Qabrovo Texniki Universiteti

Qabrovo Texniki Universiteti (bolq. Технически университет Габрово) — Bolqarıstanda universitet; texniki sahə üzrə ixtisaslaşan ali təhsil ocaqlarından biri.

Qabrovo Texniki Universiteti
42°52′32″ şm. e. 25°18′26″ ş. u.
Əsası qoyulub	1964
Tip	dövlət universiteti
Ölkə	Bolqarıstan
Ünvan	Bolqarıstan, Qabrovo şəhəri
Sayt	tugab.bg

Tarixi

Qabrovo Texniki Universitetinin əsası 1964-cü ildə Bolqarıstanın sənayenin inkişafında zəngin təcrübə və ənənələrə malik iqtisadi mərkəzi kimi tanınan Qabrovo şəhərində qoyulub. Bu gün Qabrovo Texniki Universiteti təhsil və elm sahəsində müasir imkanlarla keçmiş ənənələri uğurla uyğunlaşdırır. Hazırda özünü nüfuzlu təhsil və elmi mərkəz kimi təsdiqləyən universitet əmək bazarının tələblərinə uyğun olaraq texnika və texnologiyalar, iqtisadiyyat və sosial elmlər sahəsində geniş profilli bakalavr, magistr və doktorantura ixtisaslarını təklif edir.

Universitetdə maarifləndirici və elmi fəaliyyət 240 yüksək ixtisaslı müəllim tərəfindən həyata keçirilir. Müasir tədris metodlarını tətbiq edən müəllimlər, zəngin maddi-texniki baza və müxtəlif sosial güzəştlərin tələbələrin təhsili və inkişafı üçün münbit şərait yaradır.

Ali təhsil müəssisəsi Avropa maarifləndirici və tədqiqat proqramlarında fəal iştirak edir, yerli və xarici universitetlərlə faydalı və effektiv əməkdaşlıq həyata keçirir.

1999-cu ildə Qabrovo Texniki Universitetində ilk regional Cisco Akademiyası fəaliyyətinə başlayıb. Cisco Networking Academy Program bütün şirkətlərinin tələblərinə cavab verir. Təlimin sonunda tələbələr imtahan (Cisco Certified Network Associate /CCNA/) verir və bütün dünyada tanınan sertifikatı əldə etmək imkanından yararlanırlar.

Qabrovo Texniki Universitetinin kitabxanası yeni müasir binada yerləşir. Kitabxananın oxucuları 180 mindən çox kitabxana vahidindən ibarət olan fonddan istifadə edə bilərlər. Onların arasında dərsliklər, monoqrafiyalar, soraq nəşrləri və jurnallar yer alır. Kitabxana internet, elektron nəşrlər və məlumat bazaları ilə iş üçün 45 avtomatlaşdırılmış yeri olan üç kompüter zalına malikdir.

Universitetin əcnəbi və Bolqarıstanın digər şəhərlərinin sakinləri olan tələbələri ali məktəbin yataqxanalarında qala bilərlər. Universitet 1 253 yerlik 5 yataqxanaya malikdir. Yataqxananın tərkibində 5 kiçik kafe və 4 yeməkxana fəaliyyət göstərir.

Fakültələr

Qabrovo Texniki Universitetdə təhsil üç fakültədə həyata keçirilir:

• Elektrotexnika və elektronika,
• Maşınqayırma və cihazqayırma,
• İqtisadiyyat.

Universitetin elektrotexnika və elektronika fakültəsi avtomatika, informasiya və idarə etmə sistemləri, elektronika, elektrik qüvvəsi təchizatı, kompüter sistemləri və texnologiyaları, rabitə texnikası və texnologiyaları, elektrotexnika və elektroenergetika ixtisasları üzrə yüksək ixtisaslı mühəndislərin hazırlanması məqsədilə yaradılıb. Fakültə, kompüter sistemləri və texnologiyaları kafedrası və kompüter sistemləri və informasiya texnologiyaları üzrə akademik birlik ilə birgə virtual maarifləndirici sahələrin yaradılmasının bütün mərhələlərində iştirak edir. Fakültə tələbələrin informasiya texnologiyaları sahəsində bilik və bacarıqları mənimsəməsi üçün yeni texniki vasitələrlə təchiz edilib.

Maşınqayırma və cihazqayırma fakültəsi 1983-cü ildə yaradılıb. Hazırda fakültədə maşın elementləri və texniki rəsmxət, maşınqayırma və cihazqayırma, maşınqayırma texnikası və texnologiyası, toxuculuq texnikası və texnologiyası, texniki mexanika kafedraları fəaliyyət göstərir. Ənənəvi maşınqayırma ixtisasları üzrə müasir təlim CAD/CAE/CAM orta və yüksək sinif sistemlərində həyata keçirilir və müasir sənaye texnologiyalarının konversirovaniyası üçün imkan verir.

Fakültədə proqram idarəetməsi maşınları, robotlar, kompüter və ölçü texnikasını ehtiva edən müasir maddi baza qurulub.

İqtisadiyyat fakültəsində idarəetmə, riyaziyyat, tətbiqi informatika, sosial və iqtisadi elmlər, fizika, kimya və ekologiya sahələri üzrə mütəxəssis hazırlığı həyata keçirilir. Fakültədə elmi-tədqiqat işlərinin aparılmasına xüsusi diqqət ayrılır. Fizika, riyaziyyat və informatika, işsizlik, əmək bazarında siyasət, sosial siyasət, iqtisadiyyat, ticarət və sənaye təşkilatlarını idarə etmə, sosial işin təşkili və idarə edilməsi, insan resurslarını idarə etmə, statistik və marketinq tədqiqatları və analizlər, sahibkarlıq və sahibkar modelləri, innovasiyalar və rəqabətə davamlılıq, ətraf mühitin müdafiəsi və davamlı inkişaf istiqamətləri fakültənin elmi-tədqiqat fəaliyyətini təşkil edir.

Məlumat üçün bildirək ki, Qabrovo Texniki Universiteti Almaniyanın Şmalkalden Universiteti və digər ali təhsil müəssisələri ilə əməkdaşlığı nəticəsində bəzi ixtisaslar üzrə ikili diplomlar təqdim edir.

Bu ixtisaslara mexatronika, "Management of Economy" (İqtisadi idarəetmə), "Industrial Management" (Sənaye idarəetməsi), sənayedə kompüter dizaynı, mobil kommunikasiya, ventilyasiya, iqlim və qaz texnikası, avtomobil maşınqayırması istiqamətləri daxildir.

Ali məktəbdə illik təhsil haqqı bakalavr pilləsi üzrə 2200 € (bolqar dilində) və 3000 € (ingilis dilində), magistratura üzrə 2400 € (bolqar dilində) və 3000 € (ingilis dilində) təşkil edir. Qiyabi təhsil üçün göstərilən məbləğin 50 faizi ödənilməlidir.

Departament

Dil və ixtisaslaşdırılmış təhsil departamenti 3 istiqamət üzrə fəaliyyət göstərir:

I. İstiqamət - "Xarici dillər"

ІІ. İstiqamət - "Etnik bolqarlar, xaricdə yaşayanlar ixtisaslaşması"

ІІI. İstiqamət - "Bolqarıstan Respublikasının ali təhsil müəssisələrinə qəbul olmaq arzusunda olan əcnəbilər üçün dil və ixtisaslaşdırılmış hazırlıq"

Təhsil prosesi tədris planları üzrə Avropa maarifləndirici standartları əsasında qurulub.

Kollec

Ali təhsil müəssisəsinin nəzdində Loveç kolleci fəaliyyət göstərir. 1990-cı ildə Bolqarıstan Nazirlər Şurasının qərarı ilə yaradılan kollec texniki universitetin əsas struktur vahidlərindən biridir. Kollecdə tədris kompüter sistemləri və texnologiyaları, elektrotexnika, maşınqayırma və avtomobil maşınqayırması ixtisasları əsasında aparılır. Bütün ixsisaslarda təhsil prosesi nəzəriyyə və təcrübə üzrə dövlət imtahanı ilə yekunlaşır.

Mərkəzlər

Universitetdə eyni zamanda elmi araşdırmalar və texnologiyalar, informasiya sistemləri və texnologiyalar, əlavə ixtisaslaşdırma, peşəkar təhsil, beynəlxalq və milli proqramlar və layihələr, elektron təhsil və karyera mərkəzləri yaradılıb.

Bu mərkəzlər əlavə təhsil və peşəkar ixtisaslaşma, partnyor universitetlərdə təhsil və təcrübə kimi faydalı imkanlar təklif edir.

Mənbə

• Cahangir Atakişiyev. "Rabitə dünyası" qəzeti.  (az.)