Qorxmaz Əlilicanzadə

Qorxmaz Əlilicanzadə (15 oktyabr 1958, Bakı) — Azərbaycanın tanınmış şoumeni, aktyor və müğənni, sənətşünaslıq üzrə fəlsəfə doktoru, Azərbaycan Respublikasının əməkdar artisti (2019).

Qorxmaz Əlilicanzadə
Qorxmaz Məmməd oğlu Əlilicanzadə
Doğum tarixi (65 yaş)
Doğum yeri Bakı, Azərbaycan SSR, SSRİ
Fəaliyyəti aktyor
Mükafatları "Azərbaycan Respublikasının əməkdar artisti" fəxri adı — 2019

Həyatı redaktə

Qorxmaz Məmməd oğlu Əlilicanzadə 1958-ci il oktyabrın 15-də Bakının Maştağa kəndində anadan olmuşdur. Kiçik yaşlarında onda teatr sənətinə böyük maraq yarandığına görə, öz həyatını bütünlüklə Azərbaycan incəsənətinə bağlamışdır. 1979-cu ildə M.Əliyev adına Azərbaycan Dövlət İncəsənət İnstitunun (indiki Azərbaycan Dövlət Mədəniyyət və İncəsənət Universitetinin) "Kino və Dram Teatrı Aktyoru" fakültəsini, SSRİ xalq artisti Adil İsgəndərovun kursunu bitirmişdir.

Yaradıcılığı redaktə

1970-1980-cı illərdə Qorxmaz Əlilicanzadənin estrada sahəsində oynadığı rollar ona böyük şöhrət gətirmişdir. Təsadüf deyildir ki, o 1983-cü ildə respublikamızda keçirilən estrada artistləri müsabiqəsinin laureatı olmuşdur. Qorxmaz Əlilicanzadə sonrakı illərdə də bu müsabiqələrin qalibi adını qazanmışdır. 1985 və 1987-ci illərdə o beynəlxalq estrada artislərinin müsabiqələrində iştirak etmiş və bu müsabiqələrin laureatı olmuşdur.

Qorzmaz Əlilicanzadə 1985-ci ildə Miniatür teatrını yaratmşdır. Tamaşaçılar bu teatrda oynanılan duzlu, məzəli tamaşaları bu gün də xatırlayırlar.

Tanınmış estrada aktyoru 1990-cı ildə Azərbaycan Estrada Teatrını yaratmışdır. O, bu teatrın bədii rəhbəri və direktorudur. 1991-ci ildə ilk olaraq "Oxşarlar" festifalını yaratmaqla Azərbaycanda şou proqramların və şou-biznesin təməlini qoymuşdur.

Qorzmaz Əlilicanzadə Azərbaycanda gənc istedadlıların aşkara çıxarılmasında çox böyük əməyi var. Onun təşkilatçılğı ilə uzun illər keçirilmiş "7-17" müsabiqəsində və özünün "Şou Əlili" adlı əyləncəli proqramında xeyli gənc müğənni aşkara çıxarılmışdır. Bu gün bir çox gənc müğənni məhz həmin müsabiqələrdə formalaşmış və tamaşaçıların rəğbətini qazanmışdır.

O, 1992-ci ildə ilk dəfə olaraq "I Respublika Meyxana Müsabiqəsi"ni, 1998-cu ildə isə "II Respublika Meyxana Müsabiqəsi"ni keçirmişdir.

1993-cü ildə "Evlənmək istəyirəm" tamaşasında (Rauf İçərişəhərli) Teymur obrazını, "Silindr" tamaşasında (Eduardo de Filippo) iki fərqli xarakteri - Gənc və Qoca varlı məşuq obrazlarını canlandırmışdır. Bundan əlavə digər əyləncəli-estrada tamaşalarını yaratmışdır.

Qorxmaz Əlilicanzadə estrada artisti, estrada rejissoru, konfransye, şoumen (Aərbaycanın ilk şoumeni), ssenari müəllifi, həm də müğənni kimi fəaliyyət göstərir. Belə ki, F.Əmirovun "Şeyx Sənan" operasında Kor Ərəbin mahnısı, C.Cahangirovun "Füzuli" kantatası, Tofiq Quliyev "Zibeydə", Eldar Mansurov, Rauf Məmmədov, Xanım İsmayılqızı, Nadir Əzimov və s bəstəkarların mahnılarının ilk ifaçısıdır. Bundan əlavə, o, "Azərbaycan futbolu" və "Yaşa futbol" adlı iki mahnının (Rauf Məmmədovun) ilk ifaçısıdır.

Azərbaycan televiziyasında Qorxmaz Əlilicanzadənin apardığı maraqlı verilişlər hər bir tamaşaçıya böyük zövq verib. Onun maraqlı, duzlu, məzəli lətifələr söyləməsi, meyxana verlişlərində söylədiyi fikirlər, müxtəlif reklamlarda, kino və seriallarda oynadığı rollar hamını riqqətə gətirir.

Yeni ixtiraları redaktə

Qorxmaz Əlilicanzadə 2014-cü ildən yeni milli musiqi alətlərinin ixtiralarına başlamışdır. Beş il ərzində 5 milli musiqi aləti ixtira edib. Dörd mizrablı simli musiqi aləti və bir yaylı simli musiqi aləti ixtira edib. Əlbuta, Qorbuta, Canbuta, Canqor, Əlqor

Mükafatları redaktə

31 iyul 2019-cu ildə Azərbaycan kinematoqrafiyasının inkişafında xidmətlərinə görə Azərbaycanın əməkdar artisti fəxri adına layiq görülmüşdür.[1]

Ailəsi redaktə

Qorxmaz Əlilicanzadə aktyor və rejissor Məmməd Əlilinin oğludur.

Aktyor Məhəmmədağa Əlilicanzadə isə Qorxmaz Əlilicanzadənin oğludur.

Filmoqrafiya redaktə

  1. Arşın mal alan (film, 1965)
  2. Dəli Kür (film, 1969)
  3. Yuxu (film, 2001)
  4. Yaz yuxusunun işığı (film, 1996)
  5. Bir cənub kəndində
  6. Güllələnmə təxirə salınır!... (film, 2002)
  7. QAZ (film, 2005)
  8. Qala (film, 2008)
  9. Ölüm növbəsi (film, 2009)
  10. Qayınana (film, 2011)
  11. Tərsinə çevrilən dünya (film, 2011)
  12. Vəkil hanı? (film, 2011)
  13. Sübhün səfiri (film, 2012)
  14. Axırıncı dayanacaq (film, 2014)
  15. Zəng (film, 2014)
  16. Dələduzlar (film, 2014)
  17. Əbədi ezamiyyət (film, 2016)
  18. Köşk (film, 2017)
  19. Babayevlər ailəsi (serial 2015)
  20. Sənin deyil (serial, 2016)
  21. Hippokratın andı (serial 2016)
  22. Kolxoz 85 (serial)
  23. Durnalar qayıdanda (serial 2017)
  24. Bizim restoran (serial 2019)
  25. Oxşarabad 2 (film 2020)

İstinadlar redaktə

  1. President.az. "Azərbaycanın kino xadimlərinə fəxri adların verilməsi haqqında Azərbaycan Respublikası Prezidentinin Sərəncamı" (az.). President.az. 2019-07-31. 2021-10-26 tarixində arxivləşdirilib. İstifadə tarixi: 2019-07-31.

Xarici keçidlər redaktə