Johnnie Walker

Johnnie Walker (şotland keltcəsi: Seonaidh Walker) — Britaniyaya məxsus Diageo şirkəti tərəfindən Şotlandiyada istehsal edilən şotland viskisi brendi. Brend 1820-ci ildə Şotlandiyanın Kilmarnok şəhərində yaradılmış və 2012-ci ildə bağlanana qədər bir vaxtlar dünyanın ən böyük qablaşdırma zavodu olan Hill Street zavodunda istehsal edilmiş və qablaşdırılmışdır. Zavodun bağlanması barədə qərar 2009-cu ildə Diageo şirkəti tərəfindən verilmiş və 2012-ci ildə zavodun bağlanması ilə brend ilə Kilmarnok arasındakı 190 illik əlaqə sona çatmışdır.

Tarix

Con Uolker, qurucusu

Con Uolker 25 iyul 1805-ci ildə fermer ailəsində anadan olub. Onun atası 1819-cu ildə ölmüş və ailə fermanı satmışdır. Bu satışdan əldə edilən 417 funt sterlinq məbləğindəki gəlir Şotlandiyanın Kilmarnok şəhərindəki "High Street" adlı yerdə yerləşən anbar, ərzaq məhsulları, şərab və spirtli içkilər mağazasına yatırılıb. Uolker 1820-ci ildə bir yeniyetmə kimi bu mağazanın ərzaq məhsulları, şərab və spirtli içkilər seqmentini idarə edib. Şotlandiyada 1823-cü ildə Aksiz aktının qəbul edilməsi ilə viskinin distillə edilməsinə dair sərt qanunlar yumşaldıldı və viskinin distillə edilməsinə və satışına qoyulan ağır vergilər əhəmiyyətli dərəcədə azaldıdl. Uolker 1825-ci ilə qədər rom, brendi, cin və viski də daxil olmaqla spirtli içkilərin satışı ilə məşğul olub.

Uolker qısa müddətdən sonra əsasən viski ticarəti ilə məşğul olmağa başladı. Onun satdığı viskilər müştərilərin xüsusi istəklərinə uyğun olaraq qarışdırılır və xüsusi sifarişlə hazırlanmış viski kimi satılırdı, çünki onun özünə məxsus brendi yox idi. İllər sonra Uolker adından etiketlərdə istifadə etməyə başlayır və Walker's Kilmarnock Whisky (azərb. "Uolkerin Kilmarnok viskisi"‎) adı altında viski satır.

Uolkerin ölümü və oğlunun fəaliyyəti

Viskiyə adını verən Con Uolker olsa da, brendin böyüməsi və məşhurlaşması Uolkerin oğlu Aleksandr Uolkerin adı ilə bağlıdır. Aleksandr atasının biznesinə 1856-cı ildə qoşulur və atasını pərakəndə satışdan topdan satışa keçməyə təşviq edir. Con Uolker 1857-ci ildə vəfat edir.

Uolker öldükdən sonra onun biznesindən oğlu Aleksandr Uolker və nəvəsi II Aleksandr Uolkerə məsuliyyət daşıyırlar. 1860-cı ildə Şotlandiyada qəbul edilmiş Spirt aktı ilə taxıl viskilərinin səməni (malt) viskiləri ilə qarışdırılması qanuniləşdi və qarışıq şotland viskisinin müasir dövrünün başlanğıcı qoyuldu. Yüngül və daha şirin dada malik qarışıq şotland viskisi bazarda daha geniş auditoriyaya satıla bilirdi. Edinburqdan olan Endryu Uşer qarışıq viski istehsal edən ilk şəxs olsa da, Uolkerlər vaxtında bu ticarətə qoşula bildilər.

Aleksandr Uolker 1860-cı ildə brendin imzasına çevriləcək olan kvadrat formalı şüşəni təqdim edir. Şüşələrin bu formada olması bir yerə daha çox şüşənin yerləşməsi və daha az şüşənin qırılması demək idi. Johnnie Walker şüşəsinin digər özünəməxsus xüsusiyyəti onun üzərindəki etiket idi. Belə ki, şüşənin üzərindəki etiket həmin ildən etibarən 24 dərəcə yuxarıya doğru soldan sağa tətbiq edilir və bu, mətnin daha böyük və görünən olmasına imkan verir. Bu fərqli xüsusiyyət həm də istehlakçılara onu uzaqdan müəyyən etməyə imkan verir.