Kinciro Matsudayra
Kinciro Matsudayra (松平 欽次, Matsudayra Kinciro?, 13 sentyabr 1885, Pensilvaniya – oktyabr 1963) – yaponəsilli ABŞ ixtiraçısı və siyasətçisi. 1927 və 1943-cü illərdə Merilend ştatının Edmonston qəsəbəsinin meri seçilmişdir. O, ABŞ-də mer seçilmiş ilk yapon olmuşdur.[1]
| Kinciro Matsudayra | |
|---|---|
 | |
| Şəxsi məlumatlar | |
| Doğum tarixi | 13 sentyabr 1885 |
| Doğum yeri | |
| Vəfat tarixi | oktyabr 1963 (78 yaşında) |
| Partiya | |
| Fəaliyyəti | ixtiraçı, siyasətçi |
Həyatı
redaktəİlk illəri
redaktəKinciro Matsudayra 13 sentyabr 1885-ci ildə ABŞ-nin Pensilvaniya ştatının Bredford şəhərində doğulmuşdur. Atası Tadaatsu Matsudayra 1851-ci ildə Yaponiyanın Edo şəhərində doğulmuşdu və Tokuqava şoqunluğu ilə qohum olan klana mənsub idi. Tadaatsu 1872-ci ildə qardaşı Tadanari ilə birlikdə İvakura missiyası çərçivəsində ABŞ-yə səyahət etmişdi. O, əvvəlcə Yaponiyaya qayıtmağı planlaşdırsa da, Kerri Sempson adlı qadınla tanış olmuş və onunla evlənərək ABŞ-də qalmağa qərar vermişdir.[1]
Kincironun doğumundan qısa müddət sonra ailə Kolorado ştatının Denver şəhərinə köçmüşdür. Tadaatsu 1888-ci ilin yanvarında vərəm xəstəliyi səbəbilə öləndə Kincironun cəmi 3 yaşı var idi. Buna görə də 1925-ci ilə qədər ailəsinin Yaponiya ilə əlaqəsi haqqında məlumatsız qalmışdır. 1925-ci ildə Tsuneo Matsudayra Yaponiyanın ABŞ-dəki səfiri təyin olunanda, o, səfirlə eyni ailədən gəldiyini düşünərək Yaponiya səfirliyinə sorğu göndərmişdir. Səfirlik onların eyni ailədən olmadıqlarını bildirsə də, ona atasının keçmişi barədə məlumat vermişdir.[1]
Atasının ölümündən sonra Kinciro Virciniyada yaşayayn nənə və babasının (Vilyam və Reyçl Sempson) yanında böyümüşdür. 1900-cü ilin məlumatına əsasən 14 yaşlı Kinciro məktəbə getmirdi və fermada işləyirdi. Deyilənə görə Sempsonlar yapon nəvələrinin qayğısına qalmaq istəmədikləri üçün onu qurduqları yetimxanaya qoymuşdurlar. Kinciro bu münasibətə dözməmiş və buradan qaçaraq sirkə qoşulmuşdur. Bu hadisənin doğruluğu şübhəli olsa da, "Mataleamor" adlı akrobat triosunun meneceri olması barədə vizit kartı və təlxək kostyumunda fotoları mövcuddur. O, 1917-ci ildə Vaşinqtonda yerləşən "Woodward & Lothrop" ticarət mərkəzində kitab satıcısı kimi işləməyə başlamışdır. Həmçinin ixtiraçı olmuş, 1914-cü ildə ixtira etdiyi üçün yanğın detektoru üçün patent almışdır.[1]
Mer seçilməsi
redaktəMatsudayra 1924-cü ildə Edmonston qəsəbəsinin Şərqi Hayatsvilldən ayrılması üçün başlayan hərəkatda iştirak etmişdir. Qəsəbə iki rayona bölünmüş və Matsudayra 2-ci rayonun şura üzvü olmuşdur. 1926-cı ilin iyuluda Edmonston meri olmaq üçün namizədliyini irəli sürmüşdür. Qəsəbə infrastrukturunu inkişaf etdirmək barədə olan platformasından sonra 1927-ci ildə mer seçilmişdir. Beləcə, o, ABŞ-də mer seçilmiş ilk yapon şəxs olmuşdur. Onun bu uğuru ABŞ və Asiya qəzetləri tərəfindən işıqlandırılmışdır.[1]
Matsudayra Edmonston meri olmasına baxmayaraq, "Woodward & Lothrop" ticarət mərkəzində işləməyə davam etmişdir. Vəzifəsinin ilk müddəti başa çatdıqdan sonra vəzifəsini tərk etmişdir. 1933-cü ildə 2 illiyinə qəsəbə şurasının üzvü seçilmişdir, lakin naməlum səbəblərdən ötrü şuradan çıxmışdır. 1939-cu ildə növbəti dəfə qəsəbə şurası üçün namizəd olmuş, lakin seçilməmişdir.[1] 1943-cü ildə ikinci dəfə Edmonston meri seçilmişdir.[2] 1950-ci ildə "Woodward & Lothrop" ticarət mərkəzindəki işindən ayrılmışdır. 1963-cü ilin oktyabrında ölmüşdür.[1]
Şəxsi həyatı
redaktəMatsudayra 19 sentyabr 1909-cu ildə Cənubi Karolina ştatından (bəzən Corciya ştatı göstərilir) olan hindu Ellen Kişolm ilə evlənmişdir. Onların toy mərasimi "The Evening Star" qəzeti tərəfindən işıqlandırılmışdır.[1]
Matsudayra həyatının böyük hissəsini Vaşinqtonda keçirmişdir. Evlililiyinin ilk illərində Ellenin anası və ögey atası ilə birlikdə yaşamışdır. Daha sonra onlar Merilend ştatının Prins-Corcs qraflığında yerləşən Hayatsvill qəsəbəsinə köçmüşdürlər. Matsudayra və Ellenin 3 uşağı olmuşdur: Haru Karolin, Ellen və Robert Ford Matsudayra.[1]
İstinadlar
redaktə- ↑ 1 2 3 4 5 6 7 8 9 "Kinjiro Matsudaira: Mayor of Edmonston, Maryland". Discover Nikkei (ingiliscə). 5 may 2021. 22 mart 2023 tarixində arxivləşdirilib. İstifadə tarixi: 22 may 2023.
- ↑ "History". Town of Edmonston. 23 December 2019 tarixində arxivləşdirilib. İstifadə tarixi: 22 may 2023.