Etibar Əhmədov
Etibar Əhmədov (azərb. Əhmədov Etibar Əhmədağa oğlu, rus. Ахмедов Этибар Ахмедага оглы; d. 6 iyun, 1959. Bakı, Azərbaycan SSR, SSRİ) — Rusiya Federasiyasının əməkdar artisti. Novosibirsk Musiqili Komediya Teatrının quruluşçu dirijoru.[1]
| Etibar Əhmədov | |
|---|---|
| Etibar Əhmədağa oğlu Əhmədov | |
| Ümumi məlumatlar | |
| Doğum tarixi | |
| Doğum yeri | |
| Musiqiçi məlumatları | |
| Fəaliyyəti | Novosibirsk Musiqili Komediya Teatrının quruluşçu dirijoru |
Həyatı
redaktəƏhmədov Etibar Əhmədağa oğlu 1959-cu il iyunun 6-da Bakıda anadan olub. 1974-cü ildə Bakıda Asəf Zeynallı adına musiqi məktəbinin xor dirijorluğu şöbəsinə pedaqoq Q. Gimpileviçin sinfinə qəbul edilib və 1978-ci ildə oranı bitirib. Azərbaycan Dövlət Opera və Balet Teatrının baş xormeysteri N. Məlikovun rəhbərlik etdiyi dövlət imtahan komissiyasının tövsiyəsi ilə Ü. Hacıbəyov adına Azərbaycan Dövlət Konservatoriyasının (indiki Ü. Hacıbəyli adına Bakı Musiqi Akademiyası) xor dirijorluğu fakültəsinə — kafedranın dosenti L. Atakişiyevanın sinfinə daxil olub. Təhsil illərində E. Əhmədov kamera xorunda xor artisti kimi çalışıb, Sovet İttifaqının şəhərlərində (Sevastopol, Simferopol, Tbilisi, İrəvan, Kişinyov) qastrol səfərlərində olub. 1983-cü ilin fevralında konservatoriyanı bitirən E. Əhmədov Ş. Qurbanov adına Bakı Musiqili Komediya Teatrına dirijor vəzifəsinə dəvət edilib. Onun Bakı Musiqili Komediya Teatrında dirijorluq etdiyi ilk tamaşa İ. Kalmanın "Hollandiyalı qadın" operettası olub.
1990-cı ildə E. Əhmədova Novosibirsk Musiqili Komediya Teatrında baş dirijor vəzifəsi təklif olunub. Novosibirskdə onun yaradıcılıq bioqrafiyasının yeni mərhələsi başlanıb. 1994–1996-cı illərdə E. Əhmədov M. Qlinka adına Novosibirsk Dövlət Konservatoriyasında SSRİ xalq artisti, professor А. Кatsın sinfində təcrübə keçib. 2000-ci ildə M. Qlinka adına Novosibirsk Dövlət Konservatoriyasının aspiranturasını bitirib. Novosibirsk Dövlət Akademik Opera və Balet Teatrında E. Əhmədov "Sehrli fleyta" (V. A. Motsart), "Yevgeni Onegin" (P. İ. Çaykovski), "Traviata" (C. Verdi) kimi tamaşalara dirijorluq edib. 2002–2008-ci illərdə Başqırdıstan Opera Teatrının dirijoru olub, Yekaterinburq Opera Teatrının Barnaul və Tomsk simfonik orkestrləri ilə əməkdaşlıq edib, orada ikinci dirijor kimi C. Verdinin "Traviata" əsərini (quruluşçu rejissor A. Stepanyuk) tamaşaya qoyub. E. Əhmədov 2007-ci ildə bu teatrla Portuqaliyaya qastrol səfərinə çıxıb. E. Əhmədov 50-dən çox tamaşanın quruluşçu dirijoru olub. Buraya İ. Ştrausun "Yarasa" (Novosibirsk teatrında onun səhnəyə qoyduğu ilk tamaşa), "Vals kralı" İ. Kalmanın "Skripkaçılar kralı", "Cənab İks", "Silva", "Hollandiyalı qadın", "Bayadera", F. Leqarın "Qraf Lüksemburq", "Şən dul qadın" operettaları, K. Porterin "Kankan", F. Lounun "Mənim gözəl xanımım", A. Jurbinin "Arabaçı və kral" müziklləri, O. Feltsmanın "Çarleya xala", L. Solinin "Xanımlar və qusar" musiqili komediyaları, V. Domoratskinin "Aylı gün" müzikli, bəstəkar C. Rossininin "Sevilya bərbəri" operasının motivləri əsasında "Fiqaro burada!" musiqili komediyası, V. Pleşakın "Peterburqlu inkoqnito", M. Samoylovun "Don Juan. İlk məhəbbət" müziklləri, V. Baskinin "İsveç kibriti", G, Kançelinin "Xanuma", A. Kolkerin "Gürzə" musiqili komediyaları, "Məhəbbət şeypurları", "Mavi işıq" konsert proqramları və s. daxildir. Hazırda E. Əhmədov Novosibirsk Musiqili Komediya Teatrında quruluşçu dirijor işləyir.[1]
Təltif və mükafatları
redaktə2005-ci ildə E. Əhmədova incəsənət sahəsindəki xidmətlərinə görə Rusiya Federasiyasının əməkdar artisti fəxri adı verilib. 2001-ci ildə F. Leqarın "Qraf Lüksemburq" tamaşası ilə, 2008-ci ildə İ. Kalmanın "Silva" operettasına, 2009-cu ildə isə A. Kolkerin "Gürzə" müziklinə görə "Ən yaxşı musiqili teatr dirijoru" nominasiyasında "Qızıl maska" Rusiya milli teatr mükafatına namizəd olub. Sonuncu tamaşa ona layiqli mükafatı qazandırıb.[1]
Həmçinin bax
redaktəİstinadlar
redaktə- ↑ 1 2 3 Əhmədov, Etibar. Xaricdə yaşayan azərbaycanlılar. Qısa bioqrafik məlumat kitabçası (PDF) (az.). Bakı: "Papirus NP". 2016. ISBN 978-9952-8299-1-4. 2017-10-21 tarixində arxivləşdirilib (PDF). İstifadə tarixi: 2017-10-21.