Nazir Rəhimov

Nazir Rəhimov
Nazir Rəhimov
	Nazir Həzrətqulu oğlu Rəhimov
	; Nazir Rəhimov
Doğum tarixi	6 avqust 1951 (73 yaş)
Doğum yeri	Bakı, Azərbaycan SSR
Vətəndaşlığı	Azərbaycan
Milliyyəti	azərbaycanlı
Təhsili	Azərbaycan Dövlət Bədən Tərbiyəsi və İdman Akademiyası
Fəaliyyəti	Hakim, İdman tədbiri təşkilatşısı
Fəaliyyət illəri	1978-2011
Mükafatları	; Azərbaycan Respublikanın "Əməkdar Bədən Tərbiyəsi və İdman işçisi"

Nazir Rəhimov (6 avqust 1951, Bakı) — boks üzrə SSRİ idman ustası, Beynəlxalq Həvəskar Boks Assosiasiyası (AİBA) və Avropa Həvəskar Boks Assosiasiyasının (EABA) beynəlxalq dərəcəli hakimi, Milli Olimpiya Komitəsi İdman İdarəsinin baş məsləhətçisi^[1].

Həyatı

Nazir Rəhimov 6 avqust 1951-ci ildə Bakı şəhərində anadan olub. Yasamal (keçmiş Oktyabr rayonu) rayonu, 199 nömrəli tam orta məktəbinin 7-ci sinfini bitirdikdən sonra yaşayış yerinin dəyişməsi ilə əlaqədar 8–10-cu sinifləri Binəqədi (keçmiş Kirov) rayonu, Biləcəri qəsəbəsində yerləşən 297 (keçmiş 2 nömrəli) nömrəli tam orta məktəbdə davam etdirib. 1969-cu ildə orta məktəbi bitirib.1970–72-ci illərdə həqiqi hərbi xidmətdə olub. 1973-cü ildə Azərbaycan Dövlət Bədən Tərbiyəsi və İdman Akademiyasına daxil olub və 1977-ci ildə həmin Akademiyanın pedoqoji fakültəsini əla qiymətlərlə bitirib^[1].

Ailəsi

Ailəlidir. 2 oğlu, 1 qızı, 3 nəvəsi var.

Fəaliyyəti

Əmək fəaliyyəti

14 fevral 1964-cü ildən akrobatika və boks idman növləri ilə məşğul olub. Hər iki idman növündə respublika və şəhər birinciliklərinin qalibi və mükafatçısı olub. 1973-cü ildə Qırğızıstanın Frunze şəhərində keçirilən "Spartak" İdman Cəmiyyətinin Mərkəzi Şurasının çempionatında 3 görüşdə qalib gəlib yarımfinala çıxmış və bürünc medal qazanaraq SSRİ idman ustası normasını yerinə yetirib^[1].

1981-ci ildə boks üzrə Respublika dərəcəli hakim ;
1985-ci ildə boks üzrə Ümumittifaq dərəcəli hakim ;
1999-cu ildə EABA-nın (Beynəlxalq Avropa Boks Assosiasiyası) hakimi;
2001-ciildən AİBA-nın (Ümumdünya Beynəlxalq Boks Assosiasiyası) hakimi adlarına layiq görülüb.

1999–2014-cü illərdə beynəlxalq dərəcəli hakim kimi dünya, Avropa, çempionatları, dünya və Avropa kuboku yarışları və Beynəlxalq turnirlərdə uğurla hakimlik edib fəxri fərmanlar və diplomlarla mükafatlandırılıb.

Əmək fəaliyyətinə 4 yanvar 1970-ci ildən Bakı Karton Tarası Fabrikində usta köməkçisi kimi başlayıb. 7 may 1970-ci ildən 29 may 1972-ci ilə kimi Sovet Ordusu sıralarında həqiqi hərbi xidmətdə olub. Hərbi xidmətdən leytenant rütbəsi ilə ehtiyata buraxılıb. 1973–1977-ci illərdə ali təhsil alması ilə bağlı əmək fəaliyyəti olmayıb. 1977-ci ildə Azərbaycan Dövlət Bədən Tərbiyəsi və İdman Akademiyasını bitirdikdən sonra həmin ali təhsil ocağında boks, ağır atletika və onun metodikası kafedrasında müəllim kimi fəaliyyət göstərib. 4 yanvar 1978 – 16 noyabr 1984-cü illərdə Bakı şəhər Bədən Tərbiyəsi və İdman Komitəsində baş təlimatçı-məşqçi vəzifəsində işləyib. 16 noyabr 1984 – 15 iyun 1989-cu illərdə boks üzrə İxtisaslaşdırılmış Respublika Olimpiya Ehtiyatları İdman Məktəbinin direktoru vəzifəsində çalışıb. 16 iyun 1989-cu ildən Qələbənin 30 illiyi adına Təlim Tədris Mərkəzinin direktor müavini, 11 dekabr 1990 – 24 yanvar 1994-cü ilədək "Sədəf" kooperativində direktor müavini, 24 yanvar 1994 – 1 noyabr 1997-ci ilədək "AzİnterAqro" Elmi İstehsal və Kommersiya Mərkəzində baş direktorun müavini vəzifələrində işləyib^[1].

2 noyabr 1997-ci ildən Azərbaycan Respublikası Milli Olimpiya Komitəsinin idman idarəsində baş məsləhətçisi vəzifəsində işləyir. Bundan başqa ictimai əsaslarla AR MOK-da kadrlar idarəsinin müdiri və "Olimpiya Muzeyinin direktoru" vəzifələrini icra edir. Azərbaycan Respublikası Milli Olimpiya Komitəsinin Baş Məslisinin (1997–2001), Azərbaycan Boks Federasiyasının İcraiyyə Komitəsinin (1997–2008) üzvü, Bakı şəhər Gənclər və İdman baş idarəsinin (2007) kollegiyasının üzvüdür.

Mükafatları

Azərbaycan Respublikası Prezidentinin 25 oktyabr 2007-ci il tarixli Sərəncamı ilə "Tərəqqi" medalına layiq görülüb;
Azərbaycan Respublikası Gənclər və İdman Nazirliyinin 18 may 2011-ci il tarixli kollegiyasının qərarı ilə Azərbaycan Respublikanın"Əməkdar Bədən Tərbiyəsi və İdman işçisi" adına layiq görülüb;
Azərbaycan Respublikası Prezidentinin 05 noyabr 2012-ci il tarixli Sərəncamı ilə Azərbaycan Respublikanın "Əməkdar Bədən Tərbiyəsi və İdman xadimi" fəxri adına layiq görülüb^[1].
Azərbaycan Respublikası Prezidentinin 12 noyabr 2022-ci il tarixli sərəncamı ilə "Azərbaycan Respublikası Prezidentinin fəxri diplomu"na layiq görülüb.

İstinadlar

↑ ¹ ² ³ ⁴ ⁵ "Nazir Rəhimov: "Ömrümün 57 ilini idmana həsr etmişəm"" (az.). olimpiyadunyasi.com. 2022-12-04 tarixində arxivləşdirilib. İstifadə tarixi: 18 yanvar 2023.

[istinad123-1] ¹ ² ³ ⁴ ⁵ "Nazir Rəhimov: "Ömrümün 57 ilini idmana həsr etmişəm"" (az.). olimpiyadunyasi.com. 2022-12-04 tarixində arxivləşdirilib. İstifadə tarixi: 18 yanvar 2023.

[1]