə Embraer, mülki təyyarə istehsalı bölməsinin 80%-ni Boeing-ə satmaq üçün razılıq əldə etdi.^[18]^[19] Lakin 2020-ci ildə pandemiya və digər səbəblərdən bu razılaşma pozuldu. Embraer hazırda dünyanın ən böyük regional təyyarə istehsalçılarından biridir və innovasiyaya xüsusi diqqət ayırır. Şirkət həm də yeni texnologiyalar, məsələn, elektriklə işləyən uçan taksi layihələri (eVTOL) üzərində işləyir.^[20]

Kommersiya təyyarələrinin tədarükü

İl							1996	1997	1998	1999
Təchizat							4	32	60	96
İl	2000	2001	2002	2003	2004	2005	2006	2007	2008	2009
Təchizat	160	161	131	101	148	141	130	169	204	244
İl	2010	2011	2012	2013	2014	2015	2016	2017	2018	2019
Təchizat	246^[21]	204^[22]	205^[23]	209	208^[24]	221^[25]	225^[26]	210^[27]	181	192^[28]
İl	2020	2021	2022	2023	2024	2025	2026	2027	2028	2029
Təchizat	130^[29]	141^[30]	159^[31]	181^[32]	–	–	–	–	–	–