Vaqif Qurbanov (professor)
Vaqif Qurbanov (azərb. Qurbanov Vaqif Şıxı oğlu; 1948, Bico, Ağsu rayonu) — Neft və Qaz İnstitutunun icraçı direktoru[1], geologiya-mineralogiya elmləri doktoru, professor[2]
| Vaqif Qurbanov | |
|---|---|
| Vaqif Şıxı oğlu Qurbanov | |
| Doğum tarixi | 1948 |
| Doğum yeri | |
| Milliyyəti | azərbaycanlı |
| Elm sahəsi | Litologiya |
| Elmi dərəcəsi | Geologiya-mineralogiya elmləri doktoru |
| Elmi adı | Professor |
| İş yerləri | |
| Təhsili | |
| Mükafatları |
 |
Həyatı
redaktəQurbanov Vaqif Şıxı oğlu 1 aprel 1948-ci ildə Ağsu rayonunun Bico kəndində anadan olmuşdur. 1966-cı ildə orta məktəbi bitirmiş və həmin ildə M. Əzizbəyov adına Azərbaycan Neft və Kimya İnstitutunun (indiki Azərbaycan Dövlət Neft və Sənaye Universiteti) Geoloji-kəşfiyyat fakültəsinə daxil olmuşdur. 1972-ci ildə təhsilini müvəffəqiyyətlə başa vurmuşdur.
Fəaliyyəti
redaktəƏmək fəaliyyəti
redaktəTəhsilini davam etdirməklə 26 Bakı Komissarları (indiki Bibiheybət NQÇİ) adına neft-qaz çıxarma idarəsinin mədənlərində mühəndis-geoloq kimi çalışmışdır. 1969-cu ildə Ümumittifaq Elmi-tədqiqat Geofizika İnstitutunun Azərbaycan bölməsinə mühəndis vəzifəsinə qəbul olunmuşdur. 3 may 1976-cı il tarixdən Azərbaycan Neft və Kimya İnstitutunda (indiki Azərbaycan Dövlət Neft və Sənaye Universiteti) çalışmışdır.
Elmi fəaliyyəti
redaktə1981–1984-cü illərdə həmin institutun dissertantı olmuşdur. 1976–1982-ci illərdə böyük laborant, laboratoriya müdiri vəzifələrində çalışmışdır. 1985-ci ildə AMEA-nın Geologiya İnstitutunun (indiki Geologiya və Geofizika) Müdafiə Şurasında "Dağıstanın düzənlik və Cənubi Kalmıkyanın Perm-Trias çöküntülərinin əmələgəlmə şəraiti və neftqazlılığı" mövzusunda dissertasiya işini müvəffəqiyyətlə müdafiə edərək, geologiya-mineralogiya elmləri namizədi elmi dərəcəsini almışdır.
1982-ci ildən Azərbaycan Neft və Kimya İnstitutunda (indiki Azərbaycan Dövlət Neft və Sənaye Universiteti) asisstent, 1986-cı ildən isə dosent kimi pedaqoji fəaliyyət göstərmişdir.
1995-ci ildə institutun Elmi Şurasının qərarı ilə dosent doktorluq dissertasiya işini tamamlanması məqsədilə 2 illik elmi təcrübəçi kimi Moskvaya, Rusiya Elmlər Akademiyasının Geologiya İnstitutuna ezam olunmuşdur. SSRİ-nin və Rusiyanın məşhur litoloq alimi, professor N. V. Xolodovun rəhbərliyi ilə laboratoriyada çox faydalı tədqiqat işləri aparmışdır. Beynəlxalq və respublika səviyyəli qrant layihələrində elmi rəhbər və icraçı kimi iştirak etmişdir.
Pedaqoji fəaliyyəti
redaktəRusiyanın tanınmış alimləri ilə birgə doktorluq elmi işini tamamlayaraq Bakıya qayıdıb öz doğma institutunda pedaqoji fəaliyyətini davam etdirmişdir. 2007-ci ildə Azərbaycan Dövlət Neft Akademiyasının (indiki Azərbaycan Dövlət Neft və Sənaye Universiteti) Geoloji-kəşfiyyat fakültəsinin dekanı seçilmişdir. 2008-ci ildə doktorluq dissertasiyasını müdafiə etmişdir. 2011-ci ildə Azərbaycan Dövlət Neft Akademiyasının tədris işləri üzrə prorektoru təyin olunmuşdur. 2013-cü ildə Litologiya, mineralogiya və petroqrafiya kafedrasında professor elmi adını almışdır. 2015-ci ilin yanvar ayından 3 sentyabr 2015-ci il tarixə kimi Azərbaycan Dövlət Neft Akademiyasının rektoru vəzifəsini icra etmişdir.[3][4]
2013-cü ildə Azərbaycan Dövlət Neft Akademiyasının Neft və qaz yataqlarının axtarışı və kəşfiyyatı kafedrasının müdiri seçilmişdir. Bakı Dövlət Universitetində 0,5 ştat əvəzçi professor kimi pedaqoji fəaliyyətlə məşğuldur.
2016-cı ildən AMEA-də yeni yaradılmış Neft və Qaz İnstitutunda direktorun elmi işlər üzrə müavini vəzifəsinə təyin olunmuşdur. Hal-hazırda həmin institutun icraçı direktoru vəzifəsində çalışır.[5]
Elmi tədqiqat istiqaməti
redaktəTədqiqatları neftli-qazlı hövzələrin geologiyası və axtarış-kəşfiyyat metodlarıdır. Elmi-tədqiqat obyektlərindən Rusiyanın və Qazaxstanın Perm-Trias çöküntülərinin litologiyası və həmin çöküntülər ilə əlaqədar neftqazlılığının öyrənilməsidir. Son dövrlərdə apardığı elmi-tədqiqat işləri Azərbaycanın Maykop-Miosen və Pliosen çöküntülərinin litologiyası və neftqazlılığı ilə əlaqədardır. 150-dən çox elmi məqalənin, 3 monoqrafiyanın 1 dərsliyin, 6 dərs vəsaitinin müəllifidir. Elmi rəhbərliyi ilə 2 elmlər namizədi hazırlanmışdır.Bakı Dövlət Universiteti və Azərbaycan Dövlət Neft və Sənaye Universitetinin müdafiə şuralarının üzvüdür.
Təltifləri
redaktə2010-cu ildə Azərbaycan Respublikası Prezidentinin Sərəncamı ilə "Tərəqqi" medalı[6] və AMEA-nın Yer Elmləri Bölməsinin Fəxri fərmanları ilə təltif olunmuşdur.[7]
İstinadlar
redaktə- ↑ "Elm və Təhsil Nazirliyi Neft və Qaz İnstitutunun icraçı direktoru". 2023-04-18 tarixində arxivləşdirilib. İstifadə tarixi: 2023-04-18.
- ↑ "Neftli-qazlı hövzələrin litologiyası sahəsində tanınmış alim". 2023-04-17 tarixində arxivləşdirilib. İstifadə tarixi: 2023-04-17.
- ↑ "Ölən rektoru tədris işləri üzrə prorektor əvəz edir". 2023-04-17 tarixində arxivləşdirilib. İstifadə tarixi: 2023-04-17.
- ↑ "Fransalı alimlər Neft Akademiyasında olub". 2023-04-18 tarixində arxivləşdirilib. İstifadə tarixi: 2023-04-18.
- ↑ "Qurbanov Vaqif Şıxı oğlu". 2023-04-17 tarixində arxivləşdirilib. İstifadə tarixi: 2023-04-17.
- ↑ "Azərbaycan Dövlət Neft Akademiyası əməkdaşlarının təltif edilməsi haqqında Azərbaycan Respublikası Prezidentinin Sərəncamı". 2023-04-18 tarixində arxivləşdirilib. İstifadə tarixi: 2023-04-18.
- ↑ "Prezident Neft Akademiyasının əməkdaşlarını təltif edib (siyahı)". 2023-04-17 tarixində arxivləşdirilib. İstifadə tarixi: 2023-04-17.