Kallistemon

Kallistemon (lat. Callistemon) — bitkilər aləminin mərsinçiçəklilər dəstəsinin mərsinkimilər fəsiləsinə aid bitki cinsi.

Kallistemon
Elmi təsnifat
Domen: Eukariotlar Klad: Diaphoretickes Ranqsız: Arxeplastidlər Aləm: Bitkilər Klad: Streptofitlər Klad: Ali bitkilər Klad: Çoxsporlu bitkilər Klad: Borulu bitkilər Klad: Toxumlu bitkilər Klad: Çiçəkli bitkilər Klad: Evdikotlar Klad: Bazal evdikotlar Klad: Superrozidlər Klad: Rozidlər Klad: Malvids Dəstə: Mərsinçiçəklilər Fəsilə: Mərsinkimilər Yarımfəsilə: Myrtoideae Triba: Melaleuceae Cins: Kallistemon
Beynəlxalq elmi adı
Callistemon R.Br., 1814
Şəkil axtarışı ITIS   27173 NCBI   73722 EOL   2508463

Təbii yayılması

Təbii halda qərbi, cənubi və şərqi Avstraliyada yayılmışdır.

Botaniki təsviri

Hündürlüyü 6-13m olan, zoğları buğumlu kol və ya kolvari ağacdır. Yarpaqları neştərvari və ya xətvari-neştərvari, ucu küt və ya biz, boz-yaşıl rəngli, uzunluğu 10 sm-dək, eni təxminən 0,6 sm-ə çatan, orta və ya yan damarcıqlı olub, qalın kənarlıdır. Çiçək sünbülləri sıx, iri, möhkəm, silindrik, uzunluğu 5-12 sm, eni isə 3-6 sm-dir. Erkəkcik sapları qırmızı rəngli, ucunda uzunluğu 2-3 sm olan parlaq, sarı tozluqludur. Meyvəsi ağacvari, çoxtoxumlu qutucuq, şarvari və ya yumurtavaridir.

Ekologiyası

Rütubətli, qumlu torpaqlarda, çayların kənarlarında, bəzən günəşli, daşlı-qayalı ərazilərdə bitir.

Azərbaycanda yayılması

Abşeron və Lənkəranda mədəni şəraitdə park və bağlarda rast gəlinir.

İstifadəsi

Dekorativ bitkidir, tək və qrup əkinlərində istifadəsi məqsədəuyğundur. Almanlar bu çiçəkləri daşların təmizlənməsində istifadə olunan “fırçaya” bənzədirlər. İngilislər lampa şüşəsinə, siqaret çəkənlər isə müştüklərin təmizlənməsi üçün istifadə olunan təmizləyiciyə oxşadırlar.