Kusanaqi (qılınc)
Kusanaqi (草薙?) – Yaponiya miflərində əfsanəvi qılınc. Hərfi tərcümədə "ot biçən" deməkdir. Kusanaqi Yaponiya imperatorluq ailəsinə məxsusdur və inanca görə Şintoizm tanrısı Susano tərəfindən hədiyyə edilib. Şintoizm miflərində və əfsanələrində Kusanaqi çox böyük gücə malik bir qılıncdır. Ondan istifadə edən döyüşçü sadəcə bir əli ilə bütöv ordunu məhv edə bilər.[1]
Əfsanələr redaktə
Susano tərəfindən tapılması redaktə
Bir versiyaya görə qılınc Susanoya Amaterasu tərəfindən verilib.[2] Digər bir versiyaya görə isə o, qılıncı Koşi adı nəhəng səkkizbaşlı ilanın quyruğunda tapıb. Əfsanəyə görə Susano gözəl bir qıza vurulur, lakin qızın yeddi bacısının ilan tərəfindən öldürüldüyünü və bu qızın da dalınca gələcəyini öyrənir. Susano qızı qorumaq üçün onu darağa çevirib saçına taxır. İlanla qarşılaşanda onu şərabla aldadaraq yatızdırır və onu öldürür. İlanın quyruğunda isə Kusanaqini tapır.[3]
Digər miflər redaktə
Bir əfsanəyə görə Yamato Takeru imperator olan atasından bu qılıncı alır və Yaponiyanın şərqində yerləşən Emişiyə döyüşməyə göndərilir. Yamato düşmənlər tərəfindən tələyə düşürülür və otlar arasında alov çənbərində ölmək riski ilə qarşı-qarşıya qalır. Lakin qılıncdan istifadə edərək otları kəsir və qurtularaq bütün düşmənlərini məhv edir.[1][4]
Digər bir əfsanə isə qılıncın itməsi və tapılması barədədir. O dövrdə körpə olduğu üçün İmperator Antoku qılıncdan istifadə edə bilmir və yaponlar bir dəniz döyüşündə məğlub olurlar. Məğlubiyyəti qəbul edə bilməyən nənəsi Nu-no-Ama uşağı götürür və onunla birlikdə suya tullanır. Uzun illər sonra İmperator Qo Şirakava düşmənlərlə döyüşmək üçün qılıncın gətirilməsini əmr edir, lakin qılınc məbəddə tapılmır. İmperator yuxusunda qoca bir qadınla qarşılaşır və qılıncın Dənizin kralında olduğunu öyrənir. İmperator Antokunun batdığı yerə iki dalğıc göndərir: Omiatsu və onun qızı Vakamatsu. Suyun dibində qaranlıq mağara tapırlar və ora daxil olduqdan sonra daş-qaşlarla bəzənmiş keçid ilə gizli dünya tapırlar.[1]
Tezliklə gözəl bir şəhərə çatırlar. Şəhər qızıl divarlarla və qüllələrlə çevrilidir. Dənizin kralının sarayı içəridə yerləşə də, ana və qızı şəhər darvazalarının qabağında dayanırlar. Burada müqəddəs bir adam peyda olur və Buddanın köməyi olmadan şəhərə daxil ola bilməyəcəklərini bildirir. Növbəti gün xüsusi tilsimlərin köməyi ilə qayıdırlar və saraya çatırlar. İki qadın pəncərədən onlara baxdıqlarını müşahidə edirlər. Pəncərənin pərdələri asta-asta aşağı düşdükdən sonra Kusanaqinin böyük bir ilanın ağzında olduğunu və kiçik bir oğlanın ilanın yanında yatdığını görürlər.[1]
Onlar ilanla söhbət edirlər. İlan onlara deyir ki, qılınc imperatora məxsus deyil, əjdaha-şahzadə tərəfindən oğurlanıb və onu bir qəhrəmana (çox güman ki, Susanoya) itirib. Qəhrəman isə onu imperatora verib. İllər sonra bir dəniz əjdahası qadın cildinə girərək imperatorla evlənib. Həmin qadın isə Antoku ilə birlikdə suya tullanan qadın olub.[5]
Dalğıclar qayıdırlar və bütün hekayəni imperatora danışırlar. Bir sehrbaz deyir ki, bir sehr qılıncın geri qaytarılmasına kömək edə bilər. Sehr işləyir və imperator qılıncı əldə edərək düşmənlərini məğlub edir. Döyüşdən sonra qılıncı qorumaq üçün Atsuta məbədinə qoyulur.[5]
Daha sonra bir koreyalı rahib qılıncı oğurlayaraq onu Koreyaya aparmağa çalışır. Lakin dəniz tanrısı əsəbləşir və dalğalar çağırır. Sonda rahib qılıncı dənizə atır və fırtına sakitləşir. Dəniz tanrısı qılıncı götürərək onu məbədə qaytarır və qılınc məbəddə yüz illərlə qalır. Nəhayət sonda dənizin altındakı dəniz tanrısının sarayına qaytarılır.[5]
İstinadlar redaktə
- ↑ 1 2 3 4 Roberts, 2010. səh. 74
- ↑ Roberts, 2010. səh. 25
- ↑ Roberts, 2010. səh. 110
- ↑ Roberts, 2010. səh. 126
- ↑ 1 2 3 Roberts, 2010. səh. 75
Ədəbiyyat redaktə
- Roberts, Jeremy, Japanese Mythology from A to Z, Chelsea House, 2010, ISBN 978-1-4381-2802-3