Sabah FK

Sabah FK — Masazır qəsəbəsini təmsil edən peşəkar futbol klubu. Klub 2018–2019 mövsümündən Misli Premyer Liqasında çıxış edir. "Sabah" FK ev oyunlarını Masazır qəsəbəsində yerləşən "Bank Respublika Arena"da keçirir.

Sabah FK
Ölkə	Azərbaycan
Ləqəb(lər)	Bayquşlar, Tələbələr
Rəng(lər)	Qara-Çəhrayı
Yaranma tarixi	8 sentyabr 2017
Stadionu	Bank Respublika Arena
Tutumu	13000
Prezidenti	Maqsud Adıgözəlov
Baş məşqçisi	Krunoslav Renduliç
Liqa	Azərbaycan Premyer Liqası
2023-24	3
Ev forması Səfər forması
Rəsmi saytı

Tarixi

"Sabah" I Divizionda (2017–2018)

"Sabah" Futbol Klubu 2017-ci il, sentyabrın 8-də fəaliyyətə başlayıb. 2017/18-ci il mövsümündə Azərbaycan I Divizionunda çıxış edən "ağ-göylər", mövsümü 5-ci pillədə başa vurub.

2018-ci il mayın 12-də AFFA-nın Lisenziya Komissiyasının iclasında "Sabah" Futbol Klubuna Azərbaycan Premyer Liqasında iştirak etmək üçün lisenziya verilməsi qərara alınıb.

"Sabah" Futbol Klubu Azərbaycan Premyer Liqasında ilk oyununu 2018-ci il avqustun 12-də "Keşlə" Futbol Klubuna qarşı keçirdi. "ASK Arena"da keçirilən debüt matçında 1:0 hesabıyla qalib gələn "Sabah", həm də, yüksək liqada ilk qələbəsini qazanmış oldu. Qarşılaşmada yeganə qola Marko Deviç imza atdı. Ukrayna millisinin keçmiş üzvü "Sabah" Futbol Klubunun Azərbaycan Premyer Liqasında ilk qolunun müəllifi kimi adını klubun tarixinə yazdırdı.

2022-ci ilin dekabrında Murad Musayevin rəhbərlik etdiyi klub, "Sumqayıt"ı 6:0 hesabı ilə məğlub edərək Azərbaycan Premyer Liqasında tarixinin ən böyükhesablı qələbəsini qazanıb.

2022-23-cü il mövsümündə Azərbaycan Premyer Liqasının gümüş medallarını qazanaraq tarixində ilk dəfə avrokuboklara yollanıb.

2023-24-cü il mövsümü UEFA Avropa Konfrans Liqasının 2-ci mərhələdəsindən mübarizəyə başlayan Masazır təmsilçisi bu mərhələdə Latviyanın RFS komandası ilə qarşılaşıb.İlk oyun səfərdə 2-0 Sabahın qələbəsi ilə nəticələndi.Masazırdakı qarşılaşmada isə təmsilçimiz 2-1 qalib gələrək tur atladı.3-cü təsnifat mərhələsinin ilk oyununda Partizan Belqrad FK-nu 2-0 məğlub edərək ardıcıl 3-cü qələbəsini qazanıb.Lakin səfərdə keçən dramatik matçda rəqib əsas vaxtı 0-2 bitən matçda penaltilər seriyasında qalib gələrək turu atlayan tərəf oldu.

Klubun loqosu və rəngləri

"Sabah"ın loqosunda klubun adı üzərində təsvir edilən günəş şüaları sabaha açılan yeni gün, yeni ümidlər, yeni qələbələri təcəssüm etdirir. Qalxan isə müdafiə əzminin, oyunda komandanın qapısının toxunulmazlığının ifadəsidir.

"Sabah"ın əsas rəngləri göy-ağdır. Bu rənglər ciddilik, məqsədyönlülük, inam, güc və qüvvəti əks etdirir.

Rəhbərlik və Müşahidə şurası

"Sabah" Futbol Klubunun təsisçisi "Bridge Group of Companies"-in rəhbəri Yaqub Hüseynovdur. "Sabah"ın prezidenti Maqsud Adıgözəlovdur.

Klubda Müşahidə Şurası (MŞ) da fəaliyyət göstərir. MŞ 5 üzvdən ibarətdir – Firudin Qurbanov (Azərbaycan Respublikası təhsil nazirinin müavini), İqor Ponomaryov (azərbaycanlı keçmiş futbolçu və məşqçi, 1988-ci ilin olimpiya çempionu, SSRİ-nin əməkdar idman ustası), Rəhman Hacıyev ("1news.az" saytının və "Bakinskiy raboçiy" qəzetinin rəhbəri), Rauf Xəlilov (sahibkar), Yaqub Hüseynov (sahibkar).

Müşahidə Şurasının sədri Firudin Qurbanovdur.

Sabah FK Avropa Yarışlarında

• I t. m. = I təsnifat mərhələsi, II t. m. = II təsnifat mərhələsi, III t. m. = III təsnifat mərhələsi, Qrup m. = Qrup mərhələsi
• I m. = I mərhələ, II m. = II mərhələ, III m. = III mərhələ
• s.q. = Səfərdə vurulan qol hesabına, ə. v. = Əlavə vaxt hesabına

19 iyun 2024-cü il tarixində olan məlumat:

Mövsüm	Turnir	Mərhələ	Rəqib	Ev	Səfər	Nəticə
2023–24	UEFA Konfrans Liqası	II təsnifat mərhələsi	RFS	2–1	2–0	4–1
		III təsnifat mərhələsi	Partizan Belqrad	2–0	0–2	2–2 (p. 4–5)
2024–25	UEFA Konfrans Liqası	II təsnifat mərhələsi	Makkabi Hayfa FK

Yarışlara görə

• O = oyun, Q = qələbə, H = heç-heçə, M = məğlubiyyət, VQ = vurduğu qollar, BQ = buraxdığı qollar, QN = qolların nisbəti

19 iyun 2024-cü il tarixinə olan məlumat:

Sıra	Turnir	O	Q	H	M	Qollar
1	UEFA Çempionlar Liqası	0	0	0	0	0–0
2	UEFA Kuboku / UEFA Avropa Liqası	0	0	0	0	0–0
3	UEFA Konfrans Liqası	4	3	0	1	6–3
4	UEFA Kuboklar Kuboku	0	0	0	0	0–0
5	UEFA İntertoto Kuboku	0	0	0	0	0–0
-	Cəmi	4	3	0	1	6–3

Forma

Klub geyim dəstində göy-ağ rənglərdən istifadə edir. "Sabah"ın əsas geyimi göy-ağ-göy, ehtiyat geyimi isə ağ-göy-ağ rəngdədir.

Klub I Divizionda çıxış etdiyi zaman İspaniyanın "Joma" firmasının geyim dəstindən istifadə edirdi. "Sabah" Premyer Liqaya vəsiqə qazandıqdan sonra "Joma"nı İtaliyanın "Macron" firmasıyla əvəzlədi. 2020-ci ildən komanda "Nike" firmasının geyim dəstindən istifadə edir.

Uğurları

Azərbaycan çempionatı

• Gümüş medal (1): 2022/23
• Bürünc medal (1): 2023/24

Stadion

Bank Respublika Arena

"Sabah" Futbol Klubu ev oyunlarını Masazır qəsəbəsində yerləşən "Bank Respublika Arena"da keçirir. "Bank Respublika Arena" 13 000 nəfər azarkeş tutumuna malikdir.

Stadionun oyun meydançası təbii ot örtüyünü ilə əhatə olunmuşdur. Stadionun ərzisində futbolçuların soyunub geyinmə otaqları, tibb məntəqəsi, mətbuat konfransı üçün nəzərdə tutulmuş zal ilə yanaşı, dəvətlilərin oyunları izləməsi üçün xüsusi otaqlar mövcuddur.

Sözügedən stadion əvvəlki illərdə "Neftçi" və "Qarabağ" klublarının müvəqqəti olaraq Premyer Liqa oyunlarına ev sahibliyi etmişdir. "Sabah" Futbol Klubu yüksək liqada "Bank Respublika Arena"dan əsas stadion kimi istifadə edən ilk klubdur. Azərbaycan Premyer Liqasının 2022/2023 mövsümündə ən çox azarkeş məhz bu stadionunda keçirilən "Sabah" FK — "Qarabağ" FK oyununda qeydə alınıb. 0:0 hesabı ilə nəticələnən görüşü 10000 nəfər tribunadan canlı izləyib.

Komandanın Heyəti

2 iyun 2024-cü il tarixində yenilənib.

Nömrə Ölkə Mövqeyi Futbolçu 2 DF Amin Seydiyev 3 DF Con İrasabal 4 MF Elvin Camalov (Kapitan) 7 DF Boyan Letiç 8 MF Ayaz Quliyev 9 MF Anatoli Nuriyev 10 FW Namiq Ələsgərov 1 GK Yusif İmanov 40 MF Rauf Rüstəmli 14 FW İsak Belfodil 15 MF İvan Lepinitsa

Nömrə Ölkə Mövqeyi Futbolçu 16 GK Rüstəm Samiqullin 17 MF Tellur Mütəllimov 20 FW Coy Lens Mikels 19 FW Emmanuel Apeh 12 MF Vinsan Til 22 MF Seymur Məmmədov 27 FW Jarl Marqarita 28 FW Kahim Parris 70 FW Cessi Sekidika 94 GK Nicat Mehbalıyev 88 MF Xəyal Əliyev

Məşqçilər heyəti

Vəzifə	Ad, soyad
Baş məşqçi	Krunoslav Renduliç
Baş məşqçinin birinci köməkçisi	Saşa Sabljak
Baş məşqçinin ikinci köməkçisi	Ruslan Qafitullin
Qapıçılar üzrə məşqçi	Vitali Kovalyov
Fiziki hazırlıq üzrə məşqçi	Domaqoy Periç
Əvəzedici heyətin baş məşqçisi	İlqar Mənsimov

Akademiya

"Sabah" Futbol Klubu "Vətən" Respublika İxtisaslaşdırılmış Olimpiya Ehtiyatları Uşaq Gənclər Futbol Məktəbi ilə əməkdaşlıq edir. "Vətən" 1967-ci ildə uşaq və gənclər futbol məktəbi kimi təsis olunmuşdur. İlk illərində "Vətən" Futbol Məktəbinə Azərbaycanın futbol əfsanəsi Ələkbər Məmmədov rəhbərlik etmişdir. 26 dekabr 2007-ci il tarixindən etibarən Azərbaycan Respublikasının Təhsil Nazirliyinin qərarı ilə məktəbin adı rəsmi olaraq "Vətən" Respublika İxtisaslaşdırılmış Olimpiya Ehtiyatları Uşaq Gənclər Futbol Məktəbi olmuşdur.

"Vətən" Futbol Məktəbinin Bakı şəhərində yerləşən iki kampusu mövcuddur. Bu futbol məktəbində Bakı şəhərindən olanlarla yanaşı, Azərbaycanın müxtəlif bölgələrindən olan istedadlı uşaq və yeniyetmələr də məşq edir. "Vətən" Futbol Məktəbinin futbolçularından ibarət komandalar mütəmadi olaraq xaricdə təşkil olunan beynəlxalq futbol turnirlərində çıxış etmək imkanı qazanırlar.

Uzun müddətdi fəaliyyət göstərən futbol məktəbinin müxtəlif yaş qrupları AFFA-nın təşkil etdiyi yarışlarda uğurla çıxış edirlər. 2017/2018-ci il mövsümündə 7 yaş qrupunda (U10, U11, U12, U13, U14, U15 və U16) çempionatlara qatılan "Vətən" RİOEUG futbol məktəbi yekunda 3 qızıl (U11, U12 və U15), 1 gümüş (U16) və 1 bürünc (U10) medal qazanmaqla özünəməxsus rekordu yeniləyib.