Kanazava Yasue Qızıl Vərəq Muzeyi
Kanazava Yasue Qızıl Vərəq Muzeyi (金沢市立安江金箔工芸館?) – Yaponiyanın İşikava prefekturasının Kanazava şəhərində yerləşən muzey. Dünyada qızıl vərəqə həsr olunmuş azsaylı muzeylərdən biridir.[1]
| Kanazava Yasue Qızıl Vərəq Muzeyi | |
|---|---|
 | |
 | |
| Əsası qoyulub | 1974 |
| Açılış tarixi | 1974 |
| Ölkə | |
| Yerləşir | Kanazava |
| 36°34′25″ şm. e. 136°39′58″ ş. u. | |
| kanazawa-museum.jp/kinpa… kanazawa-museum.jp/kinpa… | |
 Vikianbarda əlaqəli mediafayllar | |
Tarixi
redaktəMuzey bütün həyatını qızıl vərəqə həsr etmiş sənətkar Yasue Takaaki tərəfindən 1974-cü ildə açılmışdır. Yasue Qızıl Vərəq Muzeyi adı ilə açılan muzeyi qurmaq üçün öz kolleksiyasından və büdcəsindən istifadə etmişdir.[1]
1985-ci ildə bina və kolleksiyalar Kanazava şəhərinin rəhbərliyinə bağışlanmış və muzey Kanazava Yasuo Qızıl Vərəq Muzeyi kimi fəaliyyət göstərməyə başlamışdır.[1] 2010-cu ilin payızında muzey Kita-Yasue bölgəsindən Hiqaşiyama bölgəsində yerləşən yeni yerə köçürülmüşdür.[2]
Xüsusiyyətlər
redaktəKanazava şəhəri qızıl vərəq istehsalına görə tanınır. Bu şəhərdə qızıl vərəq istehsalının tarixi XVI əsrdən başlayır. Qızıl vərəq istehsalı şəhərin ikinci ən böyük istehsal sahəsi olmuşdur.[1]
İki mərtəbədən ibarət olan muzey binası ənənəvi Kanazava anbarlarının formasında dizayn edilmişdir. Birinci mərtəbədə kitabxana və çoxməqsədli sərgi zalı yerləşir. Daimi və müvəqqəti sərgi zalları, video guşəsi muzeyin ikinci mərtəbəsindədir.[1]
Daimi sərgi zalında muzeyin kolleksiyasına daxil olan eksponatlar sərgilənir. Muzeyin kolleksiyasına qızıl işləmə alətləri, müxtəlif istehsal mərhələlərində olan qızıl vərəqlər, parçalar, keramika məhsulları, şüşə qablar, heykəllər, kalliqrafiya işləri daxildir.[1] Əsas eksponatlara İvasa Katsuşiqe tərəfindən çəkilmiş Kioto rəsm əsərləri, üzərində durna və şam ağacı təsviri olan lak məmulatı, üzərində balıq təsviri olan mürəkkəb qabı, "Şahzadə Kaquya" adlı dekorativ qab, 11 başlı kannon heykəli aiddir.[3]
İstinadlar
redaktə- ↑ 1 2 3 4 5 6 "Kanazawa Yasue Gold Leaf Museum - Leaflet" (PDF). Rəsmi saytı (ingiliscə). 13 iyul 2024 tarixində arxivləşdirilib (PDF). İstifadə tarixi: 13 iyul 2024.
- ↑ "Kanazawa Yasue Gold Leaf Museum" (PDF). Kanazawa Museum (ingiliscə). 17 dekabr 2015 tarixində arxivləşdirilib (PDF). İstifadə tarixi: 13 iyul 2024.
- ↑ "コレクションについて". Muzeyin rəsmi saytı (yaponca). 13 iyul 2024 tarixində arxivləşdirilib. İstifadə tarixi: 13 iyul 2024.
Xarici keçidlər
redaktə- kanazawa-museum.jp/kinpaku/index.html — Kanazava Yasue Qızıl Vərəq Muzeyinin rəsmi saytı